ঙসি

মন্ত্রী হাজারিকানা প্রবীন অমসুং নৃপেন মীহাৎকী মতাংদা ইমুং মনুং অমদি খুনজাশিংগা ৱারী শান্নখ্রে, অচুম্বা ৱায়েল চৎথহনগনি হায়বগী থাজবা পীরমখ্রে।

লখিপুরওনলাইন দিজিতেল দেস্কঃ কাছার জিলাগী ধোলাই থানাগী মনুং চনবদা লৈবা বাম রামপুর খুঙ্গংগী তেঙ্কী দ্রাইভার প্রবিন সিংহ অমসুং মহাক্কী লোয়নবা নৃপেন সিংহগী মীশিগী মতাংদা আসামগী ৱাতর রিসোর্সেস মন্ত্রী শ্রী পিযুস হাজারিকানা থমোয় শোক্না অৱাবা ফোঙদোকখিবগা লোয়ননা শগোলশেন নুমিত্তা শ্রী হাজারিকানা লখিপুরগী এমএলএ শ্রী কৌশিক রাইগা লোয়ননা বাম রামপুরদা লাক্তুনা লৈখিদ্রবা ওইল তেঙ্কী দ্রাইভর প্রবিন সিংহ অমসুং নৃপেন সিংহগী মিশি অসিদা ইমুং মনুং অমসুং খুনজাশিংগী অৱাবদা শরুক য়ামিন্নখি। মুখ্যমন্ত্রী হিমন্ত বিশ্ব শর্মাগা ৱারী শান্নদুনা থৌদোক অসিগী মতাংদা অচুম্বা ৱায়েল চৎথনবা হোৎনগনি হায়না শ্রী হাজারিকানা ফোঙদোক্লমখি। প্রবিন অমসুং নৃপেনগী ইমুং মনুংদা লুপা লাখ ২ তৌদুনা তেংবাং পীবগী ৱাফম মহাক্না ফোঙদোকখি। 
পনবা য়াই,  ধোলাই থানাগী মনুং চনবদা লৈবা বাম রামপুর খুঙ্গংগী তেঙ্কী দ্রাইভার কৈশাম প্রবিন সিংহ জনুৱারীগী ৩০ দা মহাক্কী লোয়নবা নৃপেন সিংহ গা লোয়ননা মীজোরামদা থাউ থীনবা চৎখিবনি অদুবু মথংগী নুমিত্তা প্রবিনবু মীজোরামদা শকখঙদবা মীওইশিংনা তমথিবা মওংদা হাত্তোকপিরমখিবনি হায়রি অদুগা দ্রাইভর প্রবীনবু মহাক্কী লোয়নবা নৃপেন সিংহনা হাৎপনি হায়না মরাল শিদুনা মিজোরাম পুলিসনা নৃপেন সিংহ বু ফাজিন্দুনা থমখি। অদুগা কায়নথংদা ফাদুনা থমলিবা নৃপেন মশা মথন্তা শিরমলে হায়না মহাক্কী ইমুং মনুংদা অমুক পাউ লাকখি। পাউ অসি তাবদা ইমুং মনুং অমসুং খুনজা অসিগী মীয়াম অচাকপা মৈদা ঘী হৈবগুম থোকখি। ফেব্রুৱারীগী তাং ৯ য়ুমশাকৈশা নুমিৎকী নোংয়াইদা নৃপেনগী অশিবা হকচাং শিলচরদা থুংলদুনা শিলচর মেদিকেলদা পোস্তমোর্তেম তৌরবা মতুংদা অশিবা মশা শগোলশেন নুমিতকী অয়ুকতা পুরদুনা মহাক্কী য়ুমদা লাকখি। অশিবা মশা পুরকপদা ইমুং মনুং অমসুং খুনজা অসিগী মীয়াম হুপনা হকচাং লৌ হায়বা য়াখিদে, শাওবনা মৈ হৌনখি। উপায় লৈত্রদুনা এদমিনিস্ট্রেসননা অশিবা হকচাং অদু হন্দুনা শিলচর মেদিকেলদা অমুক পুখি। য়ুমশাকৈশা নুমিত্তা রাইজিং এনজিও কমিউনিতি হোলদা আসামগী সিএসওশিং অমসুং খুনজাশিংগী খুদক্কী ওইবা মীফম ফমদুনা মীহুৎ ২৫ না শাবা জোইন্ত কমিতি ফোর দবল মার্দর অফ্ প্রবিন সিংহ এন্দ নৃপেন সিংহ শেমখি। মীফমদা ওল আসাম মনিপুরী মৈরা পায়বী কোর্দিনেসন কমিতি, আমসু, আময়া, মাইফা অমদি অতৈ লূপ কয়াগী মীহুৎ কাঙবুশিং য়াওখি।  কায়নথংদা মন্ত্রী পিযুশ হাজারিকা লাকতুনা ৱারী শান্নরবা মতুংদা নৃপেনগী থৱায় য়াওদ্রবা হকচাং য়ুমদা থুংলখি। 
প্রবিন অমসুং নৃপেনবু অশিবগী খয়াত্তা তাহনখিবগী থৌদোক অসিগী মতাংদা পেন্দবা ফোঙদোকপগা লোয়ননা শিলচরগী এমপি রাজদীপ রায়না ঙরাং লোকসভাদা জিরো অৱারগী মতমদা মরীক চুম্না পাউদমখ্রে, দবল মার্দর অসিগী মতাংদা লংলা লংজিন পুথোকপীনবা অমসুং সিবিআই ইনকুৱারী তৌহন্নবা তকশিনখ্রে। Watch on Youtube 👉 https://youtu.be/4VxTwm7krBM

Post a Comment

0 Comments