ঙসি

বরাক তম্পাক্কী খোমজিনবা পাউ - ২৭ জুলাই ২০২০

বরাক তম্পাক্কী খোমজিনবা পাউ - ২৭ জুলাই ২০২০

ইমালোন মনিপুরীবু আসাম রাজ্যগী এসোসিয়েত অফিসিয়েল লেঙ্গুয়েজ ওইহনগদবনি হায়বগী লেপতনা চঙশিল্লকখিবা খোঙজং মখা চৎথরকপা ওইনা ঙরাংসু মনিপুরী য়ুথস্ ফ্রন্ত অফ আসাম মায়ফানা কাছার জিলাগী লামারগ্রাম, কৃষ্ণপুর, মাদুরগ্রাম, কোরোইকান্দি, চন্দ্রপুর অমসুং ভাত্রি মৈতৈ পাঙল খুন্দা এৱেরনেস কেম্পেইন মপুং ফানা পাঙথোকখি। খোঙজং অসিদা তোঙান তোঙানবা মশক নাইবা মীওইশিংনা ইমালোনবু কন্নবা ঐখোয় পুন্না চঙশিনমিন্নসি হায়না ফোঙদোক্নখি। মীফমদা মায়ফাগী প্রেসিদেন্ত সেরাম হেরাজিৎ, জেনরেল সেক্রেতরী অক্রম লখিকান্ত, আমপালগী প্রেসিদেন্ত এ লিলি, ইমা সনাথোই দেবী, নেসনেল য়ুথ এৱার্দি কেঐইচ কৃষ্ণমোহন সিং, অজা বিদ্যাপতি সিংহ অমসুং অতৈ মরীওইবা মীওই কয়ানসু থৌরমগা মরী লৈননা ৱা ঙাংখি।
মিজোরামদা লৈরিবা মৈতৈশিংনসু মায়ফানা চঙসিল্লিবা খোঙজং অসিবু মপুঙ ফানা শৌগৎলি হায়না ফোঙদোক্লদুনা মনিপুরী লোনবু আসামগী এসোসিয়েত অফিসিয়েল লেঙ্গুয়েজ ওইহনগদবনি হায়না পোস্তর কেম্পেইনদা শরুক য়াখি।  

লখিপুর সাবদিবিজনগী মনুং চনবদা ফুলেরতল গ্রাম পঞ্চায়েতনা কোনবা মফম গোবিন্দনগরগী অরিবা কালি মন্দিরদা হিন্দু নবজাগরণ সংঘ অমসুং মন্দির কমিতিনা হায়জরকপদগী লখিপুরগী এমএলএ শ্রী রাজদীপ গোৱালানা মহাক্কী লমদমগী চাউখৎ থৌরাংগী দমক লৈরিবা শেনফমদগী মন্দিরগী অকোয়বা ৱাল খাবগী দমক লুপা লাখ ৫ কায়থোকখ্রে। মসিগা লোয়ননা থক্নবা ঈশিং অমসুং খোংহাম্ফম শেমগৎনবগী দমক অতৈ লুপা লাখ ৩ অমসু মখা তানা পীরগনি হায়বগী থাজবা পীরমখি। মন্দির অসি মহাক্কী ইমুং মনুংগী মীওইশিংগা নক্লবা মরী অমা লৈরকখিবনি হায়না ফোঙদোক্লদুনা মহাক্না ঙমজবা খরা মতেং পাংবা ঙমলিবা অসিগীদমক অপেনবা ফোঙদোকখি। 

মনিপুরী লোনবু আসাম সরকারগী এসোসিয়েত অফিসিয়েল লেঙ্গুয়েজ ওইহন্নবগী চংশিল্লিবা আমসু অমসুং মাইফাগী খোঙজংবু শৌগৎলদুনা ওল বরাক ভেলি মনিপুরী জুৱেলরী ওনর্স এসোসিয়েসননা ঙরাং মনিপুরী জুৱেলরী ওনর্সশিংগী মীফম পাঙথোকপগা লোয়ননা পোস্তর কেম্পেইন অমসু শিল্লাংখি।

