বিরজিত সিংহদা খুৎথারকখিবু য়ানিংদবা ফোঙদোক্লদুনা সেপ্তম্বর ৮ পুং ১২ গী ত্রিপুরা বন্দ কৌখ্রে।


আগরতলা, ৩ সেপ্তেম্বর ২০২০ঃ  ত্রিপুরা লৈঙাক্কী হান্নগী মিনিস্টর য়েলাম বিরজিত সিংহগী মথক্তা সকখঙদবা খরনা খুৎথারকখিবগী থৌদোকতা য়ানিংদবা ফোঙদোক্লদুনা কংগ্রেসগী ৱীং ১৭না খুৎশম্নদুনা লাক্লিবা সেপ্তেম্বরগী তাং ৮ পুং ১২ গী ত্রিপুরা বন্দ কৌখ্রে। পনবা য়াই, ত্রিপুরাগী রাজনিতিগী লমদা থৱানমিচাক্কুম ঙাল্লিবা অমসুং মতম শাংনা প্রদেশ কংগ্রেস প্রেসিদেন্ট ওইরম্বা এক্স মিনিস্টর য়েলাম বিরজিত সিংহগী মথক্তা শকখঙদবা মীওই খরনা হৌখিবা আগস্ট ২৫ দা আগরতলাদগী কৈলাসহর চৎপগী লম্বী জিরানিয়াদা বিরজিত সিংহ অমসুং মহাক্কী এস্কোর্তকী মথক্তা অতম্ননা খুৎথাখিবনি হায়রি। থৌদোকসিগা মরী লৈননা ঙরাং নুংথিল ত্রিপুরাগী উনাকোতি জিলাগী মনুং চনবা কৈলাসহর মনিপুরী খুন্নাইনা পেন্দবা ফোঙদোকখ্রে। কৈলাসহর পায়তুর বাজারগী মহাদেব বারী রোদতসু ইমা ইবেন অহল লমন কয়া য়াওনা মীওই লিশিং ১ রোমনা প্রোতেস্ট রেলী অমা চৎখি। চন্দ্রসেখর সিংহ, চন্দ্রহাস সিংহ অমসুং কির্তিচান্দ সিংহ নচিংবা মীওইশিংনা লুচিংদুনা চৎখিবা পেন্দবগী খোঙচৎ অদুদা মনিপুরীতা নত্তনা বেঙ্গলি অমসুং বিষ্ণুপ্রিয়াশিংগী মশক নাইবা মীওই কয়া য়াওখি। থৌদোক অসিবু আগরতলাদা মনিপুরী কাউন্সিল ত্রিপুরা অমসুং ওল ত্রিপুরা মনিপুরী স্টুদেন্টস্ এন্দ য়ুথ কোওর্দিনেসন কমিতি নসু য়াম্না কন্না য়ানিংদবা ফোঙদোকখিবগা লোয়ননা থৌদোকসিদা চেন্নবা মীওইশিংগী মথক্তা মতীক চাবা চৈরাক পীনবা দাবী তৌখি। ১৯৮৮ দগী তার্ম ৫ রক হন্না এমএলএ ওইরম্বতা নত্তনা কেবিনেত মিনিস্টরগী ফমসু পায়রম্বা মনিপুরগী মপান্দা মশিং লিকখ্রবা ত্রিপুরাগী মৈতৈ খুন্নাই লক্তা তোমথিন ওইরিবা বিরজিৎ সিংহগী মথক্তা মসিগী মমাংদসু কয়ারক হন্না খুৎথাখিবগী থৌদোক লৈখ্রবসু মসিগী অচুম্বা ৱায়েলদি ঙসি ফাওবদা ফংদদুনা লাক্লি হায়রি।  (পাউ অসি লখিপুরওনলাইন ইউতিউব চেনেলদা য়েংবিউ)