বরাক তম্পাক্কী খোমজিনবা পাউ ৩১-০৭-২০২০

বরাক তম্পাক্কী  খোমজিনবা পাউ ৩১-০৭-২০২০


বিন্নাকান্দি পার্ত তুগী মনুং চনবা ৱাংখেম লৈকায়দা সিপাই ম্যুটিনীগী নিংশিং খুভম অমা শানবা ঙরাং উরেপ উয়ুং তমখ্রে। সিপাই ম্যুটিনী মেমোরিয়েল প্রোতেক্সন কমিটি লখিপুরনা শিন্দুনা লখিপুর সাবদিবিজনগী বিন্নাকান্দি পার্ত টুগী ৱাংখেম লৈকায়দা মমাংঙৈদা জঙ্গীলাল হায়নসু খঙনরম্বা খৃঃ কুমজা ১৮৫৮ গী জনুৱারী ১২ গী সিপাই ম্যুটিনিদা থৱায় কৎখ্রবশিংগী খুভম ওইনা কমিউনিতি হোল অমা ওইনা শানবা কমিটি অসিগী প্রেসিদেন্ট য়ুম্নাম মনি অমসুং অতৈ থৌবুরোইশিংনা ঊরেপ ঊয়ুং তমখ্রে। নিংশিংবা য়াই, খুভম অসিগী দমক সিঙ্গেরবন্দ মুতুমলৈকায়দা লৈবা থেঙ্গুজম শরশীকান্ত না লম কৎপীরকখি অমসুং বিন্নাকান্দি জিপি না শেন্থং লুপা লাখ ২.৫ পীবিরকখি হায়না লুপ অসিগী সেক্রেটরী তৌরাংবম নগেন না ফোঙদোরকলি।  Pao asi YouTube ta yengbiyu 

লখিপুর সাবদিবিজনগী মনুং চনবদা লৈবা সাউথ বরাকতা ঙরাং পেত্রোল পাম্প অমা নৌনা হাংদোকখ্রে। সাউথ বরাককী বিন্নাকান্দি ঘাট জিপি অফিসকী মনাকতা অশোক কুমার পান্দেগী মশাগী লমদা শাবা পম্প অসি ঙরাং লখিপুরগী এমএলএ রাজদীপ গোৱালানা হাংদোকপীখি। ফিতা ককতুনা হাংদোকপগী থৌরমদা এমএলএ রাজদীপকা লোয়ননা থবক্তগী পোৎথারবা অজা মকোক দুর্গাকান্ত পান্দে শরুক য়াখি। হৌজিক ওইরিবা কোরোনাগী লায়চৎনা মরম ওইরদুনা শঙ্গাবগী থৌরম অদু পাকচাউনা পাঙথোকখিদে। থৌরমদা জিলা কংগ্রেসকী প্রেসিদেন্ট প্রদীপ কুমার দে, হরেশ্বর ধুবী, ইঙুদম কান্ত সিংহ, বিক্রম গোৱালা, চন্দ্রসেখর কোয়রী, বিন্নাকান্দি ঘাট জিপিগী প্রেসিদেন্ট হেলেনবাবু সিংহ নচিংবা মীওইশিং শরুক য়াখি। ইন্দিয়ান ওৱেল কোর্পোরেসনগী মখাদা প্রভুদয়াল ফুৱেলস্ হায়না মীংথোনবা পেত্রোল পাম্প অসি হাংদোকখিবনা সাউথ বোরাককী গারী মপুশিংদা পেত্রোল দিজেলগী অৱাবা খরদি সোইদনা কোকলগনি হায়না মীয়ামনা ফোঙদোক্নরি।  Pao asi YouTube ta yengbiyu 

