লমদম অসিগী পুৱারীদা ইহান হানবা ওইনা অল আসাম মনিপুরী মুসলিম মৈরা পায়বী শেমখ্রে।

লখিপুর, কাছার, সেপ্তেম্বর ১৪, ২০২০ঃ  কোরোইকান্দি জুনিয়র কোলেজতা পাঙথোকখিবা মীয়ামগী ওইবা মীফম অমদা ঙরাং নোংমাইজিং লমদম অসিগী ইহান হানবা ওইনা অল আসাম মনিপুরী মুসলিম মৈরা পায়বী শেমখ্রে। পোত্থারবা ওজা কোন্থৌজম মাঙ্গোনজাওনা প্রেসাইদ তৌদুনা পাঙথোকখিবা মীফমদা বাঁশকান্দি জুনিয়র কোলেজ, কোরোইকান্দিগী প্রিন্সিপাল টিঐইচ ইবোতোন সিংহ, আব্দুল ৱাল্লী চৌধুরী অমসুং নোংপোক লখিপুরগী জেদপিসি কব্রবম অনিতা নচিংবা মীওইশিংনা দাইজতা ফমখি। মীফমনা নুংফৌগী জুবেদা বেগমবু প্রেসেদেন্ট অদুগা লোবোক পার্ত ফাইভকী জুবেদা বেগমবু সেক্রেটরী খন্দুনা পাউতাকলোই ৪ গা লোয়ননা মীওই ৩১ না শাবা অল আসাম মনিপুরী মুসলিম মৈরা পায়বী লুপ অসিগী মীহুৎ কাংবু অমা শেমখি। কাছারগী তোঙান তোঙানবা মফমশিংদগী মীওইশিং য়াওনা ফমখিবা মীফম অসিনা হৌজিক হৌজিক মনিপুরী লোনগী ওইবা খোঙজং কয়াদা নৌনা শেম্বা লুপ অসিনসু থৱায় হকচাং য়াওনা শৌগৎচবগা লোয়ননা পাঙবা য়াবা মতেং পাঙগনি হায়নসু ফোঙদোক্নখি। 

Barak Tampak ki Khomjinba Pao 14 Sep 2020

মীফমদা শরুক য়াখিবা নৌনা শেম্বা লূপ অসিগী পাউতাকলোইসু ওইরিবী নোংপোক লখিপুরগী জেদপীসি কব্রবম অনিতানা হায়খিবদা মৈতৈ পাঙল ইচিল ইনাওশিংনা লমদম অসিগী মনিপুরী মহৈলোয়শঙ অয়াম্বদা মহৈরোয় মশিং য়াম্না তমহন্দুনা মনিপুরীশিংগী মায়ঙাকতুনা লৈরি হায়না অপেনবা ফোঙদোকখি। লোয়ননা হৌজিক হৌজিক মাইগৈ মাইগৈ খুদিংমক্তা ইমালোন কনবগী দমক তোঙান তোঙানবা লূপ কয়ানা চঙশিল্লিবা খোঙজংশিংদা শৌগৎপা ফোঙদোকপগা লোয়ননা ইমালোন অসি কন্নবা হোৎনবদা ঐখোয় খুদিংমক্না মতেঙ পাঙফম থোকই হায়খি। মীফম মপুগী ৱারোল পীরদুনা কোরোইকান্দিগী ওজা মাঙ্গোনজাওনা মনিপুরী মুসলিমসিংগী ওইবা অহানবা মৈরা পায়বী সেম্বা হায়বসি পুৱারীদা লেঙদনা লৈহৌরগদবা নুমিৎ অমনি হায়না ফোঙদোকখি। 

(অসিদা ক্লিক তৌবিদুনা পাউ অসি ইউতিউবতা য়েংবিউ)