ঙসি

আমসুগী লুচিংবশিংনা মন্ত্রী হিমন্ত বিশ্ব শর্মাগা উন্নদুনা মনিপুরীশিংগী ফোংফোং শারিবা ৱাফমশিং খন্নখ্রে।


গুৱাহাতি, আগস্ট ২১, ২০২০ঃ ওল আসাম মনিপুরী স্টুদেন্টস্ ইউনিওন আমসু না আসামগী মহৈমশিংগী মন্ত্রী দাঃ হিমন্ত বিশ্ব শর্মাগা মহাক্কী অফিসিয়েল শঙ্গায়দা ফমিন্নখ্রে।  হৌখিবা চহি খরা অসিদা মনিপুরী মেদিয়াম তমলকপা মনিপুরী মচাশিংবু আসাম পাব্লিক সার্বিস কমিসন অমসুং আসাম সরকারগী তোঙান তোঙানবা লোইশঙশিংদগী থোকপা থবক লৌবগী চাংয়েংশিংদা আসামিজ, বেঙ্গোলি অমসুং বোড়ো লোন অহুমগী মরক্তা লোন অমা খঙদ্রগদি য়ারোই হায়বগী তোপ তোপ্পা চৈকক্ অমা থমজিল্লকপদগী ওইরক্লিবা আসামগী মনিপুরীশিংনা হৌজিক ফোঙ ফোঙ শানা তারিবা অৱাবা অসিগী মতাংদা মরীক চু্ম্না নৈনমিন্নখি। আসাম পাব্লিক সার্বিস কমিসন এপিএসসি না লৌবা থবক্কী চাংয়েংশিংদা লৈরিবা অপনবশিং অদু অথুবা মতমদা লৌথোক্লগনি অমসুং অতৈ লোইশঙশিংদগী থোকপা চাংয়েংশিংদসু শোইদনা য়েংশিল্লগনি হায়না আমসুগী মীহুৎ কাংবু অসিদা মন্ত্রীনা থাজবা পীরকলে হায়রি।

 নাকল অমরোমদা আসাম পাব্লিক সার্বিস কমিসননা লৌবা চাংয়েংদা মনিপুরী সাহিত্যবু ওপসোনেল পেপার অমা ওইনা থম্বিনবা অমসুং মনিপুরী মেদিয়ামগী স্কুলশিংদা অখন্নবা মীৎয়েং চঙশিনবিনবা তকশিনখিবগা লোয়ননা আসাম সরকারনা ২০১৩ দা ওজাশিং প্রোভিন্সিয়েলাইজেসন পীখিবদা বেঙ্গোলি অমদি আসামিজ মেদিয়াম স্কুলদা মনিপুরী লোন তাকপীরিবা অজাশিংবু রেগুলার ওইহনখিদবা, হৌজিকসু থবক তৌরিবা অজাশিং অসিবু রেগুলার তাহনবিউ হায়নসু মীহুৎ কাংবু অসিনা তকশিনখি হায়না ওল আসাম মনিপুরী স্টুদেন্টস্ ইউনিওন সেন্ট্রেল কমিতিগী ভাইস প্রেসিদেন্ট সনাহল সিংহনা ফোঙদোরকলি। আসামগী মহৈ মশিংগী মন্ত্রী হিমন্ত বিশ্ব শর্মাগা উনখিবা অদুদা ওল আসাম মনিপুরী স্টুদেন্টস্ ইউনিওন আমসুগা লোয়ননা শরুক য়াখিবা  লুপশিং অদুদি ওল মোরান স্টুদেন্টস ইউনিওন, ওল আসাম দেউরি স্তুদেন্টস্ ইউনিওন, অসোম জাতিয়তাবাদি য়ুব পরিষদ, ওল দিমাসা স্টুদেন্টস্ ইউনিওন, ওল আসাম সোনোৱাল কাছারি স্টুদেন্টস্ ইউনিওন, ওল অধিবাসি স্টুদেন্টস্ এসোসিয়েসন অফ আসাম, ওল আসাম চুতিয়া স্টুদেন্টস্ ইউনিওন অমসুং ওল আসাম হাজোং স্টুদেন্টস্ ইউনিওন য়াওখি। Lakhipuronline YouTube Channel