লখিপুরওনলাইন ডিজিতেল দেস্ক, নভেম্বর ২৩, ২০২৫: ঐখোয়গী সমাজদা অঙাং অমা পোকপা মতমদা মখোয়গী য়াইফনবা, ফত্তব লাই তীনদগী ঙাকথোক্নবা অমসুং মশা ফনা লৈনবা চৎনবী ওইনা পাংথোক্নৈ। মসিগী মনুংদা অঙাংগী মিৎতা ‘কাজল’ য়েকপগী চৎনবী অমা মমা-মপা অহল-লমন সিংনা থাজনবী মতুং ইননা হৌজিক মীওই কয়ানা কাজল থাবগী চৎনবী অসি পাঙথোক্নরি। অদুবু ঙসিগী সাইন্সকী মীৎয়েং অমসুং মিৎকী দাক্তরশিংনদি হায়রিবসিং অসিনা চৎনবী অসি ঙাকনবা হোৎনবদা ঐখোয়না ঐখোয়গী হৌরক্লিবা অঙাং অদুবু অচৌবা অমাংবা অমা থোকহল্লি হায়রি।
কাজল হায়বসি করিনো? মসিনা করি অমাংবা থোকহনবা য়াবগে?
ঐখোয়না য়ুমদা শেম্বা কাজল অসিনা কার্বোন নত্ত্রগা তেঙ্গালি নি হায়না লৌনৈ, অদুবু কৈথেলদা ফংলিবা ‘রেডিমেদ কাজল’ অয়াম্বদদি কেমিকেল কয়ামরুম য়াওরি। অখঙ অহৈশিংগী মতুং ইন্না, কৈথেলদা ফংলিবা কাজলদা লেদ হায়বদি মিসি অমসুং এন্তিমোনী য়াওবা য়াই। মসি অঙাংগী হকশেলগীদমক, মরুওইনা মখোয়গী মমিৎ অমসুং ব্রেন দা য়াম্না খুদোংথিনিংঙাই ওইবা য়াই।
য়ুমদা শেম্বা কাজলনা অঙাংগী মমিৎ মনুংদা চংবা মতমদা মিৎ নাবা নত্ত্রগা এলার্জী (Allergy) থোকহনবা য়াই।
কাজলগা মরী লৈনবা অরানবা ৱাখল্লোনশিং অমসুং অশেংবা ফেক্টসিং
অঙাংশিংদা কাজল থাবগী মতাংদা সমাজদা অরানবা ৱাখল্লোন কয়া লৈরি। মখোয়শিং অদুগী মনুংদা পনবা য়াবসিংদি:
১. অরানবা ৱাখল্লোন: কাজল থাবনা অঙাংগী মমিৎ ফজহনবদা মতেং পাংই।
অশেংবা: অঙাং অমগী মিৎকী সাইজ নত্ত্রগা মওং-মতৌ অসি মমা-মপাগী জিনগী মখা পোল্লি। কাজলনা মিৎকী মওং হোংদোকপা ঙমদে।
২. অরানবা ৱাখল্লোন: কাজলনা অঙাংবু নুমিৎকী অকনবা মঙাল অমসুং ইনফেক্সনদগী ঙাকথোকই।
অশেংবা: কাজলনা নুমিৎকী মঙালদগী ঙাকথোকপগী মগুন লৈতে। করিগুমবা কাজল অদুদা ফত্তবা মহীক লৈরম্লবদি, মসিনা ইনফেক্সন হেন্না থোকহনবা য়াই।
ইনফেকসনগী ওইথোকপা
কাজল থাবনা অঙাংগী মমিৎতা ‘কঞ্জংটিভাইটিস’ নত্ত্রগা মিৎ নাবা ফাওবা থোকহনবা য়াই। য়াম্না নৌরিবা অঙাংগী মিৎকী নর্ভ অমসুং টিস্যু সিং অসি য়াম্না শোল্লি খুৎ শেংদনা কাজল তৈবা মতমদা বেক্টেরিয়া না অঙাংগী মিৎতা অমাংবা থোকহনবা য়াই।
লৈবাক অসিগী দাক্তরশিংনা মতম কুইনদগী হায়দুনা লাকলিবা ৱাফমদি , "মিৎ অসি মমল য়াম্লবা লননি, চৎনবীগী মিংদা মসিদা মাং-তাকপা থোকহল্লোয়সি।"
ৱারোইশিন
চৎনবী হায়বসি ঐখোয়গী শক্তম্নি, অদুবু হকশেল হায়বসি পুন্সিরোলনি। চৎনবী ঙাকপনি হায়দুনা সাইন্স অমসুং দাক্তরগী পাউতাকপু তুংওইনবিগনু। অঙাংগী মিৎতা খুদোংথিবা অমা হেক্তা উবা ফংলবদি, য়ুমদা লায়েং চত্থবগী মহুত্তা অথুবা মতমদা মিৎকী দাক্তরগা তান্নবিয়ু।
"খঙজিনগদবা ৱাফম: ৱারেং অসি ই-পাউ খঙনবগীদমক খক্তনি। হকশেলগী তৌফম থোকপা খুদিংমক নত্ত্রগা লাইনা খঙদোকপগীদমক হীরমসিদা খঙহৈরবা প্রফেস্নেল অমদা তান্নবিয়ু।"
✍️ Published by Lakhipuronline
