পাউনম গুনীন্দ্রগী "মনিপুরী কলচরদা মীৎয়েং অমা" অমসুং ডাঃ হাওরোংবম রাজমনিগী "অশম্বা ভারতকী কাব্য কাঙলোন" ফোঙখ্রে।

লখিপুরওনলাইন নিউজ দেস্কঃ

প্রোফেসার পাউনম গুনীন্দ্রগী "মনিপুরী কলচরদা মীৎয়েং অমা" অমসুং ডাঃ হাওরোংবম রাজমনিগী "অশম্বা ভারতকী কাব্য কাঙলোন" হায়না মীংথোনবা লাইরিক অনি অসি হৌখিবা ইরাই নুমিৎ নবেম্বরগী তাং ২০ শিলচরগী মোইরাংথেম গ্রাফিক্সকী অফিসতা ফোঙখ্রে। লাইরিক ফোংবগী থৌরম অসিদা কাছার কোলেজকী রিতায়ার্দ সিনিয়র লাইব্রেরীয়ান লাইশ্রম মংলেম্বা সিংহনা মীফম মপু ওইখি। অমসুং সাহিত্য় একাদেমী এৱার্দি ডাঃ নাওরেম বিদ্যাসাগরনা অথোইবা মীথুং ওইনা শরুক য়াখি। লাইরিক অনি অসিগা মরী লৈননা মশক তাকপা ওইনা কাছার কোলেজ শিলচরগী এসোসিয়েত প্রোফেসার চান্দম কমলা দেবী, মাধবচন্দ্র দাস কোলেজ সোনাইগী এসিস্তেন্ট প্রোফেসার ডাঃ মঙ্গলা লাইশ্রম অমসুং রাধামাধব কোলেজ শিলচরগী এসিস্টেন্ট প্রোফেসার চকপ্রম মণিকুমার সিং না ৱা ঙাংখি। অসিতসু নত্তনা বরাক তম্পাক্কী তোঙান তোঙান কোলেজতগী লাকপা ওজাশিংনা লাইরিক ফোঙবদা থেংনরিবা অৱাবা অমসুং হৌজিক্কী মতমসিদা মৈতৈ ময়েক তমদবা য়াদবগী মতাংদসু ৱাফম কয়ামরুম ফোঙদোক্নখি। লোইশিল্লকপদা মোইরাংথেম গ্রাফিক্সকী মপু মোইরাংথেম নন্দবাবু সিংনা ময়াম্বু থাগৎৱাহৈ পীবগা লোয়ননা নুমিৎসিগী থৌরম লোয়শিনখি।