মণিপুরী সাহিত্য পরিষদ, অসামগী খা সোনাই মছানা শিন্দুনা কাছারগী ঝরাগুল কৈথেলদা "তরাম্না ওকপগী থৌরম" অমা মাইপাক্না পাঙথোকখ্রে। থৌরম অসিগী মরুওইবা পান্দমদি মশক নাইবা মহৈরোইশিংবু ইকাই খুম্নবা উৎপা অমসুং পুক্নিং থৌগৎপনি।
থৌরম অসি ঙসি অয়ুক পুং ৯ তাবদা পরিষদকী খআ সোনাই মছাগী প্রেসিডেন্ট ময়েংবম ঙৌবা সিংহ না পরিষদকী ফিরাল চিংখৎপীদুনা হৌদোকখি। লোইননা, লৈখিদ্রবা পরিষদকী লুচিংবশিংগী মফমদা ইকাই খুম্নবা উৎতুনা লৈ-শু কৎখি।
থৌরমগী মরুওইবা মীফম
থৌরম অসিগী মীফমদা খা সোনাই মছাগী প্রেসিডেন্ট ময়েংবম ঙৌবা সিংহনা মীফম মপু, মণিপুরী সাহিত্য পরিষদ, অসামগী ভাইস প্রেসিডেন্ট ড০ হৌরংবম রাজমণি সিংহনা অথোইবা মীথুং অমসুং পরিষদকী কাছার জিলা কমিটীগী প্রেসিডেন্ট ৱাই. প্রফুল্ল সিংহনা অখন্নবা মীথুং ওইদুনা শরুক য়াখি। খা সোনাই মছাগী জেনেরেল সেক্রেটরী ক্ষেত্রিময়ুম মাণিকচান্দনা থৌরমগী মতাংদা মরুওইবা ৱাফমশিং ফোঙদোকখি।
👉 অতৈ পাউশিং: মণিপুরী থিয়েটরগী থৱানমীচাক, ওজা রতন থিয়াম লৈখিদ্রে
মৈহৈরোইশিংবু ইকাই খুম্নবা অমসুং পুক্নিং থৌগৎপা
থৌরম অসিগী মনুং চন্না HSLC দগীনা ইউনিভার্সিতিগী থাক্তা মশক নাইনা মায়পাকখিবা মৈহৈরোইশিংবু শেলগী মনা, সার্টিফিকেট অমসুং লেংয়ানফী তমদুনা ইকাই খুম্নবা উৎখি। মসিনা মখোয়গী তুংগী পুন্সিদা হেন্না মাই পাক্নবগীদমক অচৌবা থৌনা অমা ওইরগনি হায়না আশা তৌরি।
অখন্ননা, ঝারগুল এম.ই স্কুলগী এসিষ্টেন্ট টিচর ওইরিবা ইরোম ওংবি নিভারানীনা ঝরাগুল, থাংজমলৈকাই, মঙ্গলপুর, গরগোরি পার অমসুং ধামাই হায়রিবা খুঙ্গং ৫গী মেত্রিক পরীক্ষাদা মকোক থোংনা মায়পাক্লকখিবা মহৈরোইশিংদা মথং শিৎনা লুপা ১৫০০/-, লুপা ১০০০/- অমসুং লুপা ৫০০/-গী শেলগী মনা খুৎশিন্নখি।
👉 অতৈ পাউশিং: ইসরোগী অস্ত্রোনট শুভ্রাংশু শুক্লানা পুৱারী ওইরবা Axiom-4 মিশনগী পাইলট ওইদুনা International Space Stationদা চৎকনি
থৌরমগী মসিগী মরুওইবা
সোনাই লমদমগীদমক্তা অসিগুম্বা থৌরমশিং অসিনা লমদমসিগী অঙাংশিংদা মহৈ মশিংদা পুক্নিং থৌগৎপদা অচৌবা থৌদাং লৌগনি। "পরিষদনা মফমসিদা অঙাংশিংগীদমক অসিগুম্বা থৌরমশিং পাঙথোকপসিনা মখোয়বু হেন্না পুক্নিং থৌগৎপদা অচৌবা মতেং ওইরগনি। মসিনা মখোয়গী তুংগী পুন্সিদা মাই পাক্নবা অচৌবা থৌনা অমা হাপ্লগনি।" হায়বনচিংবা ৱাফমসিং তীনখিবা মীয়ামনা ফোঙদোক্নখি।
অথোইবা মীথুং ওইনা শরুক য়াখিবা ড০ হাওরোংবম রাজমণিনা মহাক্কী ওইবা ৱারোলদা হায়খি, "ঙসিগী নহা ওইরিবা মহৈরোইশিং অসি তুংগী সমাজকী য়ুম্বীনি। মখোয়না লাইরিক তম্বদা পুক্নিং চংবগা লোইননা ঐখোয়গী ইমা লোন, সাহিত্য অমসুং কলা-সংস্কৃতীশিংবু ঙাক শেনবগী থৌদাং লৌগদবনি। মণিপুরী সাহিত্য পরিষদনা অসিগুম্বা পুক্নিং থৌগৎপগী থৌরম শিনবসি য়াম্না থাগৎনীংঙাইনি। মনা ফংলবা মহৈরোইশিংনা মখোয়গী পান্দম ফংনবা অহিং-নুংথিল নাইদনা হোৎনগদবনি অমসুং সমাজগী ওইবা থবকশিংদসু শরুক য়াগদবনি।" থৌরমদুদা শরুক য়াখিবা খুঙ্গংগী অহল-লমনশিং অমসুং মমা-মপাসিংনসু থৌরম অসিগী মতাংদা হরাও তয়াম্বা ফোংদোকখি। মখোয়না হায়খি মদুদি মসিগুম্বা থৌরমশিং অসিনা অতৈ মহৈরোইশিংদসু পুক্নিং থৌনা হাপতুনা মহৈ মশিংদা হেন্না পুক্নিং চংহনবদা অচৌবা মতেং ওইগনি। খা সোনাই মছানা মখা তানা লমদমসিগী মহৈরোইশিংগীদমক অসিগুম্বা থবকশিং পাংথোক্লক্কনি হায়না মীয়াম্না আশা তৌরি।
অৱাবা ফোঙদোকপা
থৌরম লোইশিল্লকপদা, মণিপুরগী লৈখিদ্রবা শক্নাইরবা পোৎশংবম সুনামণি, পদ্মশ্রী রতন থিয়াম অমসুং চান্দপুর সোনাই, কাছারগী সোসিয়েল ৱার্কর অমসুং এজুকেসন ডিপার্টমেন্টগী ASI ওইরম্বা লাইশ্রম বাবাতোন, লৈখিদ্রবা শক্নাইরবা অহুমগী থৱাইনা লাইরমলেন্দা ইংনা চিক্না লৈরুনবা মিনিট অমা তুমিন্না লৈদুনা ইকাই খুম্নবা উৎখি।
অরোইবদা, মছা লোইশঙ অসিগী মেম্বর দেবাশিসনা থাগৎ ৱাহৈ পীদুনা থৌরম অদু মাইপাক্না লোইশিনখি।
✍️ Published by Lakhipuronline Team
