অথৌবা নিংশিংলুপনা ১২০ শুবা অথৌবগী নুমিৎ পালন তৌগদৌরি।

লক্ষীপুর ওনলাইন, আগস্ট ৭, ২০১১ - অথৌবা নিংশিংলুপনা শিন্দুনা লাক্লিবা আগস্টকী তাং ১৩ থাংজা নুমিত্তা খুনৌ হায়স্কুল ফুলেরতলদা ১২০ শুবা অথৌবগী নুমিৎ পালন তৌগদৌরি। থৌরমগী মতুং ইন্না অয়ুক পুং ৮ মিনিট ১৫ দা ফিরাল চীংখৎপা, পুং ৮ মখায়দা লখিপুর টাউন কমিটি কেম্পাসতা লৈরিবা বীর টিকেন্দ্রজিৎ অমসুং নেতাজীগী শক্তমদা মৈরা অমসুং লৈ শু নচিংবা কৎপা, অয়ুক পুং ৯ তাবদা মীয়াম পুন্না চৎমিন্নবা। হায়রিবা খোঙচৎ অসি লক্ষীপুর খুমন বাস স্টেন্দ দগী হৌরগা খুনৌ হাইস্কুল ফাওবা চৎপা। থৌরমসিদা ইনাৎকী ফিজোল শেৎতুনা শরুক য়াবিনবা হায়রি। অয়ুক পুং ১০ মখায় তাবদা মীয়ামগী ওইবা মীফম অমা পাঙথোক্কনি। থৌরমদা লক্ষীপুরগী এস দি ও সিভিল শ্রীমতি লীনা দাসনা অথোয়বা মীথুংলেন ওইনা শরুক য়াগনি। লুপকী প্রেসিদেন্ট থোকচোম কৃষ্ণমোহননা মীফম মপু ওইদুনা পাঙথোক্কদবা থৌরমদা রুধলীয়ানথাং ই এ সি না স্পিসিয়েল গেস্ট ওইনা শরুক য়ারগনি। অতৈ মীথুং শিংদি আসাম য়ুনিভারসিটি শিলচরগী দিপার্টমেন্ট অব পোলিটিকেল সাইন্সতগী থবক্তগী পোথারবা প্রোফেসার তন্ময় ভট্টচায্য, হিউমেন রাইটস ওর্গেনাইজেসন কাছারগী প্রেসিদেন্ট এদভোকেট অহোংসাংবম ইরাবত, আসাম ইউনিভারসিটি শিলচরগী কোলেজ দিভেলপমেন্ট কাউন্সিলগী দাইরেক্তর দাক্তর বিভাস দে অসিনচিংবনি।
থৌরমদা নুমিৎসিগা মরী লৈননা অখন্নবা মীওইশিংনা ৱা ঙাংবা অমসুং নেসনেল গেমসতা শরুক য়ারুদুনা মায় পাক্লক্লবা লমদমসিগী সেপাকতৌক্রৌগী শান্নরোইশিংদা ইকাই খুম্নবা উৎপা। নুমিৎসিদা অথৌবগী নুমিৎকা মরী লৈননা য়াচংবা পুং ৬ মখায় তাবদা য়ুমথোং খুদিংদা মৈরা অমমতং থানবিয়ু হায়নসু লুপকী প্রেসিদেন্ট থোকচোম কৃষ্ণমোহন অমসুং জেনরেল সেক্রেটরী দাক্তর কোন্সম জয়ন্ত কুমারগী অপুনবা চেরোলনা হায়রি। নুমিৎ অসিদা ১২০ শুবা অথৌবগী নুমিৎ পালন নেহেরু কোলেজ পোয়লাপুলদসু অয়ুক পুং ১০ দগী হৌনা কোলেজ হোলদা পাঙথোক্কনি। থৌরমগী মতুং ইন্না বীরগী শক্তমদা লৈ কৎপা, খন্ন-নৈনবা, ঈশৈ নোংমাই থৌরম কয়াসু পাঙথোক্কনি হায়রি।