বরাক তম্পাক্কী খোমজিনবা পাউ ২৫-০৭-২০২০

বরাক তম্পাক্কী  খোমজিনবা পাউ  ২৫-০৭-২০২০

ইমালোনবু আসাম সরকারগী এসোসিয়েত অফিসিয়েল লেঙ্গুয়েজ ওইহনবগী খোঙজং মথং মথং লেপতনা চৎথরকপগা লোয়ননা ঙরাং সোনাই কন্সতিতিয়েন্সিগী মনুং চনবদা লৈবা লামারগ্রাম খুনৌ নহারোল নিঙোল অমদি মৈরাপায়বীশিংনা খুৎশম্নদুনা লমারগ্রাম খুনৌগী মহাদেব মন্দিরদা মীফম অমা পাঙথোকখ্রে। মীফমদা সিঐইচ লোইদাম দেবী, ওইনাম বিরেন্দ্র, চীংসুবম নবকুমার সিংহ, আমপালগী প্রেসিদেন্ত এ লিলি সিংহ, আমপালগী ভাইস প্রেসিদেন্ত ইমা সনাথোই দেবী, মাইফাগী প্রেসিদেন্ত সেরাম হেরাজিৎ, মাইফাগী জেনরেল সেক্রেতরী অক্রম লখিকান্ত, টিঐচ সাবিত্রি নচিংবা মীওইশিংনা দাইসতা ফমখি। থৌরমগী ৱাহৌদোক পীরদুনা মাইফাগী ফাইনেন্স সেক্রেতরী চীত্তরঞ্জন সিংনা আসামদা ঐখোয়গী ফংফম থোকপা হক্ পীয়ু হায়দুনা ঐখোয় অমত্তা ওইনা লাউমিন্নবা তায় নত্রগদি ঐখোয়গী তুংগী মীরোল সোইদনা মুৎখ্রগনি হায়বগী চীংনদবা ঙম্লকত্রে হায়খি। অক্রম লখিকান্তনা মন্ত্রী হিমন্ত বিশ্ব শর্মানা ঐখোয়বু থৌওইবিদ্রে, ৱার্দ মৈতৈ কনভেন্সনদা মনিপুরগী চীফ মিনিস্তরনা আসামদা মনিপুরীশিংনা ফংফম থোকপা হক্ ফংগনি হায়না লাউথোকপীরম্বদু হৌজিকতি করি ওইরকলে, সিএমনা হায়খিবা ৱা ঙাকপিদবা হায়বসি লাইবক থীবনি হায়খি। রিটয়ার্দ প্রিন্সিপাল সিঐইচ নবকুমার সিংহনা আসামদা লৈরিবা লূপ কয়ামরুমনা লখিপুরদা জুন তাং ২১ দা লৌখিবা ৱারেপকী মতুং ইন্না মাইফানা চঙশিল্লকপা খোঙজংনি অদুনা ঐখোয় অমত্তা ওইনা শৌগৎমিন্নসি হায়খি। (জিরি নিউজ নেতৱার্ক) 

সিলচর দুরদর্শন কেন্দ্র না লমদমসিগী থৌরম শন্দোক্লমবদগী হন্দকতা গৌহাতি দুরদর্সনগী রিলে সেন্তর ওইনা ওন্থোরকপগী মতাংদা ঙরাং শিলচরগী তোঙান তোঙানবা লূপ ৩৪ না খুৎশম্নদুনা শেম্বা সম্মিলিত সাংসক্রিতিক মঞ্চ, শিলচরনা পেন্দবগী খোল্লাউ লাউখ্রে। শিলচরদা লৈরিবা দুরদর্শন কেন্দ্র অসি হৌখিবা চহী কয়াগী মমাংদগী নোংমগী ওইনা নুংথিল পুং ৩ দগী নুংথিল পুং ৬-৩০ ফাওবগী টাইম স্লোততা থৌরম শন্দোকতুনা লাকখিবনি। অদুবু ইখঙ খঙহৌদনা হৌখিবা জুনগী তাং ২৯দা থোকখিবা চেরোল অমগী মতুং ইন্না প্রোগ্রাম শন্দোকপগী মহুত্তা শুপ্নতগী রিলেখক্তং তৌনবগী ওইনা ওন্থোকখিবনি।
সিলচর দুরদর্শন কেন্দ্র না নেসনেল দুরদর্শন প্রোগ্রাম শন্দোক্লম্বদগী হন্দক চুম্নতগী রিলে সেন্তরদা ওন্থোরকপগী মতাংদা ওল ইন্দিয়া মহিলা কংগ্রেসকী নেসনেল প্রেসিদেন্ত অমসুং হান্নগী শিলচরগী এমপী সুস্মিতা দেবনা ইনফোর্মেসন অমসুং ব্রোদকাস্তিংগী মন্ত্রী শ্রী প্রকাশ জাব্রেকরগী মফমদা হীরমসিগী মতাংদা পেন্দবা ফোঙদোকখ্রে। হায়রিবা দুরদর্সনগী কেন্দ্র অসিদগী বেঙ্গলি, মনিপুরী অমসুং দিমাসা য়াওনা লমদমসিগী লোকেল থৌরমশিংসু সন্দোকতুনা লাকখিবনি। দুরদর্সন কেন্দ্র অসিবু হান্নগী ফিবমদা হনজিলহন্দুনা লোকেল প্রোদাক্সন অমসুং তেলিকাস্ত তৌবিনবা হায়জখ্রে।
নাকল অমরোমদা, থেংনা ফংবা পাউ অমদা শিলচর দুরদর্শন কেন্দ্র দগী হৌজিক্কী ওইনা প্রোগ্রাম শন্দোকপা তোকপগী ৱাফম লৈতে হায়না প্রসার ভারতীগী সিইও সশী এস ভেম্পতী না মহাক্কী টুইটরগী ৱারোলদা ঙরাং ফোঙদোকখ্রে। শিলচর দুরদর্শন কেন্দ্রদগী থৌরম শন্দোকপা তোক্লগনি হায়না অরানবা পাউ শন্দোকপগী মতাংদা মহাক্না পেন্দবা ফোঙদোরকখ্রে। 

