বাস ভারা পীবাফাওবা ঙমজরমদবা অমনা লুপা ক্রোর ১০৭গী ওফর করিগী লৌখিদবনো? খান স্যারগী পুক্নিং থৌগৎনিংঙাই ওইরবা পুন্সি ৱারী
অৱাবা মতমশিং অমসুং পুক্নিং থৌগৎপা
খান স্যারগী অহানবা পুন্সি নুঙাইবা হায়বদু ওইখিদে। লাইর অনংগী অৱাবা কয়া মায়োক্নখি। মহাক্না মহৈরোই ওইরিঙৈদা, স্কুল চৎনবগী বাসকী ভারা পীনবা শেল লৈতবনা ক্লাস কয়া তোকপা তাখি। মহাক্কী অৱাব চৈথেংশিং অসিনা মহাকপু হেন্না থৌনা হাপকৎখি। ইকুই কুইদনা কোচিং সেন্তর অমা হৌদোকখি, অদুবু মফম অদুদা বোম পোকখাইখিবগী থৌদোক অমনা মরম ওইদুনা মহৈরোইশিং লাকপা তোকখিদুনা সেন্তর অদু থিংজিনবা তাখি। অদুবু মসিগুম্বা কয়াগী মতুংদসু মহাক্না থাজবা কৈদৌনুংদা থাদোকখিদে।
কোবিদ-১৯ অমসুং ইউটিউব
কোবিদ-১৯ গী লাইচৎনা মরম ওইদুনা চৎথোক চৎশিন পুম্নমক থিংজিনখিবা মতমদা, খান স্যারনা দিজিতেলগী লম্বীদা খোঙ থাংজিনখি। মহাক্না "খান জিএস রিসর্চ সেন্তর" হায়না মিং থোনবা ইউটিউব চেনেল অমা হৌদোকখি। মহাক্কী ময়েক শেংনা তম্বীবা অমসুং মীয়ামগী পুক্নিং চিংশিনদুনা তম্বীবগী মওং মতৌনা মহাক মতম খরতগী মনুংদা মমিং চৎপা হৌরকখি। মহাক্কী তম্বীবগী মওংদা, লোন্দা-পুদাদা বিহারী এক্সেন্ট অমসুং খুদম কয়া শীজিন্নদুনা তম্বীবগী মওং অসিনা ভারতকী শহর অমসুং খুঙ্গংগী মহৈরোইশিংগী থমোয়বু খুদুম চনখি।
মহাক্কী পান্দমদি লায়রবা মহৈরোইশিংদা খ্বাইদগী হোংবা মমলদা মহৈগী মঙাল পীবনি। মহাক্কী অনলাইন ক্লাসশিংগী মমল অসি লুপা ২০০/৩০০দগী হেন্না লৈবা থেংনদে, মসিনা মরম ওইদুনা লায়রবা ইমুংগী মহৈরোইশিংনসু মগুন লৈবা মহৈ ফংবা ঙম্লি।
👉 অতৈসু পাবিউ: ডাইবেটিস: মসিগী মরমদা খঙজিনবা অমসুং হন্দকতা ইনৌ নৌনা শকখঙদোক্লবা টাইপ ৫ ডাইবেটিস
লুপা করোর ১০৭কী অচৌবা ওফর
খান স্যারগী মমিং চৎলকপগা লোয়ননা, ভারতকী খ্বাইদগী চাউবা এড-টেক কম্পেনী অমনা মহাকপু মখোয়গী প্লেটফোর্মদা পুশিন্নবগীদমক লুপা করোর ১০৭গী অচৌবা ওফর অমা পীখি। অদুবু, খান স্যারনা ওফর অসি য়াখিদে। মহাক্না হায়খি, "ঐহাক শেল তান্নবা লাকপা নত্তে। ঐগী পান্দমদি ঐখোয়গী খুন্নাইগী খ্বাইদগী লায়রবা মহৈরোইশিংদা মগুন লৈবা মহৈ পীদুনা মখোয়বু মায় পাকহনবনি। ঐহাক্না অসুম য়াম্বা শেনফম অসি লৌদুনা করি তৌনরুগনি?"
