চীফ মিনিস্তর হিমন্ত বিশ্ব শর্মানা নুংফৌ তুরেল মথক্তা শাবা লোয়শিনগদবা সহীদ নন্দচান্দ থোংগী উরেপ উয়ুং তমখ্রে

লখিপুরওনলাইন নিউজ দেস্কঃ চীফ মিনিস্তর দাঃ হিমন্ত বিশ্ব শর্মা জনুৱারীগী ৩০গী নুংথিলদা কাছার জিলাগী লখিপুর সাবদিবিজনগী মনুং চনবদা শিবপুর লখিপুর লম্বীগী নুংফৌ তুরেল মথক্তা শাবা সহীদ নন্দচান্দ ব্রীজগী উরেপ উয়ুং তমখ্রে। নোংমাইজিং নুমিৎতা সিএম না গুৱাহাতিদগী কুম্ভিরগ্রাম প্লেন তাফমদা থুংলবা মতুংদা শিলচর সার্কিত হাউসতা চৎখি। মতুংদা শিলচর আম্বিকাপত্তিদা আরএসএসকী লুচীংবা মোহন ভাগবতকা উন্নদুনা ৱারী ৱাতায় শান্নখি। নুংথিলদা লখিপুরদা লাকতুনা নীংথেমখুলগী নুংফৌ তুরেল মথক্তা শাগদবা সহিদ নন্দচাঁন্দ ব্রীজকী য়াত্রা হুনখি। 

থৌরমদা ৱা ঙাংলদুনা সিএমনা কার্গিল লানদা সহীদ ওইখ্রবা ইরোম নন্দচান্দ সিংহগী মীংদা লুপা ক্রোর ৬ মখায়গী বাজেততা শাবা লোয়শিনগদবা থোং অসিগী মনাক্তা সহীদ নন্দচান্দকী স্তেচু অমসু শারগনি হায়বগী ৱাফম ফোঙদোক্লমখি। মতুংদা লখিপুর আর্ল হায়ার সেকেন্দরী স্কুলগী শান্নবুঙদা পাঙথোকখিবা মীয়ামগী ওইবা মীফম অমদা মহাক শরুক য়াখি। থৌরমদা থোং অসিগী মখাতাবা শরুকশিং অসি লাক্লিবা সেপ্তেম্বর থাগী মনুংদা মপুঙ ফানা শাবা লোয়শিনগনি হায়বগী থাজবা পীরমখি। পনবা য়াই, থোং অসি নাবার্দকী মখাদা ২০০৫ দা সেংসন ওইখি। অদুবু লাইবক থীবদি থোং অসিগী মখোং অহুম য়ুংবা হৌরবা মতুং কন্ত্রেকতর লৈখিদবদগী ২০১০ দগী থবক লেপতুনা লাকখিবনি হায়রি। প্রোজেক অসি মপুঙ ফানবা হোৎনরিবা লখিপুরগী এমএলএ শ্রী কৌশিক রায়বু সিএমনা থাগৎপা ফোঙদোকলমখি। 

লখিপুরগী চাওখৎ থৌরাংগী মতাংদা পল্লদুনা সিএমনা লখিপুর সাবদিবিজনগী এসদিও সিভিলগী তাংদাংবা বিল্দিং অমা লুপা ক্রোর ২৫ চংনা শাবা হৌরগনি, লুপা ক্রোর ১২ চংগদবা স্তেদিয়াম অমা শারগনি হায়খি। লখিপুরদা নৌনা কোলেজ অমা লিংখৎপগী ৱাফমসু মহাক্না ফোঙদোক্লমখি। নেহেরু কোলেজতা সাইন্স স্ত্রীম হাপচীল্লগনি, লখিপুর হোসপিতাল অসি ফমুং ১০০ লৈবা সিভিল হোসপিতালদা আপগ্রেদ তৌরগনি অমসুং জিএনএম নর্সিং ইন্সতিতিউ অমা লিঙখৎপগী ৱাফমসু মহাক্না ফোঙদোক্লমখি। https://youtu.be/fKBQl9uQv90