দোলু-বরখলাদগী ZPC মীখলদা মীরেপ ওইরিবা শ্রী কঙ্কন নারায়ণ সিকদারবু বরাক ভেলী চেম্বর ওফ কমর্সনা মপুঙ ফানা শৌগৎখ্রে

লখিপুরওনলাইন ডিজিটেল ডেস্ক, ২০ এপ্রিল ২০২৫ঃ

আসামগী বরাক ভেলী চেম্বর ওফ কমর্সনা, দোলু-বরখলা কন্ষ্টিটুয়েন্সিদগী জিলা পরিষদ কাউন্সিল (ZPC) কেণ্ডিডেট ওইনা মীখলদা মীরেপ ওইরিবা শ্রী কঙ্কন নারায়ণ সিকদারবু মপুং ফানা শৌগৎখ্রে। শ্রী সিকদার হৌজিক চেম্বর অসিগী প্রেসিদেন্টনি অমসুং মহাক সিনিয়র BJP লুচিংবা অমসুং কাছার ডিষ্ট্রিক্ট BJP য়ুনিটকী ভাইস প্রেসিদেন্টসু ওইরি।

থৌনা ফবা অমসুং কত্থোকপগা লোয়ননা খূন্নাইগী সেবক অমা ওইনা শ্রী সিকদার না মীয়ামগী দমক লেপ্পা লৈতনা থবক তৌদুনা লাক্লি অমসুং লমদম অসিগী য়াইফ-থৌরাং অমদি চাওখৎনবগীদমক্তা অচৌবা থৌদাং লৌরি। মহাক্কী লুচিংবগী মগুন অমসুং কত্থোকপসিনা পোলিটিকেল অমসুং সোসিয়েলগী লমদা মীয়ামদগী অচৌবা ইকায়খুম্নবা ফংলি।

বরাক ভেলী চেম্বর ওফ কমর্সকী জেনরেল সেক্রেটরী, শ্রী ওক্রাম লক্ষী কান্ত সিংহনা দোলু, বরখলাগী ভোতরশিংদা মখোয়গী মমল য়াম্লবা ভোত শ্রী কঙ্কন নারায়ণ সিকদারদা হাপ্পিনবা হায়জখ্রে। মহাক্না ফোঙদোকখি মদুদি, শ্রী সিকদারবু জিলা পরিষদ কাউন্সিলর অমা ওইনা খনবনা কন্ষ্টিটুয়েন্সি অসিগী মীয়ামগীদমক্তা চাওখৎ-থৌরাংগী থবকশিং হেন্না পাকথোক চাউথোকহনগনি।

চীফ এডভাইসর বাসুদেব শর্ম্মা, এডভাইজর ক্ষেত্রিময়ুম উমানন্দ সিংহ, ৱার্কিং প্রেসিদেন্ট বিশ্বজিৎ শর্ম্মা অমসুং এসিষ্টেন্ট ফাইনান্স সেক্রেটরী মোতিলাল সিংহনা পুন্না মীয়ামদা শ্রী কঙ্কন নারায়ণ সিকদারবু মহাক্কী মংলান, পুকচেল শেংবা অমসুং মীয়ামগী সেবাদা লেপ্পা লৈতনা কত্থোকপা অসি শৌগৎনবা অমসুং ভোত পীননবা হায়জখ্রে।

অসমদা লাক্কদৌরিবা পঞ্চায়ৎ মীখল, ২০২৫

অসম রাজ্যগী মীয়াম্না ঙাইদুনা লৈরক্লিবা পঞ্চায়ৎ মীখল অসি রাজ্যগী জিলা ৩৪গী মনুংদা জিলা ২৭তা তাংকক অনি থোকনা পাঙথোক্কনি। অহানবা তাংকককী মীখল অসি মে ২, ২০২৫দা পাঙথোক্কনি অমসুং অনিশুবা তাংকককী মীখলনা মে ৭, ২০২৫দা পাঙথোক্কনি। মীখল অসিগী ভোট মসিংনা মে ১১, ২০২৫দা থীগনি হায়রি। 

মীখল অসি অকক্নবা মতমদগী থেংথরকপনি অদুবু দেলিমিটেশনগী থবক লোইশিল্লবা মতুংদা পাঙথোকপনি। মীখল অসিদা গ্রাম পঞ্চায়ৎকী মীহুৎ ২১,৯২০, অঞ্চলিক পঞ্চায়ৎকী মীহুৎ ২,১৯২, অমসুং জিলা পরিষদকী মীহুৎ ৩৯৭গীদমক মীয়াম্না মীহুৎ খনগনি। চাউরাক্না মীওই করোর ১.৮ হেনবনা মখোয়গী ভোত হাপ্পগী হক শীজিন্নগনি। রাজ্য সরকারনা মীখল পাঙথোকপা নুমিতশিং অসিদা মফমশিংদুদা ছুতি লাউথোকখ্রে।

পাউগী মতুং ইন্না, জিলা পরিষদকী মীহুৎ ৩৭ অমসুং অঞ্চলিক পঞ্চায়ৎকী মীহুৎ ২৮৮ য়াওনা মীহুৎ ৩৪৮দি মীখল তৌদনা মায় পাকখ্রে। মসিগী মনুংদা চাউরাক্না মীহুৎ ৩২৫দি লৈঙাক পাইরিবা এন.দি.এ.না ফংখি হায়রি। 

বিজেপি, কংগ্রেস, এজি.পি., এ.আই.য়ু.দি.এফ., অমসুং অহানবা ওইনা অসম জাতীয় পরিষদকুম্বা তোঙান-তোঙানবা পোলিতিকেল পার্তীশিংনা মীখল অসিদা শরুক য়ারি অমসুং মখোয়-মখোয়গী মীখলগী চেফোংশিং ফোঙদুনা মীখলগীদমক শেম-শাদুনা লৈনরি।