ঙসি

ইমালোন কনবগী খোংজংদা মায়ফাগী ৭৬শুবা কেম্পেইন মনিপুর পার্ত ৱান অমসুং পার্ত টু দা পাঙথোকখ্রে।


লখিপুর, ১৭ সেপ্তেম্বর ২০২০ঃ  লোনগী ওইবা খোঙজং মথং মথং চৎথরকপা ওইনা মায়ফাগী ৭৬ শুবা এৱের্নেস কেম্পেইন ঙরাং লখিপুর সাবদিবিজনগী মনুং চনবদা   মনিপুর পার্ত ৱান অমসুং পার্ত টু দা লৈবা কমিনিতি হোলদা অঞ্জুমানে উলেমা-ই মনিপুরী আসাম, আসাম মনিপুরী মুসলিম য়ুথ ফ্রোন্ত, ওল আসাম মনিপুরী মুসলিম স্টুদেন্টস্ ইউনিওননা শিল্লাংদুনা পাঙথোকখ্রে। অব্দুল গনি পাঙন না মীফম মপু ওইদুনা পাঙথোকখিবা কেম্পেইন অসিদা মায়ফাগী প্রেসিদেন্ট সেরাম হেরাজিৎ, মৌলুভি আলতাব উদ্দিন, মৌলানা রেহন উদ্দিন, এক্স জিপি প্রেসিদেন্ট নজরুল ইসলাম, নাজিল আহমেদ, এমদিসি গী মেম্বর জমীর উদ্দিন, অল আসাম মনিপুরী মুসলিম স্তুদেন্টস্ ইউনিওনগী চীফ কনভিনর জিৱাউল হাজারি, জাবির আহমেদ, ইমা সনাথোই, রেহান উদ্দিন, সিরাজ উদ্দিন, আসাম মনিপুরী মুসলিম য়ুথ ফ্রোন্তগী ফাউন্দর প্রেসিদেন্ট আহমদ চৌধুরী নচিংবা মীওইশিংনা দাইজতা ফমখি। 

Barak Tampak ki Khomjinba Pao 17 Sep 2020

কেম্পেইন অসিগী ৱাহৌদোক পীরদুনা মায়ফাগী প্রেসিদেন্ট সেরাম হেরাজিৎনা ঐখোয় আসামদা ইমালোননা লাইরিক তমদুনা মিৎ মায়পাঙবা ফুরুপ অমা ওইবা ঙম্লকলিবনি হায়রদুনা ইমালোন মীরায়বা হায়বসি ঐখোয় ইশাগী খোংদা ইসানা য়ানশিনজবনি হায়খি। মনিপুরী লোনগীসু হক ফংহনগদবনি হায়খি। মৌলানা রেহান উদ্দিননা ইমালোন তীন্নবা ঐখোয় পুন্না আসামদা মনিপুরী লোনবু কন্ননবা হোৎনমিন্নরসি হায়খি। মৌলুভি আলতাব উদ্দিননা ইমালোন পুনবা ফুরুপ ঐখোয় পুন্না চঙশিনমিন্নদুনা লোন অসি কনবা মতৌ তায় হায়খি। মায়ফাগা লোয়ননা তোঙান তোঙানবা লুপশিংনা হীরমসিদা চঙসিল্লিবা খোংজং অসিদা থৱাই হকচাং য়াওনা শৌগৎচরি হায়খি। 

আব্দুল গনি পাঙননা মীফম মপুগী ৱারোল পীরদুনা আসাম সরকারনা ঐখোয়বু মীকপ থোকহল্লকপসি ঐখোয়গীদি লাইবক ফবনি হায়খি। হন্দক্কী খোঙজং অসিদা মনিপুরী লোন ঙাংবা ঐখোয় খুদিংমক অচেৎপা ফিরেপ অমা লৌমিন্নবগী মতম ওইরে, ধর্মগী খেৎনবা থমদনা ইমালোন কনসি হায়খি। অরোইবদা মৌলানা রেহন উদ্দিন সাহেবনা মপুগী মীংখৈ শোন্দুনা শোন্দুনা মনিপুরী লোনবু আসাম সরকারগী এসোসিয়েত অফিসিয়েল লেঙ্গুয়েজ ওইহনগদবনি হায়খি। থৌরমগী মখা চৎথরকপা ওইনা পোস্ত কার্দকী কেম্পেইনসু পাঙথোকখি।

মায়ফাগী ইমালোনগী খোংজং অসিবু মপুঙ ফানা শৌগৎলদুনা এগ্রিকলচর ইন্সপেক্তর ওইনা থবকতগী পোৎথাখ্রবা বিন্নাকান্দি পার্ত তুগী মৈস্নাম বাবাহল সিংহনা খোংজং অসি মায়পাকত্রিফাওবা লেপ্পা লৈতনা চংশিনবা ঙম্বা ওইবিয়ু হায়না মায়ফাগী প্রেসিদেন্ট হেরাজিৎতা লুপা লিশিং ১০ মতেং পাঙখ্রে।