বিহারগী জিলা খুদিংমক্তা হকশেলগী অচৌবা থৌরাং
থৌরাং অসিগী মখাদা মহাক্না অনাবা মীওইশিংগীদমক অরীকপা মমলদা অনা লায়েং ফংহনবগীদমক বিহারদা দাইলাইসিস সেন্টারশিং লিংখৎকদৌরি। মসিগীদমক মচাক-মথুমশিংনা জর্মানদগী পুশিল্লক্নবা ওর্দর তৌখ্রে। মসিনা মীওই কয়া অমা অনা-লাইয়েংগীদমক লন-থুম য়োল্লগা অচৌবা শহরশিংদা চৎপগী অৱাবসু কোকহনবা ঙম্লগনি।
মসিগী মথক্তা, জিলা খুদিংমক্তা অনৌবা মখলগী ব্লাড-ব্যাংকসু লিংখৎকনি হায়রি, মসিগী খুৎলাইশিংনা জাপানদগী পুশিল্লক্কনি হায়রি। ব্লাড-ব্যাংক কী থবক অসি লাক্লিবা নবরাত্রিদা হৌদোক্নবগী থৌরাং তৌরি।
বরাক তম্পাক্কী মীওইশিংগীদমক মসিনা করি মরুওইবগে?
খান স্যারগী পুন্সি ৱারী অসিনা বরাক তম্পাক নচিংবা লমদমসিগী মহৈরোই অমসুং মমা-মপাশিংগীদমক অচৌবা ইথিল অমনি। মফম অসিগী মহৈরোই কয়ানা কোটা, দিল্লী, নৎত্রগা গুৱাহাটীগুম্বা শহরশিংদা কোচিংগীদমক চৎলি অমসুং মসিগীদমক লুপা লাখ কয়া চাদিং তৌরি। লমদম অসিদসু খান স্যারগুম্বা ওজাশিং থোরকতুনা অৱাং থাক্কী মহৈ মশিং খ্বাইদগী হোংবা মমলদা য়ুমদা ফমদুনা ফংবা য়ারবনি। মসিনা ঐখোয়গী মফম অসিগী মীওইশিংসু শেল তানবা হেনগৎহনবগা লোয়ননা মফমসিগী মহৈরোয় কয়া মালেমগী থাক্তা চাংদম্নবা ঙমহনগনি হায়ব থাজবা থমলি।
👉 অতৈসু পাবিউ: ইসরোগী অস্ত্রোনট শুভ্রাংশু শুক্লানা পুৱারী ওইরবা Axiom-4 মিশনগী পাইলট ওইদুনা International Space Stationদা চৎকনি
"চাউরবা শহরশিংদা চৎতুনা কোচিং লৌনবগীদমক ঐখোয়না লুপা লাখ কয়া চাদিং তৌরি। অদুবু খান স্যারগুম্বা ওজাশিং মফম অসিদসু থোরক্লবদি, ঐখোয়গী অঙাংসিং য়ুমদা ফমদুনা খ্বাইদগী ফবা মখলগী মহৈ তম্বা ঙমগনি," হায়না গার্জিয়ান অমনা ফোঙদোরকলি।
অরোইবদা
খান স্যারগী পুন্সি ৱারী অসিনা ঐখোয়দা তম্বীরিবদি, অচেৎপা ৱাখল অমসুং মীয়ামগীদমক থবক তৌবগী অপাম্বা লৈরগদি সোয়দনা মায় পাকপা ঙমগনি হায়বসিনি। মহাক্কী ৱারী অসিনা শেলদগী হেন্না মীওইবগী গুণনা মরুওইবগে হায়বগী অচৌবা খুদম অমনি অমসুং মীপুম খুদিংমক, মরুওইনা নহারোলশিংগীদমক পুক্নিং থৌগৎনিঙাই ওইরবা খোংচৎ অমনি।
✍️ Published by Lakhipuronline Team
