আমসু অমদি মনিপুরী মুসলিম সিএসওসিংগী মীহুত কাংবুনা গোলাঘাতকী ইভিক্সননা শোক্লহল্লবসিং য়েংশিনখ্রে, এমএলএ গসু উন্নখ্রে
অসামগী গোলাঘাট দিস্ত্রিক্টকী সরুপথার সব-দিভিজনগী মনুং চনবা বিদ্যাপুর খুঙ্গংদা লৈবা মণিপুরী মুসলিমগী য়ুম ৭০ রোম অসাম লৈঙাক্না ইভিক্সন চত্থখিবদা লৈফম চাফমগী অৱাবা মায়োক্নরিবশিংবু য়েংশিনবা ওইনা All Assam Manipuri Students' Union (AAMSU) অমসুং Manipuri Muslim CSO-শিংগী অপুনবগী ওইবা খোঙচৎ অমা খুঙ্গং অসিদা চৎখ্রে। মীহুৎ কাংবু অসিদা সরুপথারগী এম এল এ বিশ্বজিৎ ফুকনগা উনদুনা অৱাবা তারিবা থৌদোক অসিগী মতাংদা তোঙান তোঙানবা ৱাফম কয়াগী মতাংদা খন্ন-নৈনখ্রে।
লুচিংবশিংনা অৱাব তারবসিংগা উনখিবা
খোঙচৎ অসিদা All Assam Manipuri Students' Union (AAMSU) সেন্ট্রেল কমিতিগী প্রসিদেন্ট ঙাসেপম সানাহল অমদি জেনরেল সেক্রেটরি অশাংবম স্বপনগী লুচিং মখাদা দিস্ত্রিক্ট কমিতিগী এক্সিকিউটিভশিং য়াওনা "জোইন্ট কো-ওর্দিনেসন কমিতি ফোর ইভিক্টেড উরিয়ামঘাট" কী চিয়ারমেন সেলিম নোংজাই, জেসিসি অসিগী কনভেনর জমির অহমেদ চৌধুরি, অসাম মণিপুরী মুসলিম য়ুথ ফ্রন্টকী সেক্রেটরী জিউর রহমন মুফতি, নোর্থ ইস্ত পাঙল এসোসিয়েসন (অসাম য়ুনিট) কী সেক্রেটরি এম সবির খান অমসুং অল অসাম মণিপুরী মুসলিম স্টুডেন্টস য়ুনিয়নগী এক্সিকিউটিভ মেম্বর ফেসন অহমেদ য়াওখি।
মীহুৎ কাংবু অসিনা গোলাঘাট দিস্ত্রিক্টকী মনুং চনবা বিদ্যাপুর খুন্দা ইভিক্সন তৌখিবনা মরম ওইরগা লৈফম চাফমগী অৱাবা মায়োক্নরবা ইমুং ৭০ রোম অদুদা চত্তুনা য়েংশিনখি। মসিগী মতুংদা ডেলিগেট তিম অসিনা খুঞ্জাশিংগা পুন্না ফম্মিন্নদুনা মখোয়গী অৱাবশিংগী মতাংদা কুপ্না ৱারি শানখি।
MLA বিশ্বজিৎ ফুকনগা উনবা অমসুং ৱারেপশিং
খুঞ্জাশিংগা ৱারি শানরবা মতুংদা, অপুনবগী ওইবা পোইন্ট অনি য়াওবা মেমোরেন্দম অমা সরুপথারগী MLA বিশ্বজিৎ ফুকনদা খুৎশিন্ননবা ৱারেপ লৌখি। AAMSU, Joint Co-ordination Committee অমদি মফম অদুগী পোলিতিকেল রিপ্রেজেন্টেটিভশিং য়াওনা নুমিদাংগী পুং ৮ তাবা মতমদা MLA বিশ্বজিৎ ফুকনগা উনদুনা ৱাফম কয়া খন্নখি।
হন্দক অসাম লৈঙাক্না থোকখিবা স্পিসিয়েল রিভিজন অসিদা মণিপুরী মুসলিম ইভিক্সন তৌরিবা খুল অসিসু য়াওহন্নবা হায়জরুবা মতমদা, এম এল এ না মহাক্না মরী লৈনবা ওফিসিয়েলশিংগা ৱারি শানদুনা হাপননবা হোৎনগনি হায়না থাজবা থম্লকখি। মসিগী মথক্তা, ইভিক্সন তৌখ্রবা মণিপুরী মুসলিমগী য়ুম ৭০ অসিবু অমুক হন্না খুন্দা লৈতাহন্নবগী দমক মফম অসিমক্তদা নত্ত্রগনা অনকপা মফম অমদা থম্বীযূ হায়না হায়জরুবদা, মহাক্না মীয়ামদা মখোয়বু শোইদনা মফম অমদা লম এলোটমেন্ট তৌহন্নবা অমদি মহাক্কা লোয়ননা ডেলিগেট তিম অমা অসামগী চীফ মিনিস্টর ডঃ হিমন্ত বিশ্ব শর্মা গা উনহন্নবা মহাক্না শিনগে হায়না থাজবা পীরকখ্রে হায়রি।
✍️ Published by Lakhipuronline
