শিন্তাকপুরেল আর কে সনাহলগী ১২০ শুবা মপোক কুমওন থৌরম লখিপুরদা পাঙথোকখ্রে

লখিপুর, কাছার, নভেম্বর ১৯, ২০২০- 

লখিপুর থাং-তা একাডেমী, লখিপুর খুমন আসামনা শিন্দুনা ঙসি লখিপুর খুমন ইপুথৌ থোংনাংগী কলচারেল হোলদা লৈখিদ্রবা শিন্তাকপুরেল আর কে সনাহলগী ১২০ শুবা মপোক কুমওনগী থৌরম অচম্বা মওংদা পাঙথোকখ্রে। লখিপুর খুমনগী সিনিয়র সিতিজেন ইঙুদম শতিসচন্দ্রনা মৈরা চুখৎতুনা নুমিৎসিগী থৌরম হৌদোকখি। থৌরমদা লখিপুর খুমন থাং-তা একাডেমীগী প্রেসিদেন্ট ঙারিয়াম্বম অশ্বিনিকুমার, কে রাজেশ্বর সিংহ অমসুং ইঙুদম সুনন গা লোয়ননা একাডেমী অসিগী অখন্নবা থাং-তাগী শান্নরোই শিংনা শরুক য়াখি। পনবা য়াই, অমিনস্না হায়নসু খঙনবা রাজকুমার সনাহল খৃকুমজা ১৯০১ গী নভেম্বরদা শুগনুদা পোকখি। মহাক রাজকুমার শকহেনবা সনাতোম্বা অমদি কবোকলৈ ইবেমহল শিজা অনিগী মচানুপানি।  ১৮৯১ গী মতমদা ইপা ইপুশিংগী মমল য়াম্লবা হুয়েল লাংলোন থাং-তাগী মহৈ অসিগী মতীক মগুণবু বৃটিশশিংনা মশক খঙদুনা মসিনা মখোয়দা মায়থিহনবা য়াই খঙলকপদগী মসিবু থীংজিন্নবা হোৎনখি। তম্বীবদা অথীংবা থম্বতা নত্তনা খুৎশু খুৎলাই ফাওবা থমদনবা বৃটিশনা মীয়ামদা খঙহনখি। কায়নথংদা ১৯৩৪ গী মেগী তাং ৩০ দা ইনিংথৌ চুরাচান্দনা ময়ায় তাংবল লৌদুনা ফমখিবা নিখিল মনিপুরী মহাসভাগী ৱারেপনা মনিপুরদা মহৈ অসি ফোংনা তম্বীবগী অয়াবা পীখি। শিন্তাকপুরেল অসিনসু চহি অসিমক্কী নভেম্বরগী তাং ৪ দগী হৌদুনা হুয়েল লাংলোন অমদি সৎজাল ফোংনা তম্বীবগী থবক চৎথবা হৌখি। মহাক্কী মীৎয়েং মখাদগী তম্বীবা হৌরকপনা হৌজিকতি ভারতকী তোঙান তোঙানবা রাজ্যশিংদা মীওইশিংনা হুয়েল লাংলোন থাং-তা মহৈ অসি হকথেংননা শন্দোকপা ঙমলে।  হৌজিকতি ভারতকী অমত্তা ঙাইরবা লুপ "থাং-তা ফেদরেসন অফ ইন্দিয়া" অমদি "ৱার্লদ থাং-তা ফেদরেসন" শেমখ্রে। ইন্দিয়ান ওলিম্পিক এসোসিয়েসনগী শকখঙ চেরোল ফংলে অমদি স্কুল গেম ফেদরেসন অফ ইন্দিয়া না থাং-তা বু মশক খঙবিদুনা ভারতকী তোঙান তোঙানবা রাজ্য শিংদা থাং-তা মহৈ তম্বা য়ারে। হৌজিক মক্কী ওইনদি থাং-তা শান্নবগী আইতেমশিং অসি ওলিম্পিককী দিসিপ্লিন অমা ওইহন্দুনা নেসনেল অমদি ইন্টরনেসনেল গেমসতা য়াওহন্নবগী তানজা অদু ফংননবা হোৎনরি হায়না হুয়েল লাংলোন থাং-তা এসোসিয়েসন মনিপুরগী প্রেসিদেন্ট হুইদ্রোম প্রেমকুমারনা ফোঙদোরকলি। (www.lakhipuronline.in )