পৃথিবীদা শোয়দ ঙামদনা হল্লকখ্রবা ভারতকী এস্ত্রোনত গ্রুপ কেপ্তেন শুভাংশু শুক্লা, জাতিগীদমক চাউথোকচনিংঙাই ওইরবা মীকুপ অমা

লখিপুরওনলাইন নিউজ দেস্ক, জুলাই ১৫, ২০২৫ঃ ভারতকী স্পেস এক্সপ্লোরেসনগী পুৱারীদা অনৌবা লমায় অমা হাংদোক্লদুনা, ইন্তরনেস্নেল স্পেস স্তেসন (ISS) দা চৎখিবা অহানবা ভারতকী এস্ত্রোনত, গ্রুপ কেপ্তেন শুভাংশু শুক্লানা নুমিৎ ১৮গী মিসন মায় পাক্না লোইশিন্দুনা জুলাই ১৫, ২০২২ ইং পৃথিবীদা অশোয় অঙাম য়াওদনা হল্লকখ্রে। মহাক্কী মায় পাকপগী খোংচৎ অসিনা লৈবাক পুম্বগী মীওইশিংদা অনৌবা মঙাল অমা পীরি।

স্পেসএক্স (SpaceX) কী দ্রেগন স্পেসক্রাফট "গ্রেস" তা তোংদুনা, এক্জিওম-৪ (Ax-4) মিসনগী শরুক ওইরিবা শুভাংশু শুক্লা অমসুং মহাক্কী ক্র্যু মেম্বরশিংনা কেলিফোর্নিয়াগী তোর্বান্দা লৈবা পেসিফিক মহাসাগরদা ভারতকী মতম নুংথিল পুং ৩:০১ তাবা মতমদা মায় পাক্না স্প্লেসদাউন তৌখি। মসিগী থৌদোক অসিনা ১৯৮৪দা রাকেশ শর্মাগী মতুংদা স্পেসতা চৎপা অনিশুবা ভারত মচা ওইদুনা শুভাংশু শুক্লা পুৱারী শেমখ্রে।

ঐতিহাসিক খোংচৎ অমগী মায় পাকপা

গ্রুপ কেপ্তেন শুভাংশু শুক্লানা মায়পাকনা হল্লকপা অসি ভারতকীদমক্তা চাউথোকচনিংঙাই ওইরবা মীকুপ অমনি। লৈবাক্কী লুচিংবশিং, সাইন্তিস্তশিং অমসুং মীয়াম পুম্নমক্না হরাও তয়াম্না ওকখি। নাসা (NASA), ইসরো (ISRO), এক্জিওম স্পেস (Axiom Space), অমসুং স্পেসএক্স (SpaceX)কী পুন্না শিনখিবা Ax-4 মিসন অসিদা, শুভাংশু অমসুং মহাক্কী মরুপ অহুমনা পৃথিবীবু  ৩১০ রক হেন্না কোইদুনা কিলোমীতর মিলিয়ন ১৩ রোমগী খোংচৎ অমা মায় পাক্না পাংথোকখি। মহাক্না ISS তা লৈরিঙৈদা, সাইন্তিফিক এক্সপেরিমেন্ত ৬০ হেন্না পাংথোকখি, মদুদা ইসরোনা দিজাইন তৌবা তরেৎসু য়াওরি।

থৌদোক অসিদা প্রধান মন্ত্রী নরেন্দ্র মোদীনা মহাক্কী X তা অসুম্না ফোংদোকখি, "গ্রুপ কেপ্তেন শুভাংশু শুক্লাগী পুৱারী ওইরবা স্পেস মিসনদগী মায়পাকনা পৃথিবীদা হল্লকপ অসিদা ঐহাক্না লৈবাক মীয়ামগা লোইননা তরাম্না ওকচরি। "

