ঙসি

ইমালোন কনবা খোঙজংগী শরুক অমা ওইনা মায়ফাগী ৭৫ শুবা কেম্পেইন মোরাগাংদা পাঙথোকখ্রে।

লখিপুর, কাছার, সেপ্তেম্বর ১৫, ২০২০ঃ  ইমালোন কনবা খোঙজংগী শরুক অমা ওইনা মনিপুরী য়ুথস্ ফ্রোন্ত অফ্ আসাম মায়ফাগী ৭৫ শুবা ইমালোনগী কেম্পেইন ঙরাং লখিপুর সাবদিবিজনগী মনুং চনবদা মোরাগাং খুনদা লৈবা খাদিজাতুল কুবরা মাদ্রাসা তুল বন্নতকী হোলদা পাঙথোকখি। কেম্পেইন অসি আন্জুমানে উলেমা-ই মনিপুরী আসাম, আসাম মনিপুরী মুসলিম য়ুথ ফ্রোন্ত অমসুং ওল আসাম মনিপুরী মুসলিম স্টুদেন্টস্ ইউনিওন না শিল্লাংখি। প্রেসিদেন্ট ওইনা মৌলুবী জিয়াউদ্দিন, মায়ফাগী প্রেসিদেন্ট সেরাম হেরাজিৎ, আমপালগী প্রেসিদেন্ট অহোংসাবম লিলি, ইমা সনাথোই, এমদিসিগী মেম্বর জমির অহম্মদ চৌধুরী, মোরাগাং তম্বাময়ুম মৈরা পায়বীগী প্রেসিদেন্ট নেনাতোম্বী বেগম, আসাম মনিপুরী মুসলিম য়ুথ ফ্রোন্তকী ফাউন্দর প্রেসিদেন্ট রেহন উদ্দিন অহম্মদ চৌধুরী নচিংবা মীওইশিংনা প্রেসিদিয়ামগী মেম্বর ওইখি। 


কেম্পেইনগী ৱাহৌদোক পীরদুনা মায়ফাগী প্রেসিদেন্ট সেরাম হেরাজিৎনা ইমালোন মান্নবা ঐখোয়না আসামদা মতম কয়াগী মমাংদগী খুন্দারকখিবনি হায়রদুনা ঙসিগী আসাম সরকারনা ঐখোয়বু মিরায়বীরকপসে তুমিন্না লৈথোকপগী মতম নত্রে ঐখোয়না ধর্মগী খেৎনবা থমদনা ইমা অমত্তগী মচানি খল্লগা ঐখোয়গী লোন আসাম সরকারগী এসোসিয়েত অফিসিয়েল লেঙ্গুয়েজ ওইহনগদবনি হায়বগী খোল্লাউ পুন্না লাউমিন্নবগী মতম য়ৌরে হায়খি। সিরাজ উদ্দিননা কেম্পেইন অসিনা ইমালোন মান্নবা ঐখোয় পুম্নমক অমত্তা ওইনা ইমালোনবু কন্ননবা অকনবা খোল্লাউ অমা লাউমিন্নসি হায়খি। জমির অহম্মদ চৌধুরীনা হন্দক্কী ইমালোন কনবগী মতাং অসিদা ঐখোয়গী অপুনবগী পাঙ্গল থৌনা উৎপগী মতম য়ৌরে হায়রদুনা মৈতৈ পাঙল ঐখোয়সু ইমালোনগী দমক থৱায় ফাওবা কত্থোক্কনি হায়খি।

Barak Tampak ki Khomjinba Pao 15 Sep 2020

নেনাতোম্বী বেগমনা ঐখোয় পাঙল মৈরা পায়বী ইমাশিংসু তুংগী মীরোলগী দমক মায়ফানা চঙশিল্লকলিবা খোংজং খুদিংমক্তা শরুক য়াগনি হায়খি। প্রেসিদেন্ট ওইরিবা মৌলানা জিয়াউদ্দিন না আসামদা খুন্দারিবা লোন মান্নবা ঐখোয়না ঐখোয়গী ইমালোন কলহৌদ্রবদি ঐখোয়সে নোংমদি মুৎখিগনি হায়বগী মীপায়বা ফাওই অদুনা ঐখোয়না ধর্মগী খেৎনবা থমদনা আসামদা মরাচেৎনা তুংগী মীরোলগী দমক ইমালোনবু কনবিরম্বা হায়বসি ঐখোয়গী চাউরবা থৌদাংনি হায়খি। আহমেদ চৌধুরীনা মনিপুরী লোনবু নুংশিবিরিবা ইচিন ইনাউ পুম্নমকনা থৱায় হকচাং য়াওনা শৌগৎপিদুনা ঐখোয়গী লোন অসি আসাম সরকারগী এসোসিয়েত অফিসিয়েল লেঙ্গুয়েজ ওইহন্নবগী খোংজং চংশিনসি হায়খি। মীফমদা পাঙলশিংগী মরক্তগী অখঙ অহৈশিং, মৈরাপায়বীশিংগা লোয়ননা নহারোল কয়ারোমসু শরুক য়াখি। অরোইবদা পোস্তর কেম্পেইন অমসু পাঙথোকখি। 

(অসিদা ক্লিক তৌবিদুনা পাউ অসি ইউতিউবতা য়েংবিউ)