সিলচরদা পোলিং ওফিসর অমা হার্ট এটেক্তা লৈখিদ্রে
লখিপুরওনলাইন ডিজিটেল ডেস্ক, ১ মে ২০২৫ঃ
পঞ্চায়েত মীখলগা মরী লৈননা পোলিং স্টেশনদা চৎনবা থৌরাং তৌরম্বা পোলিং ওফিসর অমা সিলচরদা হার্ট এটেক্তা লৈখিদ্রে।
লৈখিদ্রবা মীওই অদু চহি ৫৫ রোম শুরে নুরুল হক চৌধুরি (খুকন) কৌই। মহাক সিলচরগী হাইলাকান্দি রোদতা লৈবা সুরানা মোটোর্সকী মনাক্তা লৈবনি।
পাউগী মতুং ইন্না হেল্থ ডিপার্টমেন্টতা রুরেল হেল্থ ইন্সপেক্টর ওইনা থবক তৌরম্বা নুরুল হক চৌধুরি হৌজিক চত্থরিবা পঞ্চায়ত মীখল অসিগীদমক সোনাইগী নাগদিরগ্রামদা লৈবা বুথ অমগী পোলিং ওফিসর ওইনা খনখিবনি।
ঙসি অয়ুক পুং ৪:৩০ রোম তাবদা, মহাক সিলচরগী রামনগরদা লৈবা আই.এস.বি.টি. দগী মীখলগী পোৎলম লৌনবা থৌরাং তৌরম্মী। অদুবু, মহাক খঙহৌদনা ময়ুমদা হার্ট এটেক ওইদুনা লৈখিদবনি হায়রি।
