লখিপুরওনলাইন নিউজ দেস্ক, নভেম্বর ২৬, ২০২৫: কাছারগী বনতারাপুরদা লৈবা নেসনেল ইন্সতিত্যুৎ ওফ তাইকোন্দোনা শিন-লাঙদুনা ইন্সতিত্যুৎ অসিদা তম্লিবা শানরোইশিংগী বেল্ট প্রমোসন টেস্ট অমা মপুং ফানা পাঙথোকখ্রে। থৌরম অসি বনতারাপুর ওডিটোরিয়মদা হৌখিবা নভেম্বর ২৩, নোংমাইজিং নুমিত্তা পাঙথোকখিবনি।
থৌরমগী মপুং ওইবা শরুকশিং
পাউদম অসিগী মতুং ইন্না, বেল্ট প্রমোসন টেস্টকী থৌরম অসিদা হাওরোংবম অমরেন্দ্র (জ্যোতিষ সম্রাট) না প্রসিদেন্ট ওইনা শরুক য়াখি। অদুগা অখন্নবা মীথুংলেনশিং ওইনা ইউ আর ডি এস (URDS) কী প্রসিদেন্ট সিনাম মেঞ্জোর অমসুং নোংথাংলৈমা আর্ট এণ্ড কলচরগী প্রসিদেন্ট হাওরোংবম বিমল না শরুক য়াদুনা থৌরম অদু মপুং ফাহনখি।
জাতী থাক্কী চাংদম্নবদা মায়পাক্লবা শানরোইশিংবু ইকায়খুম্নবা উৎপা
থৌরম অসিদা, হৌখিবা সেপ্টেম্বর ২৮ দগী ৩০ ফাওবা উত্তরপ্রদেশকী আগ্রাদা পাঙথোকখিবা National Taekwondo Championship অমসুং ব্লেক বেল্ট প্রমোসনদা ইন্সতিত্যুৎ অসিগী শানরোইশিংনা গোল্ড মেদল অহুম, সিলভর মেদল অনি অমসুং ব্রোঞ্জ মেদল অমা, পুন্না মেদল তরুক লৌখিবা অদুবু ইকায়খুম্নবা উৎখি।
ব্লেক বেল্ট প্রমোসনদা মায়পাক্লবা শানরোই অহুম—য়েংখোম মেঞ্জোর (অপোকপগী মিং: য়েংখোম বুধনাথ), পি এইচ নিহার (অপোকপগী মিং: পি এইচ নিপেন), অমসুং এ অনুজ শর্মা (অপোকপগী মিং: এ অনিল শর্মা)— মখোয়বু থৌরম অদুদা সার্তিফিকেট অমসুং ব্লেক বেল্ট পীদুনা পুক্নিং থৌগৎখি।
ব্লেক বেল্ট ফংলক্লবা শান্নরোই অহুম অসিদা নেসনেল ইন্সতিত্যুৎ ওফ তাইকোন্দো বনতারাপুরগী ইনস্ট্রাক্টর মনোজ দেব না বেল্ট পুনবীদুনা থাগৎপা ফোঙদোকখি। লোইননা থৌরম অদুগী প্রসিদেন্ট হাওরোংবম অমরেন্দ্রনা ইনস্ট্রাক্টর মনোজ দেবপু মৈতৈ লৈরূম ফি য়ানবীদুনা ইকায়খুম্নবা উৎখি।
রাজ্যগী থাক্কী ত্রাইল সেলেক্সনদা মায়পাকপশিং
ইন্সতিত্যুৎ অসিগী ওর্গানাইজিং সেক্রেটরি সেনজম সুরচন্দ্রনা পাউদমলকপগী মতুং ইন্না, হৌখিবা অক্টোবর ২৬ তা ওল কাছার তাইকোন্দো এসোসিয়েসন্না শিন-লাঙদুনা পাঙথোকখিবা আসাম স্টেট তাইকোন্দোগী ত্রাইল সেলেক্সনদা নেসনেল ইন্সতিত্যুৎ ওফ তাইকোন্দো বনতারাপুরগী শানরোই ৫ না শরুক য়াখি।
মসিদা ইন্সতিত্যুৎ অসিগী শানরোইশিংনা গোল্ড মেদল ৪, সিলভর মেদল ২ অমসুং ব্রোঞ্জ মেদল ১, পুন্না মেদল ৭ ফংলকপা ঙমখি। মখোয় পুম্নমকপুসু থৌরম অসিদা সার্তিফিকেট পীদুনা ইকায়খুম্নবা উৎখি।
✍️ Published by Lakhipuronline
