মণিপুরী থিয়েটরগী থৱানমীচাক, ওজা রতন থিয়াম লৈখিদ্রে

লখিপুরওনলাইন নিউজ দেস্ক, জুলাই ২৩, ২০২৫ঃ

মণিপুরগী থিয়েটরগী ফীজং অমা ঙসি য়ুমশাকৈশা নুমিৎ, জুলাই ২৩, ২০২৫ গী অঙনবা অয়ুকতা মতম চুপ্পগী ওইনা থিংজিনখ্রে। ভারতকী থিয়েটরবু মালেমগী থাক্তা অনৌবা মওংদা পুখৎপীখিবা, থিয়েটরবু "দৃশ্য কাব্য" (visual poetry) অমা ওইনা শেমগৎপীখিবা ওজা রতন থিয়াম ঙসি ইখঙ খঙহৌদনা ইম্ফালগী রিমসতা লৈখিদ্রে । মশাগী চহী ৭৭ শুখ্রে।

কলাগী ইমুংদগী হৌরকখি

জনুৱারী ২০, ১৯৪৮দা নবদ্বীপতা পোক্লবসু, রতন থিয়াম ইম্ফালগী হাওবম দেৱান লৈকায়দা চাউরকখি। মহাক অসি কলাগী ইমুং অমদগী হৌরকখি—মপাবুং মণিপুরী ক্লাসিকেল ডান্সকী ইকায়খুমনরবা গুরু থিয়াম তরুণকুমার নি অমসুং মমানা মশক নাইরবা জগোই শাবী বিলাসিনি দেবীনি। অদুবু অঙাং ওইরিঙৈদা, মহাক্না পরফোর্মিং আর্টপু পাম্লমদে, অদুবু মতুংদা থিয়েটরদা থৱাই কত্থোকখিবা মীশক অমা ওইখি। ১৯৭৪দা নেস্নেল স্কুল ওফ ড্রামা (NSD)দগী গ্রেজুয়েট লোয়শিনখি।

👉 মরী লৈনবা পাউ: ইসরোগী অস্ত্রোনট শুভ্রাংশু শুক্লানা পুৱারী ওইরবা Axiom-4 মিশনগী পাইলট ওইদুনা International Space Stationদা চৎকনি

কোরস রিপর্টরি থিয়েটর:

এপ্রিল ১, ১৯৭৬দা রতন থিয়ামনা ইম্ফালদা কোরস রিপর্টরি থিয়েটর (Chorus Repertory Theatre) লিংখৎখি । মসিদা ফমফম ২০০ চনবা মশাগী থিয়েটর, "দ শ্রাইন" (The Shrine) হায়বা অদু শেমগৎখি । মণিপুরগী চীরবা ফিভম, লান অমসুং জাতিগী চৈথেংগী মরক্তা, কোরস রিপর্টরি থিয়েটরনা অপুনবগী অমসুং থৌনাগী খুদম অমা ওইনা লেপ্লমখি।

👉 মরী লৈনবা পাউ: ভারতনা এ.আই. শিজিন্নদুনা অনা লাইয়েংগী জ্ঞান দিজিতেলাইজ তৌদুনা থমলগনি

থিয়েটরগী লোল: 'থিয়েটর ওফ রুটস্' অমসুং 'কম্পোজিট এক্টর'

রতন থিয়ামগী দাইরেকসনগী মওং অসি "থিয়েটর ওফ রুটস্" ইহৌগী মরুওইবা শরুক অমনি। মহাক্না নাট্যশাস্ত্রগী শক্তম, মণিপুরী থাং-তা অমসুং নত সংকীর্তনগী ফজবা, অমসুং জাপানগী নোহ থিয়েটর অমসুং গ্রীক ড্রামাগুম্বা মালেমগী মওংশিংবু পুনশিনখি। মহাক্না শেমগৎখিবা এক্টরশিংবু "কম্পোজিট এক্টর" ওইনা খঙনৈ, মরমদি মখোয়বু জগোই, এক্টিং, মার্সিয়েল আর্টস (থাং-তা), অমসুং দিজাইনগুম্বা কয়াগী লমদা ত্রেনিং পীবিরমখি।

মহাক্কী মশক নাইরবা থবকশিং

মহাক্কী নাটকশিং অসি থিয়েটরদা শেমগৎলবা লাই অমগুম্বনি, মসিগী মনুংদা খরদি:

