১৮শুবা এসিয়ান গেমসতা শরুক য়ারিবা মণিপুরী শান্নরোইশিং

ফেন্সিংদা শরুক য়ারিবী কাছারদগী থৌদাম কবিতা দেবী

ইন্দোনেসিয়ানা য়ুম্বু ওইদুনা জাকার্তা অমসুং পালেম্বাংদা পাঙথোকলিবা ১৮শুবা এসিয়ান গেমস থাংজা নুমিৎ আগষ্টকী ১৮ ইন্দোনেসিয়াগী প্রেসিদেন্ট জোকো ৱিদোদো না চীঙলেমনা হৌদোকখ্রে। হৌদোকপগী থৌরম ভারতকী মতমদা নুংথিল পুং মঙা মখায়দা পাঙথোকখি। সেপ্তেম্বরগী ২ ফাওবা পাঙথোক্কদবা শান্নবা অসিদা কাছার জিলাগী লখিপুর সাবদিভিজনগী মনুং চনবদা লৈবা তলেনখুনদগী থৌদাম কবিতা দেবী ভারতকী ফেন্সিং তীমদা শরুক য়ারি। কবিতাগা লোয়ননা ভারত্তগী মশান্নসিদা শরুক য়াগদবশিংদি ইনা অরোরা, জসিরত সিং, জোতিকা দত্তনি। ফেন্সিংগী মপুঙ ওইবা শান্নবা আগস্টকী তাং ১৯ দগী ২৪ ফাওবা জাকার্তা কনভেন্সন সেন্টরদা চৎথগনি।

১৮শুবা এসিয়ান গেমস থাংজা নুমিৎ আগষ্টকী ১৮ ইন্দোনেসিয়াগী প্রেসিদেন্ট জোকো ৱিদোদো না চীঙলেমনা হৌদোকখিবা

আসামদগী পুন্না শান্নরোই তরুক হন্দক্কী এসিয়ান গেমস অসিদা শরুক য়ারি। মখোয়শিং অদুদি এথলেটিক্সতা হিমা দাস, বোক্সিংদা সিবা থাপা, বেদমিন্টনদা অসমিতা চালিহা, অর্চরিদা প্রমিলা দাইমারি, ফেন্সিংদা থৌদাম কবিতা দেবী, তাইকুন্দোদা রোদালি বরুৱা অমসুং বাসকেতবোলদা জোনালি দত্তনি। পনবা য়াই, হন্দক ফিনলেন্দদা চৎথখিবা আই.এ.এ.এফ. ৱার্লদ আন্দর টুয়েন্টি এথলেটিক্স চেম্পীয়নসিপতা আসামগী হিমা দাসনা মিটর ৪০০ গী লমজেন্দা শুপ্নতগী সেকেন্দ ৫১.৪৬ দা থুংদুনা সনাগী তকমান লৌরকপগা লোয়ননা এথলেটিক্সকী তাইবঙদা মালেমগী ওইবা মশান্নদা ভারতনা অহানবা সনাগী তকমান ফংবসু হিমা দাসনা ওইরে।

এসিয়াগী লৈবাক ৪৫দগী শান্নরোই লিশিং তরামাথোইরোমনা শরুক য়ারিবা শান্নবা অসিদা ভারতকী শান্নরোই ৫৭২না তোঙান তোঙানবা মশান্ন ৩৬তা অথোই অহেন তান্নবা য়াওরি। গেমস অসিদা মশান্ন ৪০গী ইভেন্ট ৬৭ পাঙথোক্কনি। অহানবা ওইনা হন্দক্কী এসিয়ান গেমস্ অসিদা মশান্ন ৮ নৌনা হাপচিল্লে। পনবা য়াই ২০১০দা গুৱাংজৌ এসিয়ান গেমসতা ভারতনা সনাগী তকমান ১৪গা লোয়ননা পুন্না তকমানা ৬৫ লৌখি। ২০১৪গী ইনচিওন এসিয়ান গেমসতা ভারতনা সনাগী তকমান ১১গা লোয়ননা পুন্না তকমান ৫৭ লৌবা ঙমখি।
ভারতকী ওইনা শরুক য়ারিবা শান্নরোইশিংগী মনুংদা আসামদগী মণিপুরী শান্নরোই অমগা লোয়ননা মণিপুরদগী মণিপুরী শান্নরোই নিফুতরুক শরুক য়ারি।  শান্নরোইশিং অদুদি -

দাইভিংদা কে রামানন্দ শর্মা, ত্রেক ইভেন্ততা এল সুর্জ, কেজি ৫১ বোক্সিংদা সর্জুবালা দেবী, কেনোইংদা লাইতোঞ্জম নাওচা অমসুং অরাম্বম চীংচীং, বোট রেসতা মোইরাংথেম কীরণ অমসুং হৈস্নাম ঙানবা মৈতৈ, স্প্রীন্ট তা ফাইরেম্বম সোনিয়া, লাইশ্রম মীনা দেবী অমসুং এম ইনাওচা দেবী, ট্রেদিসনেল বোট রেসতা তোইজম দিমিতা দেবী, ওইনাম য়াইফবী দেবী, সোইবম সুসিলা চনু অমসুং কোঞ্জেংবম সর্জু দেবী, সাইক্লিংদা অথোকপম বিকে, ময়াংলম্বম সোনালি চনু, তোংব্রম মোনোরোমা দেবী, এলাংবম চাওবা দেবী, ফেন্সিংদা থৌদাম কবিতা দেবী, জুদো দা টিঐইচ কল্পনা দেবী, মার্সিয়েল আর্ট তা নাওরেম বোইনাও, ৱুসুদা ময়াংলম্বম পুন্সিবা মৈতৈ, ময়াংলম্বম সুরজ, য়ুম্নাম সনাথোই দেবী, নাওরেম রোসিবিনা অমসুং লৈমাপোকপম সনাতোম্বী, সেপাকতাক্রৌদা খাঙেম্বম নিকেন, ৱাহেংবম হেনরি, য়ুম্নাম আকাশ, সোরোকখাইবম মালেমঙানবা, থোকচোম সৈতারাম, ৱাইখোম সানজেক, ঙাথেম জোতিন অমসুং গুরুময়ুম জিতেশ্বর শর্মা, সেপাকতাক্রৌ নুপীগীদা অয়েকপম মাইপাক দেবী, মুতুম অরুনা দেবী, ওইনাম চাওবা দেবী, য়াংলেম ঙাইথোই চনু, পঙম্বম লিন্থোইঙম্বী চনু অমসুং এলাংবম রোনিতা দেবী, ক্লাইম্বিংদা মাইবম চীংখৈঙানবা নি।

Pao sing asi ga loinana atei e-pao gi damak 

Lakhipuronline android app install toubiyu CLICK HERE