লখিপুরওনলাইন, ৪ সেপ্তেম্বর ২০২০ঃ বরখোলাদা খুন্দারিবা মৈতৈ খুনশিংদা ঙরাং পোস্ত কার্দ কেম্পেইন চৎথখ্রে। মায়ফাগী বরখোলা অমসুং দোলু রামপুর ব্রাঞ্চনা শিন্দুনা পাঙথোকখিবা কেম্পেইন অসিগা লোয়ননা অতৈ তোঙান তোঙানবা মফমশিংদসু পোস্ত কার্দ কেম্পেইন চৎথখিবগী পাউ লাকলি। মনিপুরী লোনবু আসাম সরকারগী এসোসিয়েত অফিসিয়েল লেঙ্গুয়েজ ওইহনগদবনি, এপিএসসি সিসিই গী পরিক্ষাশিংদা মনিপুরী য়াওহনবিয়ু হায়বনচিংবগী ৱাকৎ য়াওবা চাওরাক্না পোস্তকার্দ ৩৮০ রোম সোনাই, উধারবন্দ, বরখোলা লখিপুর জয়পুর শিলচরনচিংবা মফমদগী মফম অদুগী পোস্ত অফিসশিংগী খুৎথাংদা চৎতুনা থাদনখি হায়রি।
লামারগ্রামগী ইমা চাউখৎলুপ মৈরা পায়বী লুপনসু মনিপুরী লোনগী ওইবা খোঙজং অসিগী শরুক অমা ওইনা ঙরাং পোস্ত কার্দ কেম্পেইন পাঙথোকখি। কেম্পেইন অদুদা মরুওইনা আসাম সরকারগী থবক চংবগী পরিক্ষাশিংদা মনিপুরী লোন য়াওহনবিউ, এপিএসসি নচিংবগী পরিক্ষাদা মনিপুরী লোনবু ক্বালিফায়িং সাবজেক্ত অমা ওইহনবিউ অমসুং মনিপুরী লোনবু আসাম সরকারগী এসোসিয়েত অফিসিয়েল লেঙ্গুয়েজ ওইহনবিউ হায়বনচিংবা য়াওবা বেনর অমা অমগা লোয়ননা লামারগ্রামগী ইমা চাউখৎলুপ মৈরা লুপকী প্রেসিদেন্ট হিজম ওংবী মলয়া অমসুং সেক্রেটরী থোকচোম ওংবী সাবিত্রি গা লোয়ননা লুপসিগী মীওই কয়ানা পোস্তকার্দ কেম্পেইন চৎথখি। লূপসিগী মীহুৎ কাংবুনা পোস্ত কার্দ ৭৫ রোম থাদখ্রে হায়রি। কেম্পেইন অসিগা মরী লৈননা সোসিয়েল এক্টিভিস্ট চীংশুবম নবকুমারনা ৱাফম খরা থমখি। (পাউ অসি লখিপুরওনলাইন ইউতিউব চেনেলদা য়েংবিউ)
