য়ুনাইটেড মণিপুরী এসোসিয়েশন, আসাম UMAA না অসমগী মুখ্যমন্ত্রিদা মেমোরেন্দম পীশিনখ্রে; ওটোনোমস কাউন্সিল অমসুং এস টি ষ্টেটাস পীনবা দাবী তৌখ্রে
য়ুনাইটেড মণিপুরী এসোসিয়েশন, আসাম (UMAA) না ঙসি অসমগী ইকায়খুম্নজরিবা মুখ্যমন্ত্রীগী মফমদা মেমোরেন্দম অমা পীশিনখ্রে। লুপ অসিনা পীশিনখিবা মেমোরেন্দম অসিদা অসমদা লৈরিবা মণিপুরীশিংগীদমক তোঙানবা ওটোনোমস কাউন্সিল (Autonomous Council) শেম্বা অমসুং মণিপুরী খুন্নাইবু সিডিউল ট্রাইব (ST) Plain লিষ্টতা চলহনবা হায়বা মরুওইবা দাবী অনি অসি অকনবা মওংদা থমখ্রে।
ওটোনোমস কাউন্সিলগী দাবী অমসুং মসিগী মরুওইবা
মেমোরেন্দম অসিদা ফোঙদোকখিবগী মতুং ইন্না, UMAA না অতৈ মরুওইবা সিএসও (CSOs) সিংগা খুৎশম্নদুনা কুমজা ১৯৯২ দগী হৌনা মনিপুরীসিংগী তোঙানবা ওটোনোমস কাউন্সিল শেম্নবগীদমক গনতান্ত্রিক ওইবা মওংদা খোংজং চঙশিন্দুনা লাক্লি। ২০১১ দা লৈঙাকনা শেমখিবা মণিপুরী ডিভেলপমেন্ট কাউন্সিল (MDC) অসিনা মণিপুরী খুন্নাই অসিগী শেন্মিৎলোন, মহৈ-মশিং নচিংবাগী লমদা মতিক চাবা চাউখৎপা পুরকপা ঙমদ্রি হায়না লুপ অসিনা ফোঙদোক্লি।
মরম অসিদগী অসম লৈঙাকনা মোড়ান, মটক অমসুং রাজবংশী ফুরুপশিংদা পীখিবা ওটোনোমস কাউন্সিলগুম্না অসমগী মণিপুরীশিংদসু কাউন্সিল অসি পীনবা মখোয়না অকনবা মওংদা দাবী তৌখি। মসিগী খুত্থাংদা খুন্নাই অসিগী চাউখৎ-থৌরাংগী লমদা অহোংবা পুরকপা ঙমগনি হায়না লুপ অসিনা থাজবা থম্লি।
এস টি ষ্টেটাস অমসুং লোনগী ঙাক্লৌ
কাউন্সিলগী মথক্তা, লুপ অসিনা মণিপুরী ফুরুপকী চৎনবী, লোন্ অমসুং শক্তাক ঙাক-শেনবদা সংবিধানগী ঙাক্লৌ পীনবা ২০১২ দগী হৌনা এস টি ষ্টেটাস পীনবা দাবী তৌদুনা লাক্লি। ভারতকী সংবিধানগী প্রোভিজনশিংগী মখাদা মণিপুরী ফুরুপপু এস টি লিষ্টতা য়াওহন্নবা চেরোল অসিদা মখা তানা তকশিনখি।
অমরোমদা, অসমগী জিলা ৪ দা মণিপুরী লোন্ বু এসোসিয়েট ওফিসিয়েল ল্যাঙ্গুয়েজ ওইনা লাউথোকপগীদমক লুপ অসিনা আসাম লৈঙাক্কী মফমদা তৌবিমল খঙবা ফোঙদোকলি হায়নসু য়ুনাইটেড মণিপুরী এসোসিয়েশন, আসাম UMAA গী প্রেসিডেন্ট L. Sarat Chandra Singha অমসুং জেনেরেল সেক্রেটারী L. Changthangkhomba Singha না খুৎয়েক পীবা মেমোরেন্দম অসিদা ৱাফমশিং অসি পল্লি।
✍️ Published by Lakhipuronline
