এয়ার ইন্দিয়াগী থৌদোক: পাইলৎকী মরান্নরা নত্রগা মেকানিকেল অশোইবরা? AAIB অমসুং ALPAগী মরক্তা অচৌবা চয়েৎনবা থোরক্লি
লখিপুরওনলাইন নিউজ দেস্কঃ
জুনগী ১২, ২০২৫ শগোলশেন নুমিত্তা অহমেদাবাদতা লৈবা সর্দার বল্লভভাই পতেল ইন্তর্নেস্নেল এয়রপোর্টতগী এয়ার ইন্দিয়াগী ফ্লাইট AI171 গী অমাং-অতা থোকখিবা থৌদোক্কী মতাংদা ইনভেস্টিগেসন চত্থরিঙৈ অসিদা, ভারত সরকারগী এয়রক্রাফ্ট এক্সিদেন্ত ইনভেস্টিগেসন বুরো (AAIB) না পুথোকখিবা প্রিলিমিনরি রিপোর্ত অমসুং এয়রলাইন পাইলৎস এসোসিয়েসন ওফ ইন্দিয়া (ALPA) গী মরক্তা অচৌবা চয়েৎনবা অমা থোরক্লি। AAIB গী রিপোর্তনা থৌদোক্কী মরম অদু পাইলৎকী ওইবা মরান্ননি হায়বগী মাইকৈরোমদা চীংশিল্লি, অদুবু ALPA না মসি মপুং ফানা শিংনদুনা, মেকানিকেলগী অশোইবগী ওইথোকপা য়াবা অদুদা ওইনা পুক্নিং চিংশিল্লি। পনবা য়াই থৌদোক অসিদা ক্রু মেম্বর ওইখিবী মণিপুর মচা অনিসু পুন্সি মাংখ্রিবনি।
AAIBগী প্রিলিমিনরি রিপোর্তনা করি হায়রি?
AAIB না পুথোকখিবা রিপোর্তকী মতুং ইন্না, অহমদবাদতগী পাইখৎলবা মতুং বোয়িং 787-8 এয়রক্রাফ্টকী ইন্জিন অনিমক সেকেন্দ ৩২গী মনুংদা থবক তৌবা ঙমখিদে। মসিগী মরুওইবা মরমদি ইন্জিন অনিমক্কী ফ্যুএল কন্ত্রোল স্বিচশিং অদু "RUN" পোজিসনদগী "CUTOFF" পোজিসনদা হোংদোকখিবনি হায়না ময়েক শেংনা ফোংদোক্লি। মসিনা মরম অদু পাইলৎশিংনা ওইরমগদ্রা হায়বগী ৱাখল্লোন অমা পুক্নিংদা ফাওহল্লি। রিপোর্তনা কোকপিট ভোইস রিকোর্দরগী ৱারোলসু ফোংদোকখি, মদুদা পাইলৎ অমনা অতোপ্পা পাইলৎ অমদা "করিগীদমক নহাক্না কত-ওফ তৌখিবনো?" হায়না হংবদা, অতোপ্পা অমনা পাউখুম ওইনা "ঐহাক্না তৌদে" হায়না খুমখি। পাইলৎশিংনা ইন্জিনশিং অদু অমুক হন্না থবক তৌহন্নবা হোৎনখি, অদুবু ইন্জিন অনিমক মপুং ফানা থবক তৌরকখিদে। অরোইবদা, এয়রক্রাফ্টকী খুদোংথীবা অদুগী মমাংদা "MAYDAY" হায়না অরোইবা পাউজেল থাখি
ALPAগী য়ানিংদবা অমসুং মেকানিকেল অশোইবগী ৱাখল্লোন
পাইলৎশিংগী কাংলুপ ALPA না AAIB গী রিপোর্ত অসিদা য়ানিংদবা কয়া ফোংদোকখ্রে। মখোয়গী খ্বাইদগী চাউবা শিংনবদি ইনভেস্টিগেসনগী ফংবা রিপোর্ততা পাইলৎকী মরান্ননি হায়বগী মাইকৈদা চিংলি হায়বসিনি ALPA না হায়রি মদুদি রিপোর্ত অদু ওফিসিয়েল ওইনা পুথোকপগী মমাংদা মালেমগী মমিং লৈরবা মীদিয়াদা চৈখায়রকখিবসি য়ানিংদে হায়বসিনি।
