চহি খরগী মমাংদা, থবক ফংনবগীদমক্তা মরুওইবনি হায়না লৌনরমবা স্কিলশিং অদু ঙসিদি মমল লৈরক্তবগা চপ মান্নখ্রে। এআইনা রিপিটিটিভ ওইবা থবকশিং অমসুং দেতা এনালাইসিস গুম্বা থবকশিং মীওইবদগী হেন্না ফজনা চুম্না অমসুং থুনা তৌবা ঙম্লে। মসিনা তুংলমচত্তা ঐখোয়না মাইপাক্নবগীদমক, মীওইবনা মশাগী ওইবা, এআইনা কোপী তৌবা ঙমলোইদবা স্কিলশিং অদু শেমগৎপদা মীৎয়েং থম্বগী মতম ওইরকলে। মরম অদুনা, তুংলমচৎকী থবক্কী মতাংদা মথৌ তাবা খ্বাইদগী মরুওইবা স্কিল ১০গী মতাংদা খন্নবা য়াবসিংদি।
মাইপাক্নবগীদমক মরুওইবা স্কীলশিং
ৱার্লদ ইকোনোমিক ফোরম অমসুং তোঙান-তোঙানবা রিসর্চরশিংনা ফোংদোকপগী মতুং ইন্না, মখাদা পীরিবা স্কিলশিং অসি এআইগী যুগতা খ্বাইদগী মথৌ তাবা ওইরগনি:-
১. অরুবা সমস্যাসিং কোকহনবা (কমপ্লেক্স প্রোব্লেম সোলভিং): এআইনা দেতা কয়া অমা প্রোসেস তৌবা ঙম্মবসু, অরুবা মখলগী সমস্যাশিংগী ৱারোইশিন পুরকপদা মীওইগী লৌশিং মথৌ তারকই। মসি ঐখোয়না কাচিন কোয়া কয়াবু খন্থদুনা অচুম্বা ৱারোইশিন পুরকপগী শক্তিদুনি।
২. ৱাখল খন্থবা (ক্রিতিকেল থিঙ্কিং): এআইনা পীরকপা ই-পাউ অদু চুম্ব্রা, লানব্রা হায়বদু খঙদোক্নবা অমসুং ময়েক শেংনা এনালাইজ তৌনবগীদমক ক্রিটিকেল থিঙ্কিং হায়বসি য়াম্না মরুওই। এআইগী পীরকলিবা পাউখুমশিং অদু থবক ওইনা চত্থদ্রৈঙাদা চপ চানা নৈনবগী শক্তি মথৌ তাই।
৩. শেম-শাজিনবগী মগুন (ক্রিয়েটিভিটি): মেসিনশিংনা মখোয়দা লৈরিবা দেতাদগী অনৌবা পোৎশক শেম্বা ঙম্লবসু, মীওইগী অশেংবা ক্রিয়েটিভিটি, অনৌবা আর্টকী পোৎশক, সাহিত্য অমসুং অনৌবা বিজিনেসকী মোদেলশিং পুথোকপগী শক্তিদি লৈতে হায়বা য়াই। মসিদি মীওইদা য়াওজবা খ্বাইদগী চাউবা শক্তিনি।
৪. লুচিংবা অমসুং সোসিয়েল ইন্ফ্লুএন্স (পিপল মেনেজমেন্ত এন্দ সোসিয়েল ইনফ্লুয়েন্স): মীওই কয়া অমবু অমত্তা ওইনা পুন্না লুচিংদুনা পান্দম অমা ফংনবা হোৎনবা, মোটিভেট তৌবা অমসুং ইমোস্নেল ওইনা মতেং পাংবসি মীওইবা খক্তা ঙমগদবা থবক ওইগনি।
৫. অতোপ্পশিংগা কোওর্ডিনেৎ তৌবা (কোর্দিনেটিং উইঠ আদর্স): টিম অমা ওইনা থবক তৌবা অমসুং মীওই কয়াগা পুন্না থবক তৌমিন্নবা হায়বসি এআইনা হৌজিক ফাওবদা ঙমদ্রিবা থৌওং অমনি।
৬. ইমোস্নেল ইন্টেলিজেন্স : মশাগী অমসুং অতোপ্পগী পুক্নিংগী ৱাখল ফাওবা ঙম্বা অমসুং মদুবু মেনেজ তৌবা হায়বসি মরী-মতা শেমগৎপদা অমসুং টিমৱার্কতা য়াম্না মরুওইবা অমনি।
৭. ৱায়েল অমসুং খন্থবা (জজমেন্ট এন্দ দিসিসন মেকিং): এআইগী মতেং লৌজরবসু, অরোইবদা এথিক্স অমসুং হ্যুমেন ভেল্যুশিংগী মতুং ইন্না অচুম্বা ৱারোইশিন পুথোকপসি মীওইগী থৌদাংনি।
