লখিপুরওনলাইন ডিজিতেল দেস্কঃ ত্রিপুরাগী ধলাই দিস্ত্রিক তা থোকলিবা কাংলুপ ইরাংনা মরম ওইরগা থোকহন্নিদবা থৌদোক মখা তানা থোক্তনবা মফম অসিদা মোবাইল ইন্তরনেত থীংজিনখ্রে। আগরতলাদগী কিলোমিতর ১১২ রোম চৎলবা লৈবা মফম অসিদা হৌখিবা জুলাইগী ৭ তা রথ য়াত্রাগা মরী লৈননা পাঙথোকপা থৌরম অমদা থোকখিবা ফুন চৈনবগী থৌদোক অমদা ফিভম থীনা শোকতুনা আগরতলাগী জিবিপি হোসপিতালদা লাইকন্নদুনা লৈরকখিবা ত্রাইবেল নহা পারমেশ্বর রিয়াংনা নহান অহিংদা লৈখিদবদগী খঙহৌদনা দিস্ট্রিক অসিদা কাংলুপ মশেলগী মরক্তা ইরাং থোক্তুনা দুকান অমদি য়ুম কয়া মৈথাবগী থৌদোক থোকখি। মসিনা মরম ওইরগা গন্দতুইসাদা সিআরপিসিগী সেক্সন ১৪৪ গী মহুত সিল্লবা বিএনএসএস ২০২৩ গী সেক্সন ১৬৩ থমজিন্দুনা অমদি সিকিউরিতিগী অহেনবা ফোর্স থমজিন্দুনা হৌজিক খরমখৈদি ইরাং লাকশিনবা ঙমলে হায়রি।
