ইম্ফাল লিটারেচর ফেষ্টিভেল ২০২৫: খা আফ্রিকা, থাইলেন্দ অমসুং ত্রিপুরাগী অইবশিংনা লোকতাক য়েংখ্রে; আই দি পিশিংদা তেংবাংখ্রে
খোঙচৎ অসিগা লোইননা এস. সি. হোষ্টেল থঙ্গ ৱাংমা হাই স্কুলদা (S. C. Hostel Thanga Wangma High School) হাংলিবা রিলিফ কেম্পতা চঙদুনা কেম্প অসিগী আই দি পি (IDP) শিংদা লুপা লিসিং ১১ (Rs. 11,000) তেংবাংবগা লোইননা অৱাবা খাঙলিবা ইচিল-ইনাওশিংগী পুক্নিং থৌগৎখ্রে।
"লোকতাক লৈত্ৰবদি মণিপুর অসি লৈকঙলা ওল্লগনি"
ঙসিগী খোঙচৎ অদুদা শরুক য়াখিবা ত্রিপুরাগী শক্নাইরবা মণিপুরি অইবা লাঙ্গোলজম বীরমঙ্গোল (L. Birmangol) না ফোংদোকখিবদা, "মালেমদা অঙকপগী মশক ওইরিবা থুমহি চেন্দবা লোকতাক পাত অসি লৈত্ৰবদি মণিপুর অসি লৈকঙলা ওল্লগনি। মরম অদুনা লোকতাক কনবা হায়বসি মণিপুর মীয়ামগী থৌদাং ওইফম থোকই।"
এল বীরমঙ্গোলনা মখা তানা ফোংদোকখিবদা, ইম্ফাল লিটারেচর ফেষ্টিভেল ২০২৫ দা শরুক য়াবা ওইনা ত্রিপুরাদগী মখোয় মীওই ৪ লাকচবনি। হন্দক্কী ফেষ্টিভেল অসিদা আসাম, কোলকাতা, এঙ্গোলা, খা আফ্রিকা, থাইলেন্দ অমসুং মণিপুরগী অইবা-অইবী কয়া উনবা ফংজবসি য়াম্না নুংঙাইবা ফাওই। অসুম্না তোঙান তোঙানবা লোনসিংগী অইবা-অইবীশিং উনবা অসিনা ঐখোয়গী লোন, সাহিত্য (Literature) অমসুং কলচর অসি একচেঞ্জ তৌনবদা হেন্না খুমাং চাওশিনবা ঙমগনি হায়না মহাক্না ফোংদোকখি।
আই দি পি শিংগী মতাংদা মহাক্না হায়, "মে ৩, ২০২৩ দগী হৌজিক ফাওবা শাংলবা চহি ২ হেল্লক্লবা অসিফাওবদা রিলিফ কেম্পশিংদা অৱা চৈনা খাঙলিবা আই দি পি শিংগী অৱাবদা শরুক য়াজরি। অথুবদা আই দি পি শিং অসি ময়ুম ময়ুমদা হঞ্জিনহন্নবা লৈঙাক্না থৌরাং লৌখৎপীয়ু।"
সাহিত্য, কলচর অমসুং হ্যুমেনিতিগী থৌরম
ইম্ফাল লিটারেচর ফেষ্টিভেল ২০২৫ অসিগা মরী লৈননা সাথৌলুপকী সেক্রেটরী মায়ংলম্বম উত্তম (Mayanglambam Uttam) না ফোংদোকখিবদা, ফেষ্টিভেল অসি লমদমসিগী অমদি মালেমগী অইবা-অইবীশিংবু পুক্নিং থৌগৎপিরিবা পুকচেল চাওরবা মীয়ামগী মতেংগা লোইননা পাংথোকচবনি। ঙসিগী থৌরম অসিদা মালেমগী মফম অমত্তদা ফংদ্রবা সঙাইগী হৌরকফম ওইরিবা কৈবুল লমজাওদা লৈরিবা সঙাই য়েংবগা লোইননা লোকতাক পাতয়ায়দা অইবা-অইবীশিংগী শৈরেং শৈদিন্নবগী থৌরম পাংথোকচবনি। লোইননা আই দি পি শিংগী অৱাবদা শরুক য়াবা ওইনা ঙমজবা সেলগী তেংবাংসু পাংজরম্বনি।
সাথৌলুপকী এদভাইজর ওইরিবা সাহিত্য একাদেমী এৱার্দি শরৎচান্দ থিয়াম (Saratchand Thiyam) না ফেষ্টিভেল অসিগী মতাংদা ফোংদোকখিবদা, "নুমিত হুম্নি চুপ্না পাংথোক্কদৌরিবা ইম্ফাল লিটারেচর ফেষ্টিভেল ২০২৫ গী মরুওইবা পান্দমদি লমদমসিগী তম্পাক্কী লমদা লৈরিবা আই দি পি শিংগা মপানদগী লাক্লিবা ডেলিগেটশিংগা হকথেংননা উনদুনা মখোয়না ৱারিবা অমদি থেংনরিবা খুদোংচাদবা কয়াগী পাউদমশিং তারগা মালেমগী মীয়ামদা খঙহন্নবা হোৎনবা অসি হ্যুমেনিতীগী মশক অমনি।"
শরৎচান্দ থিয়ামনা মখা তানা ফোংদোকখিবদা, ইম্ফাল লিটরেচর ফেষ্টিভেলগী অতোপ্পা পান্দম অমদি মপানগী অইবা-অইবীশিং কৌদুনা লমদমসিগী অইবা-অইবীশিংগা উন্নদুনা লমদমসিগী সাহিত্যগী মশক অসি মালেমগী মীয়ামদা য়ৌহন্নবা অমদি খঙহন্নবা হোৎনবা অসিনি। মণিপুরী লিটারেচর অসি গ্লোবেলি (Globally) মশক তাক্নবা হোৎনবগী ৱাখল্লোন অসি মাংদা থমজরগা পাংথোকচবা ফেষ্টিভেলনি।
হয়েং ফেষ্টিভেল অসিগী হুম্নি চনবা নুমিত্তা মালেমগী মীয়ামনা শকখঙনরবা লমদমসিগী থিয়েটর আইকন লাইওইখ্রবা গুরু রতন থিয়ামগী কোরাস রিপর্টরি থিয়েটরদা (Chorus Repertory Theatre) চত্তুনা গুরু অসিগী মফমদা ইকাইখুম্নবা উৎক্কনি। ঙসিগী নিনি চানবা থৌরম অদুদা লমদমসিগী শক্নাইরবা অইবা-অইবী কয়ানসু শরুক য়াখি হায়না সাথৌলুপ ইম্ফালগী পাউ অসিনা হায়রি।
✍️ Published by Lakhipuronline
