বরাক তম্পাক্কী খোমজিনবা পাউ - ২৩ জুলাই ২০২০

বরাক তম্পাক্কী খোমজিনবা পাউ - ২৩ জুলাই ২০২০

লক্ষীপুরওনলাইন ২৩ জুলাই :- আসাম মনিপুরী মৈরা পায়বী লূপ (আমপাল) গী সেন্ত্রেল কমিতি গী মীফম অমা কাছারগী রোংপুরদা লৈবা মৈরা পায়বীগী লোয়শঙদা ঙরাং পাঙথোকখ্রে। মীফমনা মনিপুরী লোনবু আসাম সরকারগী এসোসিয়েত অফিসিয়েল লোন ওইহনগদবনি হায়বগী খোঙজং অসি মপুঙ ফানা শৌগৎচগনি লোয়ননা ইমালোনগী দমক লূপ খুদিংমকনা হীরমসিদা চঙশিল্লকপা খোঙজংশিংদা শৌগৎকনি হায়না ৱারেপ লৌখি। মীফমদা অমপালগী প্রেসিদেন্ত এ লিলি সিংহ, ভাইস প্রেসিদেন্ত ইমা সনাথোই, সেক্রেটরী প্রোভা দেবী, অফিস সেক্রেতরী মাধবী দেবী নচিংবা মীওইশিংনা শরুক য়াখি। আমপালগী প্রেসিদেন্ত এ লিলি সিংহ না ঙসি আসাম মনিপুরী মৈরা পায়বী অপুনবা লূপ (আমপাল) গী একজিকিউতিব বোদিগী মীফম ফমদুনা ৱারেপ কয়া লৌরে হায়খি।  ৱারেপশিং অদুগী মনুংদা আসাম সরকারদা মনিপুরী লেঙ্গুয়েজপু আসামগী এসোসিয়েত অফিসিয়েল লেঙ্গুয়েজ ওইহনবিয়ু অমদি আসামগী তোঙান তোঙানবা সি এস ও শিংনা মনিপুরী লোনগী মতাংদা চঙশিল্লকপা খোঙজংশিংদা মপুঙ ফানা শৌগৎকনি হায়খি।(JNN) পাউ অসি YouTube তা য়েংবিউ।

 

লক্ষীপুরওনলাইন ২৩ জুলাই :- কাছার জিলাগী সোনাই মঙ্গলপুরদা অপুনবা নহারোল মঙ্গলপুর (এএনএম) না শিল্লাংদুনা মঙ্গলপুর খা মাণ্ডপতা মনিপুরী লোনগী মতাংদা এৱারনেস কেম্পেইন অমা পাঙথোকখ্রে। থৌরম অসিদা প্রেসিদিয়াম মেম্বর ওইনা বাবা সিংহ, কুঞ্জমোহন সিংহ, আম্পালগী প্রেসিদেন্ত এ লিলি সিংহ, মায়ফাগী প্রেসিদেন্ত সেরাম হেরাজিৎ সিংহ, মায়ফাগী জেনরেল সেক্রেতরী অক্রম লখিকান্ত নচিংবা মীওইশিং য়াওখি। অপুনবা নহারোল মঙ্গলপুরগী মেম্বর তোম্বী সিংহ না মনিপুর লোন অসি আসাম সরকারগী এসোসিয়েত অফিসিয়েল লোন ওইহনগদবনি, খোঙজং অসিদা নিংহন্নবা লৈতনা থৱাই হকচাং য়াওনা শৌগৎপগা লোয়ননা থৱায় থাব ফাওবদা নীঙহন্নজরোই হায়খি। মায়ফাগী ইচিন ইনাউশিংবু অপুনবা নহারোল মঙ্গলপুরনা থৱায় হকচাং য়াওনা শৌগৎচরি হায়খি।  

সোনাই ঝরাগুলদসু ঝরাগুল য়ুথ ওর্গেনাইজেসন না শিল্লাংদুনা ঙরাং ঝরাগুলদা মনিপুরী লোনবু আসাম সরকারগী এসোসিয়েত অফিসিয়েল লোন ওইহনগদবনি হায়বগী দাবী তৌরদুনা ৱাকৎ খোঙচৎ অমা চৎখি।(JNN) পাউ অসি YouTube তা য়েংবিউ।