এস্ত্রোনত অম ওইরকপগী খোংজৎ

শুভাংশু শুক্লাগী স্পেসকী খোংচৎ অসি উত্তর প্রদেশকী লখনৌদগী হৌখি। মহাক্না ১৯৪৯গী কার্গিল লান্না ইথিল পীদুনা, মহাক্কী ইচেগী লুহোংবফাওবা য়াওদবমখৈ নেসনেল দিফেন্স একাদেমি (NDA) গী পরীক্ষা থাখি। ২০০৬দা মহাক্না ইন্দিয়ান এয়র ফোর্স (IAF) কী ফাইতর ৱিংদা কম্মিসন তৌখি। Su-30 MKI, MiG-21, MiG-29, Jaguar, Hawk, Dornier, অমসুং An-32 য়াওনা এয়রক্রাফট কয়ামরোমদা পুং ২,০০০ হেন্না পাইবগী এক্সপেরিয়েন্স লৈখ্রবা teste পাইলত অমনি।

২০১৯দা, ইসরোনা মহাকপু ভারতকী অহানবা মী য়াওবা স্পেসফ্লাইত ওইরগদবা গগনায়ন (Gaganyaan) মিসনগীদমক খনখি। মহাক্না মস্কোগী য়ুরি গাগারিন কসমোনত ত্রেনিং সেন্তরদা ত্রেনিং লৌখ্রবা মতুং, বেঙ্গালুরু অমসুং নাসাগী ফেসিলিতিশিংদা মিসনগী মতাংদা মখা তানা ত্রেনিং লৌখি।

ইমুং-মনুংগী নুংঙাইবা

শুভাংশু শুক্লাগী হল্লকপগী নুমিৎতা মহাক্কী ইমুং-মনুং, লখনৌদা লৈরিবা মহাক্কী মমা-মপা, শম্ভু দয়াল শুক্লা অমসুং আশা শুক্লানা হরাও নুংঙাইবা ফোংদোকখি। মহাক্কী মমানা মপী তরং তরং চেল্লদুনা হায়খি, "ঐগী ইচা নুংঙাইনা হল্লক্লে, ঐনা ইশ্বরবু থাগৎচরি।"

মহাক্কী নুপী, দন্তিস্ত ওইরিবী (অমসুং মহাক্কা ক্লাস ৩দগী লোইনরকপা মরুপ) কামনা মিশ্রানা মখোয়গী পুন্সিবু শন্দোক্না পনখি। মখোয়গী চহি তরুক শুরবা মচানুপা সিদসু মপাবু উবদা য়াম্না হরাওখি।

মহৈরোয়শিংগীদমক্তা পাওজেল

শুভাংশু শুক্লানা স্পেসতা লৈরিঙৈদা মেঘালয় অমসুং অসমগী মহৈরোয়শিংগসু হেম রেদিও (Ham radio) গী খুৎথাংদা ৱারী শান্নখি। মহাক্না মহৈরোয়শিংদা হায়খি, "নখোয়না হোৎনরবদি সোয়দনা এস্ত্রোনত ওইরকপা ঙমগনি, থাদাসু খোং থাবা ঙম্লক্কনি।" মহাক্কী পুন্সিগী খোংচৎনা মহৈরোয়শিংদা মমল য়াম্লবা পাওজেল অমা পীরি:

সাইন্স, তেক্নোলোজি, ইঞ্জিনিয়ারিং, অমসুং মেথমেতিক্স (STEM) সাবজেক্তশিংদা পুক্নিং চংগদবনি। হকচাং অমসুং ৱাখল পু্ন্না কন্না হোৎনগদবনি। লেপ্পা লৈতনা হোৎনগদবনি অমসুং লৈবাক্কীদমক অচৌবা মঙলান মঙগদবনি। শুভাংশু শুক্লাগী মায় পাকপা অসিনা ভারতকী স্পেসকী মঙলানশিংবু মখা তানা চেৎশিলহন্দুনা তুংগী মীওইশিংদা অনৌবা ইথিল অমা পীরগনি।

✍️ Published by Lakhipuronline Team