চক্রব্যূহ (১৯৮৪): মসি মহাক্কী খ্বাইদগী মশক নাইরবা পোলিটিকেল নাটক অমনি। মহাভারতকী ৱারী শিজিন্নদুনা, মসিগী নাটক অসিনা মণিপুরগী নহাশিংনা লান অমসুং চৈথেংগী লৈরিবা ফিভম অদু উৎখি। অভিমন্যু অসি শক্তি লৈবা মীওইশিংনা মশাগী কান্ননবগীদমক কত্থোকখিবা নহা অমগী খুদম ওইনা উৎলি।
ঊরুভঙ্গম : ভাসাগী সংস্কৃত নাটকপু শিজিন্নদুনা শেমগৎখিবা প্রোডাক্সন অসি পুকনিং নুংশিহনবা ভিজুএল অমনি। মসিদা মণিপুরী ফিজোল, জগোইগী মওং অমসুং থাং-তা শিজিন্নদুনা তোপ-তোপ্পা মওং অমা পুথোকখি। মসিগী নাটক অসিনা দাইরেক্তর পিতর ব্রুক অঙকপা ফাওহনখি।
নাইন হিলস্ ওয়ান ভেলী: মসি মহাক্না মশাগী লৈবাক্কীদমক্তা কৎলবা শৈরেং অমগুম্বনি। মসিগী নাটক অসিনা লাননা মরম ওইরগা মাঙহল্লবা মণিপুরগী অৱাবগী ফিভম অদু উৎলি অমসুং শান্তি অমুক হন্না পুরক্নবা ৱাকৎ অমা ফোঙদোকই।

পদ্মশ্রী মনা ফাওবা হন্দোকখি

২০০১দা, রতন থিয়ামনা মহাক্কী পুন্সিগী খ্বাইদগী চাউরবা ৱারেপ অমা লৌখৎখি। মহাক্না ভারত সরকারনা মঙোন্দা পীরকখিবা পদ্মশ্রী মনা অদু হন্দোকখি। মসি কেন্দ্র সরকারনা নাগালেন্দগী সিজফায়ারগী থৌরাংশিংবু মণিপুরদা শাংদোক্নবা হোৎনরকখিবা অমসুং মনিপুরদা থোকখিবা অশি অনাগী চৈথেং কয়া অদু উবদা, মহাক্না থম্মোয় শোক্লদুনা মনা অদু হন্দোক্নবা ৱারেপ লৌখি।

মালেমনা উৎলবা ইকায়খুম্নবসিংঃ

ওজা রতন থিয়ামনা মহাক্কী পুন্সিদা লৈবাক অমসুং মালেমগী থাক্তা মানা কয়া লৌখি। মসিগী মনুংদা মরুওইবা খরা মখাদা পীরি:

মানা (Award)	পীখিবা লূপ / লৈবাক (Institution / Country)	চহি (Year)
পদ্মশ্রী (Padma Shri)	ভারত লৈঙাক (Government of India)	1989
সঙ্গীত নাটক একাদেমী ফেলোশিপ (Sangeet Natak Akademi Fellowship)	সঙ্গীত নাটক একাদেমী, ভারত	2012
সঙ্গীত নাটক একাদেমী মনা (Sangeet Natak Akademi Award)	সঙ্গীত নাটক একাদেমী, ভারত	1987
ফ্রিঞ্জ ফার্স্টস্ মনা (Fringe Firsts Award)	এডিনবরা থিয়েটর ফেষ্টিভল, UK	1987
কালিদাস সম্মান (Kalidas Samman)	মধ্য প্রদেশ সরকার, ভারত	2005
ইন্দো-গ্রীক ফ্রেন্ডশিপ মনা (Indo-Greek Friendship Award)	গ্রীস (Greece)	1984
ভরত মুনি সম্মান (Bharat Muni Samman)	ভারত	2011
অনরারী ডি.লিট (Honorary D.Litt)	আসাম ইউনিভার্সিতি, শিলচর	2013

Source: Compiled from various reports.

মুৎনাইদ্রবা খুদোলনি

ওজা রতন থিয়ামগী মুৎনাইদ্রবা খুদোলসিং অসি মহাক্কী নাটকশিংদা নত্তনা, মহাক্না শেমগৎলম্বা কোরস রিপর্টরি থিয়েটরদা লৈরি। মহাক্না মণিপুরী সংস্কৃতীবু মালেমগী থাক্তা পুখৎতুনা, অৱাং নোংপোক ভারতকী অপিকপা রাজ্য অম ওইরিবা মনিপুরবু মালেমগী সংস্কৃতীগী মেপতা মশক খঙহনখিবা শকনাইরবা দাইরেক্তর অমনি রতন থিয়াম। মণিপুরগী হান্নগী মুখ্য মন্ত্রী নোংথোম্বম বীরেন না মহাক্কী এক্স তা থমোয় শোক্না নুঙায়তবা ফোঙদোকলি।

It is with deep sorrow that I express my heartfelt condolences on the passing of Shri Ratan Thiyam, a true luminary of Indian theatre and an esteemed son of Manipur. His unwavering dedication to his craft, his vision, and his love for Manipuri culture enriched not only the world… pic.twitter.com/20ZbKwGdZL
— N. Biren Singh (@NBirenSingh) July 23, 2025