মেনেজমেন্ত সোসাইতিগী চেয়ারমেন সিঐইচ মোহোন সিং (CH Mohon Singh) না চেয়ার লৌদূনা পাঙথোকখিবা মীফম অদুদা মেনেজমেন্ত সোসাইতিগী সেক্রেটরী কে বিরেন্দ্র, প্রিন্সিপাল জিতেন্দ্র প্রকাস দুবে, লোয়ননা ওজা সিঐইচ বিদিত কুমার, পি রাজেন্দ্র, তিঐইচ নলিনি কুমার, নচিংবা মীওইসিংনা শরুক য়াখি। মীফম অদুদা শরুক য়াখিবশিংনা লৈখিদ্রবা ওজা অসিনা হিংলিঙৈদা পাঙথোক্লম্বা থবক থৌরমসিং পল্লদুনা ৱা ঙাংখি। লৈখিদ্রবা ওজা অরাম্বম রাজমনিগী থৱায় মীরেলনা লাইরমলেন্দা ইংনা চীক্না লৈরুনবা মীনিত ২ তুমিন্ন লৈদুনা থৌনিজখি।
আরাম্বম রাজমনিগী মরমদা খরা
পনবা য়াই, সিঙ্গেরন্দ মনিংলৈকায়দগী আরাম্বম রাজমনি ইং ১৯৬৬ তা সিঙ্গেরবন্দ হায়স্কুলদগী ঐইচএসএলসি পাস তৌরগা ইং ১৯৭৮ দা জিসি কোলেজ সিলচরদগী বিএ পাস তৌখি। মতুংদা ইং ১৯৮০ দা গৌহাতি ইউনিভার্সিতিদগী এমএ পোলিতিকেল সাইন্স পাস তৌখি। ওজা অসি ইং ১৯৭০ গী অদুৱাইদা খরনি সিঙ্গেরবন্দ হায়স্কুলগী ওজা ওইরম্লগা অমুক ১৯৭২ জনুৱারীদগী স্কুল অসিগী এসিস্তেন্ত টিচর ওইনা চহী ২৭ রোম থবক পুরম্লগা ১৯৯৯ গী এপ্রিলগী তাং ১ দগী ২০১০ গী ফেব্রুৱারী ২৪ ফাওবা চহী ১১ রোম চুপ্না সিঙ্গেরবন্দ হায়স্কুল (Singerband High School) গী হেদমাস্তর ওইরম্লগা থবক্তগী পোত্থাখিবনি। মহাক হৌখিবা নভেম্বরগী ২২ থাংজা নুমিততা মসাগী অনাবা অমনা লৈখিদবনি। লৈখিদবা মতমদা মসাগী চহী ৭৮ সুখ্রে। মহাক্কী মচানুপী ২ ময়ানুপা ২ অমদি মশুসিং লৈহৌরি।
নহারোল খোরিরোল সিল্লুপ আসামনা অৱাবা ফোঙদোকখি
অমরোমদা, নহারোল খোরিরোল সিল্লুপ আসাম (Naharol Khorirol Sillup Assam) গী মতম অমগী মেম্বর ওইবিরম্বা অমদি সিঙ্গেরবন্দ হায়স্কুলগী পোত্থারবা হেদমাস্তর আরাম্বম রাজমনিনা লৈখিদবদা সিল্লুপকী থৌবুবসিংনা অৱাবা ফোঙদোকখ্রে। লুপ অসিগী মীহুত কাংবু অমনা হৌখিবা নিংথৌকাবা নুমিত্তা মসাগী য়ুম সিঙ্গেরবন্দ মনিঙ লৈকায়দা চত্তুনা ইমুং মনুংগী অৱাবদসু শরুক য়াখ্রে।
✍️ Published by Lakhipuronline