লখিপুর সিনিয়র সিতেজেন্স ফোরামগী মীফম অমা হৌখিবা জুলাইগী তাং ২৮ দা পাঙথোকতুনা লখিপুর সাবদিবিজন অসিবু দিস্ত্রিকতা আপগ্রেদ তৌবিনবা ৱাকৎ ফোঙদোকখ্রে। সোসিয়েল দিস্তেন্সিং ঙাকতুনা পাঙথোকখিবা মীফম অদু লূপকী ভাইস প্রেসিদেন্ত ইঙুদম কান্ত সিংহনা প্রেসাইদ তৌখি। মীফমনা মহকুমাগী মশাগী ওইবা লোয়শঙ শাবা, লখিপুর প্রাইমারী হেল্ঠ সেন্তর অসি ফমুং ২০০ লৈবা সিভিল হোসপিতালদা ওন্থোকপা, লখিপুরগী গাঁও পঞ্চায়েত খুদিংদা হকশেলগী সাবসেন্তর অমমম হাংদোকপা লোয়ননা ব্লোক এরিয়া অমদা পিঐইচই অমমম থম্বীনবসু ৱাকৎ ফোঙদোকখি। মসিগা লোয়ননা শিলঘাট - বাসকান্দি, সিঙ্গেরবন্দ - তোলেনগ্রাম গী বরাক তুরেলগী মথক্তা থোং শাবা, লোয়ননা নিংথেমখুলগী থোং অসি শাবা লোয়শিনবা, সিঙ্গেরবন্দা বরাক তুরেলগী লৈরায় নিংখায়বগী অৱাবা অসি অথুবা মতমদা শেমজিনবা হায়বনচিংবগী দাবী তৌখি। আসাম সরকারগী মাইগৈদগী সিঙ্গেরবন্দ গী লৈরায় নীংখায়বা অসি ঙাক্নবগী দমক লুপা কোতি ৮ লাখ ৩৫ কায়থোক্লে হায়বগী পাউ তাবদা হরাওবা ফোঙদোক্নখি। লাক্লিবা ওক্টোবরগী তাং ১ মালেমগী সিনিয়র সিতিজেন্স নুমিৎ অমসুং ওক্টোবরগী তাং ২ দা গান্ধীজীগী ১৫০ শুবা মপোক কুমওন পাঙথোক্নবা ৱারেপ লৌখি। মীফমদা লেফতেনেন্ত কর্ণেল আরাম্বম গৌরকিশ্বর সিংহ, জি নরহরি শর্মা, এনজি বসন্ত কুমার, কেঐইচ গৌরহরি অমসুং লুপকী জেনরেল সেক্রেতরী ইঙুদম বিনোদ শরুক য়াখি।  Pao asi YouTube ta yengbiyu 

দি মনিপুরী লিতরেরী ফোরাম আসামগী একজিক্যুতিব কমিতিগী মীফম অমা ঙরাং কোরোইকান্দিদা পাঙথোকখ্রে। মীফমদা আসামদা হৌজিক ওইরিবা মনিপুরী লোনগী ফিভমগী মতাংদা খন্ন-নৈনখ্রে। য়ুম্নাম নদিয়াচাঁন্দ না মীফম মপু ওইদুনা পাঙথোকখিবা একজিক্যুতিবা কমিতিগী মীফমদা মনিপুরী লোনবু আসামগী এসোসিয়েত অফিসিয়েল লেঙ্গুয়েজ ওইহনবগী ঈহৌশিংদা দি মনিপুরী লিতরেরী ফোরাম আসামগী মাইগৈদগী শৌগৎকনি হায়না ফোরামগী জেনরেল সেক্রেটরী হুইরেম বাবাতোনগী চেরোল অমদা হায়রি। Pao asi YouTube ta yengbiyu 

দিস্ত্রিককী ওইনা হরিনগরগী মোদেল স্কুলদা হাংদোক্কদৌরিবা কোভিদ কেয়ার সেন্তর আগস্তকী চয়োলদা হাংদোক্লগনি হায়না জিরিবামগী দিসি দব্লিউ মালেমঙানবা চেংলৈ আইএএসনা ফোঙদোকখ্রে। মনিপুর লৈঙাকনা মীয়ামগী দমক জিরিবামদা হাংদোক্নবা হায়দুনা জিরিবাম এদমিনিস্ত্রেসন, জিরি পুলিস, পিদব্লিউদি এমএসপিদিসিএল ফেদ ইঞ্জিনিয়ারিং য়াওরগা কন্না শেম শাদুনা লৈরকখিবা অদু হৌজিক লোয়শিল্লক্লবা মরমনা আগস্টকী অহানবা চয়োল অসিদা কোভিদ কেয়ার সেন্তর অসি মীয়ামদা শিন্নরগনি হায়খি। জিরিবামদা কোভিদ কেয়ার সেন্তর অমা হাংদোকপা অসিনা জিরিবামদগী ইম্ফাল তান্না কোভিদ পেসেন্টশিং পুদুনা চৎপদা খুদোং চাদবা কয়া মায়োক্নরম্বা অদু কোকলগনি। Pao asi YouTube ta yengbiyu 