৮. সর্ভিস ওরিএন্টেশন : অতোপ্পশিংগী অৱাবসিংবু খঙদুনা মখোয়বু মতেং পাংনবগীদমক হোৎনবা হায়বসি কস্তমর সর্ভিস অমসুং হেল্থকেয়রগুম্বা সেক্তরশিংদা য়াম্না মরুওই।
৯. নেগোসিয়েশন : মীওই অনীগী মরক্তা অফবা এগ্রিমেন্ট অমা পুরক্নবা হোৎনবা হায়বসি মীওইবগী সোফ্ট স্কিল অমনি অমসুং মসিনা বিজিনেস অমসুং ডিপ্লোমেসীদা চাউনা মতেং পাংই।
১০. কগ্নিটিভ ফ্লেক্সিবিলিটি: মতমগা চুননা অনৌবা কনসেপ্টশিং তম্বা, অহোংবা ফিবমশিংগা মান্ননা মশাবু ওন্থোকপা অমসুং তোঙান-তোঙানবা ৱাখল্লোনগী মনুংদা অথুবদা হোংদোক হোংজিন তৌবা ঙম্বা শক্তি অসি য়াম্নমক মরুওই।
👉 অতৈ পাউশিং: মণিপুরী থিয়েটরগী থৱানমীচাক, ওজা রতন থিয়াম লৈখিদ্রে
লমদমসিগী মীওইশিংনা করি তৌবা তায়?
এআইগী অহোংবা অসি শুপ্নগী অচৌবা শহরশিং নত্ত্রগা আইটি হবশিংদা খক্তা ওইগদবা নত্তে। বরাক তম্পাক্কী তোঙান তোঙানবা মফমসিংগী নহারোলশিং অমসুং প্রফেস্নেলশিংগী পুন্সিদসু মসিনা চাউনা শাফু পীরগনি। হৌজিক্তগী হৌনা নহারোলশিংনা মথক্তা পীরিবা স্কিলশিং অসিদা মীৎয়েং থম্লবদি, মখোয়না মফম অসিদা লৈদুনা অনৌবা খুদোংচাবশিং অসি লৌবা ঙমগনি হায়বসি অচেৎপা থাজবনি।
খুদম ওইনা, মফম অসিগী লৌমীশিংনা এআই শীজিন্নদুনা মহৈ-মরোং হেনগৎহন্নবা অনৌবা পাম্বৈশিং খঙবা য়াগনি, অদুবু মখোয়গী ক্রিয়েটিভিটি অমসুং প্রোব্লেম-সোলভিং স্কিল শীজিন্নদুনা মফম অসিগী ফিবমগা চুনবা পাম্বৈ শেমগৎপা য়াই। মফমগী শেন্মীৎলোন ফগৎহন্নবা অনৌবা বিজিনেস মোডেলশিং পুথোকপা, এজুকেসন সেক্তরদা অনৌবা মওংদা মহৈরোইশিংবু মহৈ তম্বা, অমসুং হেল্থকেয়র ফেসিলিতীশিং ফগৎহন্নবগীদমক স্কিলশিং অসি য়াম্না মরুওই।
ঐখোয়গী নহারোলশিংনা টেকনোলোজীগী অহোংবা অসিবু খুদোংচাবা অমা ওইনা লৌগদবনি। সরকারগী স্কুলশিং অমসুং কলেজশিংনা ভোকেস্নেল ট্রেনিংগী মথক্তা ক্রিটিকেল থিংকিং অমসুং প্রোব্লেম সোলভিংগুম্বা স্কিলশিং অসিদা মীৎয়েং থম্লবদি, ঐখোয়গী নহারোলশিংনা মালেমগী থাক্তা পুন্না চৎমিন্নবগী খুদোং চাবা লৈগনি।
অরোইবদা পনজনিংবদি, এআইগী মতম অসি মীওইবা ঐখোয়গীদমক শীংনবা অমা ওইজরবসু, মসিনা মীওইবগী অশেংবা মগুনশিংবু হেন্না মমল লৈহনবগী তাঞ্জা অমা পীরি। মেসিনশিংনা তৌবা ঙমদবা, মীওই খক্তানা ঙমগদবা স্কিলশিং অসি লৈরবদি, ঐখোয়না তুংলমচৎকী অহোংবা খুদিংমক্কীদমক শেম-শাবা ওইরগনি। ঐখোয়গী মীৎমাংদা থোরক্লিবা অৱাবসিংবু কোকহনবা অমসুং হেন্না ফবা মালেম অমা শেম্নবগীদমক এআই অসিবু শক্তি লৈবা খুৎলাই অমা ওইনা শীজিন্নগদবনি।
✍️ Published by Lakhipuronline