Lakhipuronline gi Pao sing asi YouTube ta tabiyu

সিঙ্গেরবন্দ হায়স্কুলগী মহৈরোইশিংগী দমক চৎথরকখিবা ওনলাইনগী ক্লাসতা মহৈরোই খরদা এন্দ্রোইদ মোবাইল লৈতবনা ওনলাইন ক্লাসতা শরুক য়াবগী খুদোংচাবা ফংখিদবা মহৈরোইশিংদা স্কুল অসিগী মাইগৈদগী ক্লাস সিক্স, সেভেন অমসুং ঐইত তা তম্লিবা মহৈরোইশিংদা জুলাইগী তাং ২৩ দা ওনলাইন ক্লাসতা পীখিবা লার্নিং মেতরিয়েলশিং হার্দ কোপি ওইনা খুৎশিন্নখ্রে। স্কুল অসিগী হেদমাস্তার, অজাশিং অমসুং এসএমসি গী প্রেসিদেন্ত য়াওনা হোৎনদুনা থৌরাং তৌখিবা ওনলাইনগী খুৎথাংদা তাকখিবা সাবজেকশিংগী অইবা ৱাহং অমসুং পাউখুমগী হার্দ কোপিশিং মহৈরোইশিংদা পীখি। হৌজিক ওইরিবা কোভিদ ১৯ গী লাইচৎ অসিগী য়েংদুনা লৈঙাকনা পীবা চৎন পথাপ মতুং ইন্না সোসিয়েল দিস্তেন্সিং অমসুং মাস্ক শিজিন্নদুনা মহৈরোই অমসুং ওজাশিংনা হার্দ কোপিশিং অদু মহৈরোইশিংগী মফমদা শিন্নখি। নুমিৎসিদা লাকপা ঙমহৌদবা মহৈরোয়শিংনা স্কুলসিদা লাকতুনা মখোয়গী হার্দকোপিশিং লৌরনবা স্কুলগী মাইগৈদগী ফোঙদোরকলি।
Lakhipuronline gi Pao sing asi YouTube ta tabiyu

আসামদা কোভিদ ১৯ গী লায়চৎ অসিনা ঙরাংখক্তদা য়ামখ্রবা মীওই ১১৩০ গী মশাদা পোজিতিব ওইবা থেংনখ্রে। মসিগী মনুংদা মীওই ৪১৭ গুৱাহাতিদগী, মীওই ১০৪ না কাছার জিলাদগীনি। মসিগা লোয়ননা আসামগী অপুনবা পোজিতিব ওইখিবা কেস ২৯,৯২১ শুখ্রে। অমরোমদা আসামদা লায়চৎ অসিদগী ফদুনা য়ুমদা হনখিবা মীগী মশিংনা পুন্না ২০,৬৯৯ শুরে। অদুগা লাইয়েং চৎথদুনা লৈরিবা একতিব কেসকী মশিংনা ৯১৪৩ নি। ঙরাং ইনৌ নৌনা মীওই ৬ লায়চৎ অসিদগী লায়কন্নবা ঙমদনা শিখিবগা লোয়ননা রাজ্য অসিদা শিখিবা মীগী মশিংনা ৭৬ শুখ্রে। লৈখিদবা মীওইশিং অদুদি করিমগঞ্জতগী হালিম লস্কর চহী ৭৫ অমসুং আলেকজান বিবি চহী ৫৫, নলবারীদগী সরাফুদ্দিন অহমদ চহী ৫৪, কামরুপ মেত্রোদগী শ্রীমতি পার্বতী দাস চহী ৮৫, প্রফুল্লো শর্মা চহী ৬০ অমসুং সারোজ কুমার মজুমদারনি। ৱাফমশিং অসি রাজ্যগী হকশেল মন্ত্রী দা হিমন্ত বিশ্ব শর্মানা মহাক্কী টুইটরদা ঙরাং নুমিদাং ফোঙদোকখিবনি।
Lakhipuronline gi Pao sing asi YouTube ta tabiyu

