শিন্তাকপুরেল আর কে সনাহলগী ১২০ শুবা মপোক কুমওন ঙরাং আসামগী লখিপুর, কামরাঙ্গা অমসুং শিবসাগর জিলাদসু পাঙথোক্নখি।

লখিপুর, কাছার, নভেম্বর ২০, ২০২০- শিন্তাকপুরেল আর কে সনাহলগী ১২০ শুবা মপোক কুমওন ঙরাং আসামগী লখিপুর, কামরাঙ্গা অমসুং শিবসাগর জিলাদসু পাঙথোক্নখি। আসাম থাং তা এসোসিয়েসন হেদ ক্বাটর কামরাঙ্গা কাছার আসামনা শিন্দুনা এসোসিয়েসন অসিগী থৌবুরেন উমাকান্ত শর্মাগী লুচিং মখাদা গুরু আর কে সনাহলগী চহী ১২০ শুবা মপোক কুমওন থৌরম পাঙথোকখ্রে। 

লখিপুর থাং-তা একাডেমী, লখিপুর খুমন আসামনা শিন্দুনা ঙরাং নভেম্বরগী তাং ১৯ শগোলশেন নুমিত্তা, লখিপুর খুমন ইপুথৌ থোংনাংগী কলচারেল হোলদা লৈখিদ্রবা শিন্তাকপুরেল আর কে সনাহলগী ১২০ শুবা মপোক কুমওন থৌরম অচম্বা মওংদা পাঙথোকখ্রে। লখিপুর খুমনগী সিনিয়র সিতিজেন ইঙুদম শতিসচন্দ্রনা মৈরা চুখৎতুনা নুমিৎসিগী থৌরম হৌদোকখি। থৌরমদা লখিপুর খুমন থাং-তা একাডেমীগী প্রেসিদেন্ট ঙারিয়াম্বম অশ্বিনিকুমার, কে রাজেশ্বর সিংহ অমসুং ইঙুদম সুনন গা লোয়ননা একাডেমী অসিগী অখন্নবা থাং-তাগী শান্নরোই শিংনা শরুক য়াখি।

শিন্তাকপুরেল আর কে সনাহলগী ১২০ শুবা মপোক কুমওন থৌরম ঙরাং ইম্ফাল ৱেস্তকী য়ুম্নাম হুইদ্রোম লৈকায়দা লৈবা থাং-তা শংলেন্দা পাঙথোকখি। মপোক থৌরম অসিগা মরী লৈননা ৱা ঙাংলদুনা হুয়েল লাংলোন থাং-তা এসোসিয়েসন মনিপুরগী প্রেসিদেন্ট হুইদ্রোম প্রেমকুমারনা ১৯৮৬ চহীদা লখিপুরদা লাকতুনা মতম অদুগী থাং-তাবু নুংশিবা নহারোলশিংনা গুরু অসিগী মখাদা তম্বা হৌখিবা অমসুং মথং মথং আসামগী মফম মফমদা থাং-তা অসি শন্দোকখিবগী ৱাফম কয়ামরুম থমখি। বৃটিশশিংনা থাং-তা তম্ববু থীংজিন্নবা হোৎনখিবা অমসুং কায়নথংদা ইনিংথৌ চুরাচান্দগী হাক্তক্তা ফমখিবা নিখিল মনিপুরী মহাসভাগী ৱারেপনা মহৈ অসি ফোংনা তম্বীবা হৌখিবগী মতাংদসু মহাক্না পনখি।  হৌজিকতি ভারতকী অমত্তা ঙাইরবা লুপ "থাং-তা ফেদরেসন অফ ইন্দিয়া" অমদি "ৱার্লদ থাং-তা ফেদরেসন" শেমখ্রে। ইন্দিয়ান ওলিম্পিক এসোসিয়েসনগী শকখঙ চেরোল ফংলে অমদি স্কুল গেম ফেদরেসন অফ ইন্দিয়া না থাং-তা বু মশক খঙবিদুনা ভারতকী তোঙান তোঙানবা রাজ্য শিংদা থাং-তা মহৈ তম্বা য়ারে। অসিতসু নত্তনা লৈবাক অসিগী ট্রেদিসনেল স্পোর্টস দিসিপ্লিন ১৪ খনগৎপদা থাং-তা অসিসু খেলো ইন্দিয়া স্কীমগী মখাদা ভারতকী মিনিস্ট্রি অফ্ য়ুথ এফিয়ার্স অমসুং স্পোর্টস্ না এপ্রুভ তৌরে। (Pao asi YouTube ta yengbiyu)