মনিপুরী লোনবু আসামগী এসোসিয়েত অফিসিয়েল লেঙ্গুয়েজ ওইহনগদবনি হায়না চঙশিল্লকখিবা খোঙজংগা মরী লৈননা আসামগী মনিপুরীশিংনা তাল্লিবা দাবি অসিবু মপুং ফাহনবদা মতেং ওইগদৌরিবা চেঞ্জ দোত ও আর জি গী খুৎথাংদা চৎথরিবা ওনলাইন পিতিসনদা সিগনেচর থাবগী খোঙজংসু লেপ্পা লৈতনা চৎথরি। পিতিসন অসিদা ওনলাইনদা সাইনআপ তৌরিবা মীগী মশিং লিশিং ৫ নকশিল্লকখ্রে। মীয়াম্নসু হায়রিবা পিতিসন অসিদা সাইনআপ তৌবিনবা অমসুং লিঙ্ক সেয়ার তৌবিনবা হায়জরি। পিতিসন অসিগী লিঙ্ক মখাদা হাপচরি। লিঙ্ক অসিদা ক্লিক তৌবিরবা মতুং অদোমনা অদোমগী মীং অমসুং ইমেল এদ্রেস হাপ্লবা মতুংদা সাইন দিস পিতিসন হায়বসিদা ক্লিক তৌবিদুনা সাইনআপ তৌগদবনি। 

Please sign the petition to support securing the future of Manipuri language in Assam:


আসামদা কোভিদ ১৯ গী লায়চৎ অসিনা ঙরাংখক্তদা য়ামখ্রবা মীওই ১১৪২ গী মশাদা পোজিতিব ওইবা থেংনখ্রে। মসিগী মনুংদা মীওই ১৭১ গুৱাহাতিদগী, মীওই ১৮৮ না কামরুপ জিলাদগী অদুগা মীওই ১০০ না দরং জিলাদগীনি। মসিগা লোয়ননা আসামগী অপুনবা পোজিতিব ওইখিবা কেস ৩২,২২৮ শুখ্রে। অমরোমদা আসামদা লায়চৎ অসিদগী ফদুনা য়ুমদা হনখিবা মীগী মশিংনা পুন্না ২৩,০৫৫ শুরে। অদুগা লাইয়েং চৎথদুনা লৈরিবা একতিব কেসকী মশিংনা ৯০৯১ নি। ঙরাং মীওই ২ লায়চৎ অসিনা শিখিবগা লোয়ননা রাজ্য অসিদা শিখিবা মীগী মশিংনা ৭৯ শুখ্রে। ঙরাং লৈখিদবা মীওইশিং অদুদি অদুদি তিনসুকিয়া জিলাদগী শ্রীমতি বৈশাখী রোয় চহী ৫৩ অমসুং দিব্রুগর জিলাদগী বিরেন্দ্র সাহ চহি ৫০ নি। ৱাফমশিং অসি রাজ্যগী হকশেল মন্ত্রী দা হিমন্ত বিশ্ব শর্মানা মহাক্কী টুইটরদা ঙরাং নুমিদাং ফোঙদোকখিবনি।

ঙরাং নোঙাল্লমদাই পুং ১ গা মি ৪০ রোম তাবা মতমদা জিরিবামগী কালিনগরদা লৈবা মতম কুইনদগী শিজিন্নদনা লৈরকখ্রবা নীহার টোকিজ সিনেমা হোল মৈনা তুম্না চাকখ্রে। সিনেমা হোল অসি মতম কুইনদগী কোর্ততা কেস অমসু চৎথদুনা লৈবনি হায়রি। থৌদোক অসি কনাগুম্বা খরানা অতম্ননা মৈ থারম্বা ওইগনি হায়না চীংনরি। জিরিবামগী ফায়ার সার্বিসতগী ফংবা পাউ মতুং ইন্না কালিনগরদগী মৈনম প্রীয়কুমার কৌবা মীওই অমনা ঙরাং নোংঙাল্লমদাই পুং ২ রোম তাবদা জিরিবামগী ফায়ার সার্বিসতা মৈ চাকপগী পাউ পীরকপদগী খুদক্তা মৈ কনবগী থবক চৎথখি । অদুবু অয়াম্বা শরুকতি মৈনা তুম্না চাকতুনা লৈরমলে হায়রি। চাউরাক্না লুপা লাখ ২০ রোমগী ওইগদবা মপোৎ মচৈ মৈনা তুমনা চাকখ্রে হায়না জিরি নিউজ নেতৱার্কনা পীরকপা পাউ অসিনা মখা তারি। 
জিরিবাম দিসিগী মীৎয়েং মখাদা জিরিবাম এদমিনিস্ত্রেসন অমদি জিরি দেভলপমেন্ত ওর্গেনাইজেসন জেদিও অনিনা কোভিদ ১৯ না পোজিতিব ওইখিবা কন্তেইনমেন্ত জোনদা লৈরিবা ইমুংশিংদা চেং হৱাই আলুনচিংবা নহান্দগী হৌনা য়েনবগী থবক চৎথরকখিবা ঙরাং লোয়শিনখ্রে। য়ুমকোক ৯৪ গী মীওই ৩৯৭ তা পোৎলমশিং অসি য়ুম য়ুমদা চৎতুনা য়েনথোকখি হায়না জিরি নিউজ নেতৱার্কনা পীরকপা পাউ অসিনা মখা তারি। নাকল অমরোমদা জিরাবামদা হান্না কন্তেইনমেন্ত জোননি হায়না লাউথোকখ্রবা মফমশিং মরুওইনা গুলারথোল, উচাথোল, সোরোক অতিংবী খুনৌ, বিদ্যানগর, হরিনগর, লমলেন, দিবোং, কদমতলা, চীংদোংলৈকায়, কালিনগর, বাবুপারা নচিংবা মফমশিং অসিদা সার্ভিলেন্স সর্ভে লোয়খিবগা লোয়ননা চীংনবা মীওইশিং লোয়না তেস্ত তৌবদা রিজাল্ত নিগেতিব ওইরে। মরম অদুনা কন্তেইনমেন্ত ওইবা মফমশিং অসি ফ্রি জোন ওইরে হায়না জিরিবামগী দিসি না নহান থোকপা ওর্দর অদুদা পল্লি।

