লখিপুরওনলাইন নিউজ দেস্কঃ হৌখিবা জুনগী ৩০ দা মনিপুরগী নোনে দিস্ট্রিককী তুপুলয়ার্দ রেলৱে কন্সত্রাক্সন কেম্পতা থোকখিবা মরাং চীং নীংখায়বগী লাইবক থীবা থৌদোক অদুদা ঙরাং নৌনা মীওই ৬ কী অশিবা হকচাং ফংখিবগী লোয়ননা থৌদোক অসিদা পুন্না অশিবা হকচাং ৩০ লৌখৎখ্রে হায়রি। কম্পনিগী মীওই ১৪, খুনজা ৫, অদুগা রেলৱেগী মীওই ৩ পুননা মীওই ৩৪ হৌজিকসু থীবা ফংদ্রি। ঙরাংসু অমুক হন্না মফমসিদা চীং নীংখায়বগী থৌদোক থোকখিবনা লমদম অসিগী মীয়াম অমদি মী থীবগী থবক চৎথরিবশিংদা মীপায়বা পোক্নরে হায়রি। চীং নিংখায়বগী থৌদোক অদুদা ঈজৈ তুরেলগী ঈচেলদা অথিংবা পীবদগী মৌখৎলকপা ঈশিংনা মরম ওইরগা অমদি নোং লেপ্তনা চুবনা খুল অসিগী অনেম্বা মফমশিংদা লৈবা মীয়ামদা নোনে দিসিনা চেকশিল ৱা ফোঙদোকখ্রে হায়রি।