মরুওইবা টেক্নিকেল ওইবা ৱাফম অমদা, ALPA না ২০১৮ দা ইউনাইটেড স্তেতসকী ফেদরেল এভিএসন এদমিনিস্ত্রেসন (FAA) না বোয়িং 787 গী ফ্যুএল স্বিচকী দিজাইনদা লৈবা অশোইবগী মতাংদা চেক্সিন ৱারোল অমা পুথোকখ্রবনি হায়নসু পল্লি। অদুনা কোকপিটকী মনুংদা খক্তা নত্তনা, এয়রলাইনগী সেফটি থৌশিলশিংদসু অসোয়বা লৈরমগদ্রা হায়বগী ৱাহং অমা হংহল্লি।
মণিপুরগী অৱাবা মৈচাক কোকত্রি
লৈবাক শিনবা থুংনা মীৎয়েং থম্নরিবা থৌদোক অসিগী মনুংদা, মণিপুরগীসু অৱাবা মৈচাক কোকত্রি। থৌদোক অসিদা পুন্সি মাংখ্রবা কেবিন ক্রু অনি, থৌবালদগী কোংব্রাইলাৎপম ঙানথোই শর্মা (চহী ২১) অমসুং কাংপোকপিদগী লাম্নুনথেম সিংসন (চহী ২৮), মণিপুরদগীনি।
শিখিবশিং
পেসেঞ্জরশিং অমসুং ক্রু:
অনবোর্ডতা অপুনবা: ২৪২ (পেসেঞ্জর ২৩০, ক্রু মেম্বর ১২)
শিখিবা: ২৪১ (পেসেঞ্জর বিশ্বাসকুমার রমেস নত্তনা অতৈ পুম্নমক শিখি)
নেস্নেলিটীশিং:
ইন্দিয়ন: ১৬৯, ব্রিটিশ: ৫৩, পোর্তুগীজ: ৭, কেনেডিয়ন: ১
লৈখিদবা মরুওইবা মীওইশিং:
বিজয় রুপানি: গুজরাতকী হান্নগী মুখ্যমন্ত্রী, চহি ৬৮
কেতন শাহ: চহি ৪৩, ব্রিটিশ নেস্নেলনি, হ্যাম্পশায়রগী শিপটন বেলিন্জরদা মহাক্কী কম্যুনিটী স্তোর অমা লৈরি, মহাক্কী নুপী মেঘা অমসুং মপীকপা মচা অনি লৈরি।
মনীষা থাপা: চহি ২৭, কেবিন ক্রু মেম্বরনি
ঙানথোই শর্মা কোংব্রাইলাৎপম: চহি ২১, মণিপুরগী থৌবাল দিস্ত্রিক্ততগী, কেবিন ক্রু মেম্বরনি।
লাম্নুনথেম সিংঙ্গসোন: চহি ২৮, মণিপুরগী কাংপোকপী দিস্ত্রিক্ততগী, কেবিন ক্রু মেম্বরনি।
ইরফান: চহি ২২, এয়র ইন্দিয়া কেবিন ক্রু মেম্বরনি।
সৈয়দ ইনায়েত আলি অমসুং সৈয়দ নফিসা বানো: মতৈ মনাও অনিসিগী মখোয় পীক্লিবা অঙাং অনিগা পুম্নমক শিখি।
সাহিল পতেল: চহি ২৫, ইন্দিয়া ইয়ং প্রফেস্নেল স্কিমগী মখাদা য়ুকে ৱর্ককী ভিজা ফংখিবনি।
কোমি ব্যস: দোক্তরনি
দা. নিরালি পতেল: চহি ৩২, তোরোন্তোদগী কেনেডিয়ন দেন্তিস্তনি
গ্রাউন্ড ফেটেলিটীশিং:
অপুনবা: বিজে মেদিকেল কোলেজ হোস্তেলদা লৈবা মীওইশিং অমসুং মহৈরোইশিং য়াওনা ৩৮ শিখি।
মরুওইবা গ্রাউন্ড ভিকটিমশিং:
আকাশ পাটনি: চহি ১৫, তুক-তুক দ্রাইভর অমগী মচানুপা নি, ক্র্যাশ সাইটকী মনাকতালৈবা মখোয়গী চা দুকান অমদা শিখি।
রাকেশ দেওরা: হোস্তেল মেস হোলদা নুংথিলগী চাক চারম্বদা মথক্তগী কিন্থরকপা পোৎশকশিংনা নন্দুনা শিখিবা মেদিকেল মহৈরোইনি।
বিজে মেদিকেল কোলেজগী এমবিবিএস মহৈরোই মঙা: গ্রাউন্ড কেজুএলটীশিংগী মনুং চল্লি।
অরোইবদা, থৌদোক অসিগী মতাংদা অচুম্বা মরম থিদোকতুনা পুন্সি মাংখ্রবশিংগী ইমুং-মনুংগীদমক অমসুং মতুংগী নোংথক লম্বীগী চৎথোক-চৎশিন তৌবগী সেফটিগীদমক্তা অপনবা লৈতবা, ময়েক শেংবা ইনভেস্টিগেসন অমা মথৌ তাই।
✍️ Published by Lakhipuronline Team
.jpg)