মনিপুরগী হকশেল লোয়শঙদগী ঙরাং নুমিদাংৱাইরম থোকখিবা চেরোল মতুং ইন্না মীওই ৫৯ নৌনা পোজিতিব ওইবা থেংনখি। মসিগা লোয়ননা মনিপুরগী অপুনবা কোভিদ ১৯ গী কেস ২২৩৫ শুখ্রে। অমরোমদা লায়েংদুনা লৈরম্বা মীওই ১ ফদুনা হোসপিতালদগী ময়ুমদা হনখ্রে। ফদুনা য়ুমদা হনখিবা মীগী মশিং পুন্না ১৫২১ শুরে। অদুগা লাইয়েং চৎথদুনা লৈরিবা একতিব কেসকী মশিংনা ৭১৪ নি। মনিপুরগী ওইনা ঙরাং লায়চৎ অসিদগী ফরকপগী চাং চাদা ৬৮.০৫ ওইখি।

অৱাং নোংপোক্কী মফমশিংদগী য়েংবদা ফজরবা ৱাদগী ঈশিং থক্নবা বোতল অমদি অতৈ নোংমগী ওইবা শিজিন্নবা য়াবা পোৎলমশিং কয়া শাদুনা পুথোকলি হায়না প্রধান মন্ত্রী নরেন্দ্র মোদিনা ঙরাং মহাক্কী মনকী কী বাত থৌরমদা ফোঙদোকখ্রে। ঈশিং থক্নবা বোতল অমসুং তিফিন বোক্স কয়া অমা ক্বালিতি লৈনা পুথোরকলি, পোৎথোকশিং অসিনা খুৎশা হৈরবা মীওই কয়াদা থবক পীবতা নত্তনা ইকো ফ্রেন্দলি ওইহল্লি হায়না প্রধান মন্ত্রীনা ফোঙদোকখি। কার্গিলগী লানফমদা থৱাইনা পোন্থা পীখ্রবা লান্মীশিংদসু মহাক্না ইকাই খুম্নবা উৎখি।

ভারতকী হকশেল অমসুং য়াইফ-য়ুম্বাল লোয়শঙগী পাউ মতুং ইন্না ঙরাং ফাওবদা ভারতনা লায়চৎ অসিদগী ফরকপগী চাং চাদা ৬৩.৯১% ওইরে। লায়চৎ অসিনা লায়কন্নরম্বদগী ফরকতুনা ময়ুমদা হনখিবা মীগী মশিং ৮,৮৫,৫৭৬ ওইরে। হৌখিবা পুং ২৪ অসিদা লায়চৎ অসিনা লৈবাক অসিদা শিখিবা মীগী মশিং ৭০৫ ওইখি। মসিগা লোয়ননা লৈবাক অসিদা ঙরাং ফাওবদা লায়চৎ অসিনা লৈখিদবা মীগী মশিং ৩২০৬৩ নি। অদুগা লৈবাক অসিগী তোঙান তোঙানবা লায়েংশঙশিংদা লায়েংদুনা লৈরিবা এক্তিব কেসকী মশিংনা ৪,৬৭,৮৮২ নি।