শিলচরগী এমপি পরিমল শুক্লবৈদ্যনা লুপা লাখ ৫০গী তোঙান তোঙানবা চাউখৎ থৌরম ৫ গী উরেপ-উয়ুং তমখ্রে

লখিপুরওনলাইন নিউজ দেস্ক, নভেম্বর ২৮, ২০২৫: শিলচর লোকসভা না কোনবা মফমগী মীয়ামগীদমক য়াইফনবগী দমক চংশিল্লকপা খোংথাং ওইনা শিলচরগী এমপি পরিমল শুক্লবৈদ্যনা মহাক্কী এমপি ফন্দ (Local Area Development Fund) দগী লুপা লাখ ৫০গী ওইগদবা চাউখৎ-থৌরম কয়াগী থবক কয়া উরেপ-উয়ুং তমখ্রে। শগোলশেন নুমিত্তা পাঙথোকখিবা থৌরম অসিদা শিলচর বিধানসভানা কোনবা মফমগী তোঙান তোঙানবা মফম ৫দা প্রোজেক্টশিং অসিগী থবক থৌরমসিং অসি হৌদোকখি।

শিলচরগী তোঙান-তোঙানবা মফমশিংদা চাউখৎ-থৌরমশিং

এমপি পরিমল শুক্লবৈদ্যনা ঙরাং মফম ৫দা চাউখৎ-থৌরম কয়াগী উরেপ-উয়ুং তমখিবা অদুগী মনুংদা, অহানবদা মহাক্না লুপা লাখ ১০ চঙনা সাগৎকদবা অরুন কুমার চন্দ লো কলেজ (Arun Kumar Chanda Law College) গী অহেনবা বিলদিং (Extension Building) শেমগৎপগী থবক হৌদোকখি।

মসিগী মতুংদা, তারাপুর নাথপাড়াগী নাথ ছাত্রাবাসতা লুপা লাখ ১০ চঙনা শেমগৎকদবা বাউন্দরী ৱাল (Boundary Wall) গী উরেপ উয়ুং তৌখি। অদুগা তারাপুর সার্বজনীন দূর্গা মণ্ডপকী কলচরেল হোল (Cultural Hall) শেমগৎনবা লুপা লাখ ১০, মেহেরপুর নাগা কলোনিদা লৈবা রানি গাইডিনলিউ স্মৃতি কম্মুনিটি হোল শেমগৎনবা লুপা লাখ ১০ অমসুং শিলচর ঘুংগুর রাম মন্দির ধরমশালাগী বিলদিং শেমগৎপদা চঙগদবা লুপা লাখ ১০গী থবকশিংগীসু উরেপ-উয়ুং তমখি।

পরিমল শুক্লবৈদ্য গী মরমদা ৱাহৈ খরদং

পরিমল শুক্লবৈদ্য বরাক তম্পাক্কী মমিং লৈরবা বিজেপি গী লুচিংবা অমনি। মহাক ২০২৪ গী লোকসভা মীখলদা মায় পাক্লবা মতুংদা হৌজিক শিলচর কেন্দ্রগী এমপি ওইরি।  এমপি ওইদ্রিঙৈ মমাংদা মহাক্না আসাম সরকারগী হান্নগী মন্ত্রী ওইনা উমং, এক্সাইজ অমসুং ঙা য়োকপগী বিভাগশিংগী থৌ পুরম্মী।  মহাক ধলাই বিধানসভা কেন্দ্রদগী খল্লকপা এমএলএ ওইনা কারকখিবনি। 

মতীক চাবা থবক পাঙথোক্নবা এমপিনা ফোঙদোকখি

উরেপ-উয়ুং তমবগী থৌরম অদুদা শরুক য়ারদুনা এমপি পরিমল শুক্লবৈদ্যনা কেন্দ্র অমসুং রাজ্যদা লৈরিবা বিজেপি (BJP) লৈঙাকনা লৌখৎলকপা চাউখৎ-থৌরমশিংগী মতাংদা মীয়ামদা ৱাফম খরা থমখি। মহাক্না থৌরমদা ৱা ঙাংলদুনা মরী লৈনবা ওফিসারশিংদা থবকশিং অসি অফবা মওংদা অমদি ক্বালিটি লৈহন্নবা অমসুং লেপ্নখিবা মতমগী মনুংদা লোইশিন্নবা অকনবা ৱাফমসু থমখি।

থৌরম অসিদা মরী লৈনবা ওফিসারশিংগী মথক্তা বিজেপি মধ্য শহর মণ্ডলগী প্রসিদেন্ট হীরক চৌধুরী, নিঊ শিলচর মণ্ডল প্রসিদেন্ট দুলাল দাস, কাছাড় জিলা বিজেপিগী ভাইস-প্রসিদেন্ট ঝলক চক্রবর্তী, এমপিগী মীহুৎ শশাঙ্ক চন্দ্র পাল, আসাম রাজ্যিক ওবিসি মোর্চাগী ট্রেজারর কৃষ্ণ জীবন দেবনাথ, জেনেরেল সেক্রেটারি গোপাল কান্তি রায়, সেক্রেটারি সুমনা দাস য়াওনা অতৈ মশক নাইবা মীওই কয়া অমসুং মফম অদুগী মশক নাইবা মীওই কয়না থৌরমদা শরুক য়াখি।

✍️ Published by Lakhipuronline

Powered by Blogger.