লখিপুরওনলাইন ডিজেতেল দেস্ক, দিসেম্বর ৪, ২০২৫: শিলচরগী রংপুর মৈরা কম্মিতীগী অনৌবা মৈরা পায়বী কলচরেল হোল অমা ঙসি উধারবন্দগী এম এল এ মিহির কান্তি সোম না হৌনবী মতুং ইন্না রিবোন ককতুনা শঙ্গাখ্রে। মীয়ামগী দমক অমসুং সমাজগী থবক থৌরমশিং পাংথোক্নবা শঙ্গাখিবা হোল অসি এম এল এগী লোকেল এরিয়া দিবলপমেন্ট (MLALAD) স্কিম ২০২৪-২৫ গী মখাদা শাখিবনি।
থৌরম অসিগী মপুং ওইবা শরুকশিং
ঙসি পাংথোকখিবা শঙ্গাবগী থৌরম অদুদা রংপুর মৈরা কম্মিতীগী প্রসিদেন্ট থেগুজম ওংবী সান্তনা, উদরবন্দগী এম এল এ মিহির কান্তি সোম, অমদি কম্মিতী অসিগী জেনেরেল সেক্রেটরী মোইরাংথেম ওংবী মিনা, ভাইস প্রসিদেন্ট খুন্দ্রাকপম ওংবী শুভারানি, ভাইস প্রসিদেন্ট খুন্দ্রাকপম বোজে দেবী, ত্রেজারর খোমদ্রাম ওংবী থোইবী, এক্স প্রসিদেন্ট মোইরাংথেম ওংবী সেফালী, ফাউন্দর সেক্রেটরী মোইরাংথেম ওংবী বিনারানি, লেন্দ দোনর য়াম্বেম ধবলো, অমসুং AAMWMPCC গী এক্স প্রসিদেন্ট হরিপ্রিয়া শর্মানা মথং শিৎনা মীফম মপু, অথোইবা মীথুং অমসুং ইকাই খুম্নবা মীথুংশিং ওইনা ফম্বাক থক্তা লৈতেংখি।
সমাজদা মৈরা পৈবীশিংগী থৌদাং
থৌরমগা মরি লৈননা ৱা ঙাংলদুনা এম এল এ মিহির কান্তি সোমনা মণিপুরী জাতিগী লৈরিবা মৈরা পায়বীশিংগী থবক থৌরমশিং অসি য়াম্না থাগৎনিঙাইনি হায়না ফোংদোকখি। সমাজ অসিদা মৈরা পায়বীশিংনা লৌরিবা থৌদাং অসি মহাক্না উবা ফংলে হায়না মহাক্না পল্লদুনা, মহাকনা অঙম্বা থাক্তা জাতি ধর্ম খায়দনা মীয়ামগী য়াইফনবা হোৎনরি হায়না হায়খি।
তশেংনমক, মৈরা পায়বী হায়বসি মণিপুরী সমাজগী য়াম্না মরুওইবা শক্তম অমনি। ময়ায় কাবা চীনজাক শিজিন্নবা থীংবা, সমাজগী ফত্তবা চৎনবী মুত্থৎপা, অমসুং ইমুং মনুংগী য়াইফনবা হোৎনবদা মখোয়না লমজিং মৈরা ওইদুনা লাক্লি। পুৱারীগী লমদসু নুপী লালদগী হৌরগা ঙসি ফাওবা সমাজগী অৱাবা কয়া কোকহন্নবা নুপীশিংনা লৈরিবা থৌদাং অসি মমল নাইদে। ঙসি শঙ্গারিবা হোল অসিনা মখোয়গী থবক থৌরমশিং হেন্না মপাঙ্গল কনখৎহনবদা অমসুং মীয়ামগী সেবা তৌবদা চাউনা মতেং ওইরগনি হায়না থাজবা থম্লি।
মসিগী মথক্তা, এম এল এনা মীয়ামদা হোল অসি মখা তানা হোল অসিগী সিলিং হাপচিনবা অমদি তোইলেট শানবা মহাক্না মতেং পাংগনি হায়না থাজবা পীরমখি ।
মীয়ামগী মতেং অমসুং তুংগী থৌরম
মৈরা পায়বী কম্মিতী অসিগী প্রসিদেন্ট থেংগুজম ওংবী সান্তোনানা হোল অসি শানবা হোৎনবদা অৱা অনা থিদনা হোৎনবীখিবা মোইরাংথেম নন্দবাবু, থেগুজম প্রেমকুমার, মৈনাম পূর্ণজিৎ, মৈনাম শরৎ, মোইরাংথেম অশোককুমার নচিংবা মীওইশিংবু মহাক্না ঙমখৈ লৈতনা থাগৎপা ফোংদোকখি। মহাক্না মখা তানা রংপুর খুঙ্গং অসিগী মীয়ামনসু তুংদা চাউখৎ থৌরমশিংদা সপ্পোর্ট তৌবীয়ু হায়না হায়জখি।
লোইননা AAMWMPCC না শিনদুনা হন্দক রামনগর বেরাখালদা পাংথোক্কদৌরিবা ৮৬ শুবা নুপী লাল নিংশিং নুমিত অসিদসু মীয়ামদা শরুক য়ামিন্নসি হায়নসু হায়জখি।
✍️ Published by Lakhipuronline
