ঙসি

নুমিৎনিনিগী বরাক তম্পাক্কী খোঙচৎতা আসামগী চীফ মিনিস্তর দা হিমন্ত বিশ্ব শর্মা ঙরাং শিলচরদা থুংলখ্রে।

লখিপুরওনলাইন দিজিতেল দেস্কঃ নুমিৎনিনিগী বরাক তম্পাক্কী খোঙচৎতা আসামগী চীফ মিনিস্তর দা হিমন্ত বিশ্ব শর্মা ঙরাং শিলচরদা থুংলখ্রে। কুম্ভিরগ্রামদগী লাকপদা শিলচর রোংপুর জিরো পোইন্তা লৈরিবা লৈবাক অসিগী হান্নগী প্রধান মন্ত্রী ভারত রত্ন অতল বিহারী বাজপায়িগী স্তেচু দা লৈসু কৎতুনা ইকায় খুম্নবা ফোঙদোকপগা লোয়ননা মহাক্কী খোংচৎ হৌদোকখি।  অয়ুকতা শিলচর শ্রীকোনাদা শাগদবা মিনি সেক্রেটারিয়েতকী ফিভম য়েংশিনখি। লুপা ক্রোর ১১৬ চংগদবা প্রোজেক্ত অসি চহী ৩ গী মনুংদা শাবা লোয়শিনবগী পান্দম থমলি। দুর্গাপুজাগী মতুংদা থবক হৌগৎলগনি। মসিনা মরম ওইরগা থবক মচা মচাগী দমক্তা গৌহাতি চৎত্রবসু শিলচরদা অদুম্মক পাঙথোকপা য়াহল্লগনি। 
চীফ মিনিস্তরনা নেসনেল হায়ৱে ৩০৬ অমসুং নেসনেল হায়ৱে ৩৭ শম্নগদবা শিলচর বাইপাসকী থবক খোংজেল য়াংশিন্নবা এনঐইচ আইদিসিএল অমসুং পিদব্লিউ দিগী অফিসিয়েল শিংদা খঙহনখ্রে। খোংচৎ অসিদা চীফ মিনিস্তরগা লোয়ননা রাজ্যগী উমং লোয়শঙগী মন্ত্রী পোরিমোল সুক্লবৈদ্য, শিলচরগী এমপি দা রাজদীপ রায়, তেজপুরগী এমপি পল্লব লোচন দাস, লখিপুরগী এমএলএ শ্রী কৌশিক রায় অমসুং উধারবন্দকী এমএলএ মিহির কান্তি সোম শরুক য়াখি। 
লমতুগা মরী লৈননা লমদম অসিদা লৈরিবা দলাল গী মতাংদা পাউমীশিংনা হংবা ৱাহং অমগী পাউখুমদা চীফমিনিস্তরনা সেতলমেন্ত অফিসতা লৈরিবা দলালশিং অদুগী মমিং পীখৎলক্নবা নোক্ন নোক্ন পাউমিশিংদা হায়খি।
চীফ মিনিস্তর দা হিমন্ত বিশ্ব শর্মনা সিলচরদা লৈরিবা ইন্দিয়ান রেদ ক্রোস সোসাইতিগী মাল্তি ইউতিলিতি বিল্দিংগী ঙরাং উরেপ উয়ুং তমখি। অহানবা তাঙ্কক্কী ওইনা লুপা লাখ ৫০ না বিল্দিং অসি সাবা হৌগৎলগনি। মসিগা মরী লৈননা রাজিব ভবনদা মীয়ামগী ওইবা মীফম অমসু পাঙথোকখি।
মতুংদা শিলচর মেদিকেল কোলেজ হোসপিতাল দা নৌনা ফমুং ৪০ লৈবা আইসিইউ অমসুং ফমুং ৪০ লৈগদবা অঙাংগী আইসিউ বেদসু হাংদোকখি। বরাক তম্পাক্কী মীওইশিংগী অপাম্বা মতুং ইন্না লায়েংশঙ অসিবু সুপার স্পেসিয়েলিতি লায়েংশঙ অমা ওইহন্নবা হোৎনরগনি হায়না মহাক্না ফোঙদোকখি। 
ঙসিগী থৌরম পরেংদা তাউন ক্লাব ফুতবোল শান্নবুং,  ভুবন চীং অমসুং খাসপুর রাজবারী কোয়না চৎতুনা য়েংশিনগনি। চীফ মিনিস্তর হয়েং নিংথৌকাবা নুমিত্তা হনখিগনি। https://youtu.be/BqPEgy48XWw

Post a Comment

0 Comments