মনিপুরী লোনগী মতাংদা লূপ কয়ানা পুন্দুনা পাঙথোকখিবা ৱাকৎ মীফমদা লখিপুর ফুলেরতল লম্বী পুং ১ হেন্না থীংজিল্লুরে।


লখিপুর, সেপ্তেম্বর ৯, ২০২০ঃ মনিপুরী লোন আসাম সরকারগী এসোসিয়েত অফিসিয়েল লেঙ্গুয়েজ ওইহনগদবনি হায়বগী দাবী তৌরদুনা তোঙান তোঙানবা লূপ কয়ামরুমনা পুল্লদুনা ঙরাং লখিপুর সাবদিবিজনগী মনুং চনবদা লৈবা ফুলেরতল কৈথেল মমাংদা ৱাকৎ মীফম অমা চৎথখ্রে। ইমালোন না য়াইফরে, লোং লিভ মনিপুরী লেঙ্গুয়েজ, মনিপুরী লোন আসামগী এসোসিয়েত অফিসিয়েল লেঙ্গুয়েজ ওইহনগদবনি হায়বগী খোলাওনা পুমনিন নিনখি। 
 নোং চুথরকলফাওবদা খোঙজংদা শরুক য়াখিবা মীয়াম অমত্তা কায়নখিদে। ৱাকৎ মীফম অদুগী লোয়শিল্লকপদা লখিপুর ফুলেরতল লম্বী পুং ১ হেন্না থীংজিনখি। খুদক্তা লখিপুর সাবদিবিজনগী মেজিস্ট্রেত নিকুঞ্জ দাস, এসিদিপিও সচীন্দ্র শর্মা অমসুং ওসি বিকে ছেত্রী গা লোয়ননা পুলিসকী মীওইশিং থৌদোকফমদা থুংলখি। ৱাকৎলোয়শিংগা ৱারী শান্নখিবগা লোয়ননা নুংথিলগী পুং ২ দা ৱাকৎ মীফম লোয়শিনখি। মনিপুরী লেঙ্গুয়েজ দিবলপমেন্তকী দমক্তা স্পিসিয়েল অফিসার অমা থম্বীনবগী ৱাকৎ অমগী মতাংদসু ঙসিগী মীফমনা দিমান্দ তৌখিবগী মতাংদসু সাবদিবিজনগী মাইগৈদগী অঙম্বা মতেঙ পাঙগে হায়বগী ৱাফম মেজিস্ত্রেত শ্রী দাসনা থাজবা পীরকখি। 
ৱুইমেন এক্সন কমিতি ফোর ভিলেজ প্রোতেক্সন লখিপুরনা শিল্লাংদুনা মনিপুরী য়ুথস্ ফ্রোন্ত অফ আসাম মায়ফাগী লুচিং মখাদা ওল আসাম মনিপুরী ৱূইমেন মৈরা পায়বী কোর্দিনেসন কমিতি, আসাম মনিপুরী মৈরা পায়বী অপুনবা লূপ আমপাল, আসাম মনিপুরী মুসলিম য়ুথ ফ্রোন্ত, ওল আসাম মনিপুরী মুসলিম স্টুদেন্টস্ ইউনিওন, মনিপুরী মুসলিম দেভলপমেন্ট ওর্গেনাইজেসন আসাম, নোংইন এনজিও, য়াইফ লীচিং ক্লাব অমসুং ইন্তিগ্রেতেদ মাদার্স এসোসিয়েসন চান্দম লৈকায় নচিংবা লুপশিংনা শরুক য়াখি।
 ৱাকৎ মীফম অদুদা রিতায়ার্দ জোইন্ত সেক্রেতরী কাঙবম শান্তিকুমার, মায়ফাগী প্রেসিদেন্ট সেরাম হেরাজিৎ, সোসিয়েল এক্টিভিস্ট দাঃ মাইমোম শান্তিকুমার, মায়ফাগী জেনরেল সেক্রেটরী অক্রম লখিকান্ত অমসুং ৱুইমেন এক্সন কমিতি ফোর ভিলেজ প্রোতেক্সন গী প্রেসিদেন্ট সুনিতা কোন্থৌজম অমসুং অতৈ অতৈ মরুওইবা মীওই কয়ানসু ৱা ঙাংখি।