মনিপুর লৈঙাকনা থোকখিবা চেরোল অমগী মতুং ইন্না মনিপুর শিনবা থুংনা লোকদাউন লাউথোকখিবগা ইরোইননা জিরিবামগী দিস্ত্রিক মেজিস্ত্রেত দব্লিউ মালেমঙানবা চেংলৈ আইএএস না নহান থোকখিবা য়াথং অমদা জিলা অসিদসু জুলাইগী তাং ২৩ নুংথিলগী পুং ২ দগী হোম দিপার্তমেন্তনা লাউথোকখিবা লোকদাউন অদু জিরিবাম দসু চৎনবা হৌখ্রে। লোকদাউন মনুংগী ওইবা চৎন পথাপশিং লাউথোকখিবগা লোয়ননা দুকান থোং লোনখ্রে, লম্বী সোরোকতা মী অমত্তা থোক্নখিদ্রে। লমদম অসিদা পুলিসশিংনা চেকশিন্না ঙাকশেনবগী থবক চৎথবা হৌখ্রে। (জিরি নিউজ নেতৱার্ক) 
Lakhipuronline gi Pao sing asi YouTube ta tabiyu

মনিপুরগী হকশেল লোয়শঙদগী ঙরাং নুমিদাংৱাইরম থোকখিবা চেরোল মতুং ইন্না মীওই ৩১ নৌনা পোজিতিব ওইবা থেংনখি। মসিগা লোয়ননা মনিপুরগী অপুনবা কোভিদ ১৯ গী কেস ২১৪৬ শুখ্রে। ঙরাং পোজিতিব ওইখিবশিং অদুদি চুরাচান্দপুরদগী ১, ইম্ফাল ইস্ততগী ১, ইম্ফাল ৱেস্ততগী ১১, ৩৭শুবা এআর জিরিবামদগী ১১, থৌবালদগী ৫ অদুগা উখ্রুলদগী মীওই ২ গী মশাদা লাইচৎ অসিনা পোজিতিব ওইখি। অমরোমদা লায়েংদুনা লৈরম্বা মীওই ৩১ ফদুনা হোসপিতালদগী ময়ুমদা হনখ্রে। ফদুনা য়ুমদা হনখিবা মীগী মশিং পুন্না ১৪৯১ শুরে। অদুগা লাইয়েং চৎথদুনা লৈরিবা একতিব কেসকী মশিংনা ৬৫৫ নি। মনিপুরগী ওইনা ঙরাং লায়চৎ অসিদগী ফরকপগী চাং চাদা ৬৯.৪৭ ওইখি।
Lakhipuronline gi Pao sing asi YouTube ta tabiyu

ভারতকী হকশেল অমসুং য়াইফ-য়ুম্বাল লোয়শঙগী পাউ মতুং ইন্না ঙরাং ফাওবদা ভারতনা লায়চৎ অসিদগী ফরকপগী চাং চাদা ৬৩.৪৫% ওইরে। লায়চৎ অসিনা লায়কন্নরম্বদগী ফরকতুনা ময়ুমদা হনখিবা মীগী মশিং ৮,১৭,২০৮ ওইখি। হৌখিবা পুং ২৪ অসিদা লায়চৎ অসিনা লৈবাক অসিদা শিখিবা মীগী মশিং ৭৪০ ওইখি। মসিগা লোয়ননা লৈবাক অসিদা ঙরাং ফাওবদা লায়চৎ অসিনা লৈখিদবা মীগী মশিং লিশিং ৩০,৬০১ নি। অদুগা লৈবাক অসিগী তোঙান তোঙানবা লায়েংশঙশিংদা লায়েংদুনা লৈরিবা এক্তিব কেসকী মশিংনা ৪,৪০,১৩৫ নি।

Lakhipuronline gi Pao sing asi YouTube ta tabiyu