কোভিদ ১৯ গী লায়চৎ অসিনা ঙরাং য়ামখ্রবা মীওই ২১১২ গী মশাদা পোজিতিব ওইবা থেংনখ্রে। মসিগী মনুংদা মীওই ২৮৩ না কামরূপ মেত্রোদগী, ২১০ না কামরূপত রুরেলদগী, মীওই ২১১ নগাঁও জিলাদগী অদুগা সোনিতপুর জিলাদা শুপ্না মীওই ১৩২ গী মশাদা লায়চৎ অসিনা নাবা থেংনখি। অদুগা । মসিগা লোয়ননা আসামদা অপুনবা পোজিতিব ওইখিবা কেস মশিং ৩৬,২৯৫ শুখ্রে। অমরোমদা ঙরাং য়ামখ্রবা মীওই ১২৪৮ ফদুনা হোসপিতালদগী য়ুমদা হনখ্রে। আসামদা লায়চৎ অসিদগী ফদুনা য়ুমদা হনখিবা মীগী মশিংনা পুন্না ২৯,০৮০ ওইখি। অদুগা লায়চৎ অসিনা মরম ওইরদুনা লাইয়েং চৎথদুনা লৈরিবা একতিব কেসকী মশিংনা ৯২৩০ নি। ঙরাং মীওই ২ লায়চৎ অসিনা শিখিবগা লোয়ননা রাজ্য অসিদা শিখিবা মীগী মশিংনা ৯৪ শুখ্রে। ঙরাং লৈখিদবা মীওইশিং অদুদি কামরূপ মেত্রোদগী আলেপসি জামির চহী ৫৭ অমসুং দরং জিলাদগী স্বপন সাহা চহী ৪৫ নি। ৱাফমশিং অসি রাজ্যগী হকশেল মন্ত্রী দা হিমন্ত বিশ্ব শর্মানা মহাক্কী টুইটরদা ঙরাং নুমিদাং ফোঙদোকখিবনি। Pao asi YouTube ta yengbiyu 

বরাক তম্পাকতা ঙরাং মীওই ১৪৭কী মশাদা কোবিদ ১৯ লায়চৎ অসিনা পোজিতিব ওইখ্রে। কাছার জিলাদা মীওই ৯১, হাইলাকান্দি জিলাদা মীওই ২১ অদুগা করিমগঞ্জ জিলাদা মীওই ৩৫ গী মশাদা পোজিতিব ওইবা থেংনখি। মমিং লৈরবা নেফ্রোলোজিস্ত ডঃ মুনিম রাসুল মজুমদার কোভিদ ১৯ চাংয়েংদা পোজিতিব ওইরে। মহাকপু ঙরাং শিলচর মেদিকেল কোলেজ হোসপিতাল পুখৎতুনা লায়েংখ্রে। Pao asi YouTube ta yengbiyu 

মনিপুরগী
হকশেল লোয়শঙদগী ঙরাং জুলাই তাং ৩০ নুমিদাংৱাইরম থোকখিবা চেরোল মতুং ইন্না মীওই ৪৭ পোজিতিব ওইবা থেংনখি। মসিগা লোয়ননা মনিপুরগী অপুনবা কোভিদ ১৯ গী কেস ২৫০৫ শুখ্রে। অমরোমদা লায়েংদুনা লৈরম্বা মীওই ১৯ ফদুনা হোসপিতালদগী ময়ুমদা হনখ্রে। ফদুনা য়ুমদা হনখিবা মীগী মশিং পুন্না ১৬৭২ শুরে। অদুগা লাইয়েং চৎথদুনা লৈরিবা একতিব কেসকী মশিংনা ৮২৯ নি। মনিপুরগী ওইনা ঙরাং লায়চৎ অসিদগী ফরকপগী চাং চাদা ৬৬.৯০ ওইখি। মনিপুরগী ওইনা নহান কোভিদ পোজিতিব ওইবা মীওই অমা লৈখিদ্রবা মতুংদা ঙরাং অমুক নৌনা মীওই ৩ লৈখিদবগা লোয়ননা রাজ্য অসিদা লায়চৎ অসিনা শিবা মীগী মশিং ৪ শুখ্রে। Pao asi YouTube ta yengbiyu 


ভারতকী হকশেল অমসুং য়াইফ-য়ুম্বাল লোয়শঙগী পাউ মতুং ইন্না ঙরাং ফাওবদা ভারতনা লায়চৎ অসিদগী ফরকপগী চাং চাদা ৬৪.৪৪ ওইখ্রে। লায়চৎ অসিনা লায়কন্নরম্বদগী ফরকতুনা ময়ুমদা হনখিবা মীগী মশিং লাখ ১০ হেনখ্রে। হৌখিবা পুং ২৪ অসিদা লায়চৎ অসিনা লৈবাক অসিদা শিখিবা মীগী মশিং ৭৭৫ ওইখি। মসিগা লোয়ননা লৈবাক অসিদা ঙরাং ফাওবদা লায়চৎ অসিনা লৈখিদবা মীগী মশিং ৩৪,৯৬৮ নি। অদুগা লৈবাক অসিগী তোঙান তোঙানবা লায়েংশঙশিংদা লায়েংদুনা লৈরিবা এক্তিব কেসকী মশিংনা ৫,২৮,২৪২ নি। Pao asi YouTube ta yengbiyu 

Post a Comment

0 Comments