জাতিগী শান্নখোৎনবগী থৌরমদা সাউথ ইস্ত এসিয়ান গেমসকী সুইমিংদা সিলভর ফংখিবা লখিপুরগী মুতুম দিনমনিবু ইকায় খুম্নখ্রে।

লখিপুরওনলাইন দিজিতেল দেস্কঃ লৈবাক অসিগী ওলিম্পিয়ান মেজর ধ্যানচান্দ বু ইকায় খুম্নবা উৎপগা লোয়ননা আগস্তকী তাং ২৯ দা জাতিগী শান্নখোৎনবগী নুমিৎ ২০২১ ক্রীদা ভারতীনা শিল্লাংদুনা কাছার শিলচরগী জেসি ইন্তরনেসনেল হোতেলদা নুমিৎ অসি পাঙথোকখ্রে। থৌরম অসি ক্রীদা ভারতী কাছারগী ভাইস প্রেসিদেন্ট ওইরিবা রিতায়র্দ মেজর পিঐইচ মনিধন সিং না প্রেসাইদ তৌদুনা পাঙথোকখি। থৌরমদা টাউন ক্লাবকী প্রেসিদেন্ট দিলিপ নন্দি, কাছার ফেন্সিং এসোসিয়েসনগী প্রেসিদেন্ট গোপাল রোয়, আসাম স্তেট ক্রীদা ভারতী গী জেনরেল সেক্রেটরী পূর্নেন্দু দাস, কাছার জিলাগী এসপি রমন্দীপ কোর নচিংবা অখন্নবা মীওইশিংনা শরুক য়াখি। থৌরমগা মরী লৈননা তাইকোন্দো, ফেন্সিং, য়োগা, সাইক্লিং নচিংবা তোঙান তোঙানবা মশান্ন কয়াগী দেমোন্সত্রেসন উৎখি।
লোয়শিল্লকপদা তোঙান তোঙানবা স্কুল ১৫ দগী লাকখিবা মহৈরোই ২০ না সোর্ত স্পীচ কম্পিতিসন পাঙথোকখি। থৌরমগী মনুং চন্না খৃকুমজা ১৯৮৪ গী কাথমন্দুদা পাঙথোকখিবা অহানবা সাউথ এসিয়ান গেমসতা শুইমিংদা শরুক য়াদুনা সিলভর মেদেল লৌরকখ্রবা কাছার লখিপুরগী ওনোরারী কেপ্তেন সুবেদার মেজোর মুতুম দিনমনি সিং বু ইকায় খুম্নবা ফোঙদোকখি। ক্রীদা ভারতী কাছারগী ভাইস প্রেসিদেন্ট ওইরিবা রিতায়র্দ মেজর পিঐইচ মনিধন সিংনা মুতুম দিনমনিদা মহাক্কী সুইমিংদা লৈরিবা হৈথোই শিংথোইবা কয়াবু হৌরক্লিবা নহা শিংদা তম্বী তাকপিদুনা মশান্না অসিবু পুক্নিং থৌগৎনবা হায়খি। লুপকী সেক্রেটরী রঞ্জন পালনা থাগৎ ৱারোল পীখিবগা লোয়ননা নুমিৎসিগী থৌরম চীংলেম্না লোয়শিনখি।