লক্ষীপুরওনলাইন ২৩ জুলাই :- আসামদা কোভিদ ১৯ গী লায়চৎ অসিনা ঙরাংখক্তদা য়ামখ্রবা মীওই ৯৭২ গী মশাদা পোজিতিব ওইবা থেংনখ্রে। মসিগী মনুংদা মীওই ৩৫৪ কামরূপ মেত্রোদগী, যোরহাততগী মীওই ৫১ অদুগা পোজিতিব ওইখি। মসিগা লোয়ননা আসামগী অপুনবা কেস ২৭,৭৪৪ ওইখ্রে। অমরোমদা আসামদা রাজ্য অসিগী তোঙান তোঙানবা লায়েংশঙশিংদা লায়েংদুনা লৈরম্বা মীওই ১৩১৭ ফদুনা হোসপিতালদগী ময়ুমদা হনখ্রে। ঙরাং ফাওবদা রাজ্য অসিদা লায়চৎ অসিদগী ফদুনা য়ুমদা হনখিবা মীগী মশিং পুন্না ১৯,৩৫০ শুরে। অদুগা লাইয়েং চৎথদুনা লৈরিবা একতিব কেসকী মশিংনা ৮৩২৫ নি। ঙরাং ইনৌ নৌনা মীওই ২ অমগা লায়চৎ অসিনা শিখিবগা লোয়ননা রাজ্য অসিদা শিখিবা মীগী মশিংনা ৬৬ শুখ্রে। লৈখিদবা মীওইশিং অদুদি যোরহাততগী অলোক ঘোস চহী ৫৪ অমসুং কামরূপ মেত্রোদগী হারেন বোড়ো চহী ৪৭ নি।  পাউ অসি YouTube তা য়েংবিউ।

লক্ষীপুরওনলাইন ২৩ জুলাই :- কোবিদ ১৯ গী হৌজিক ওইরক্লিবা ফিভম অসিদা লায়চৎ অসি মখা তানা শন্দোরকপা থীংননবা হোৎনবদা মতেং পাংনবা ধর্মগী লুচিংবশিংদা কাছার জিলাগী দিসিনা হায়জখ্রে। জিলা লৈঙাক লোয়শঙগী কনফারেন্স হোলদা ঙরাং পাঙথোকখিবা মীফমদা কাছার জিলাগী দিসি কীর্তি জোল্লিনা কোভিদ ১৯ গী লায়চৎ অসি ঙাকথোক্নবা লৈঙাকনা পীরিবা চৎন পথাপশিং নিংথিনা ইন্দুনা চৎনবা ধর্মগী লুচিংবশিংদা হায়খি। লৈঙাক্কী গাইদলাইনদা য়াওরিবা লাইফম মনুংদা পুং ১ গী ওইবা মতমগী মনুংদা মীওই ২০ দগী হেন্না তীলহন্দবা হায়বা ৱাফম ফোঙদোকপগা লোয়ননা তঙাইফদনা মাস্ক শিজিন্ননবা হায়খি। লায়চৎ অসিনা হৌজিক ওইরিবা ফিভম অসিদা মন্দির, মসজিদ অমসুং গীর্জা নচিংবদা মীয়াম তীন্দুনা লাই খুরুম্বগী মহুত্তা ধর্মগী ওইবা লাইনিং লাইশোনশিং য়ুম য়ুমদা ওইনা পাঙথোক্নবা হায়খি। পাউ অসি YouTube তা য়েংবিউ।

লক্ষীপুরওনলাইন ২৩ জুলাই :- মনিপুরদা কোভিদ ১৯ গী কেস মশিং হেনগৎলকপগা লোয়ননা মখা তানা লায়চৎ অসি শন্দোরকপা থীংননবগী চেকশিন থৌরাং লৌখৎপা ওইনা মনিপুর শিনবা থুংনা লোকদাউন লাউথোকখ্রে। ঙরাং ফমখিবা স্তেত কেবিনেত মীফমনা জুলাই ২৩ ঙসি নুংথিল পুং  ২ দগী হৌরগা মনিপুরদা নুমিৎ ১৪ নিগী টোতেল লোকদাউন লাউথোকখিবনি। অহানবগী ওইনা নুমিৎ তরেৎনি লোকদাউন থমলবা মতুংদা ফিভমগী মতুং ইন্না মখাতানা নুমিৎ ৭ নি অমগা লোকদাউন মখা চৎথরবা য়াই হায়না চীফ মিনিস্তরগী টুইটরদা ফোঙদোকলি। মনিপুরগী হকশেল লোয়শঙদগী ঙরাং নুমিদাংৱাইরম থোকখিবা চেরোল মতুং ইন্না মীওই ৪৫ নৌনা পোজিতিব ওইবা থেংনখি। নৌনা পোজিতিব ওইরিবশিং অসিগী মনুংদা চুরাচান্দপুরদগী ১২, ইম্ফাল ইস্ত তগী ৪, জিরিবামদগী ১৩, থৌবাল দগী ৪, সেনাপতীদগী ৫ অমসুং উখ্রুলদগী ৭ য়াওরি।  মসিগা লোয়ননা মনিপুরগী অপুনবা কোভিদ ১৯ গী কেস ২০৬০ শুখ্রে। অমরোমদা লায়েংদুনা লৈরম্বা মীওই ৩৪ ফদুনা হোসপিতালদগী ময়ুমদা হনখ্রে। ফদুনা য়ুমদা হনখিবা মীগী মশিং পুন্না ১৪১৮ শুরে। অদুগা লাইয়েং চৎথদুনা লৈরিবা একতিব কেসকী মশিংনা ৬৪২ নি। মনিপুরগী ওইনা ঙরাং লায়চৎ অসিদগী ফরকপগী চাং চাদা ৬৮.৮৩ ওইখি। পাউ অসি YouTube তা য়েংবিউ।

লক্ষীপুরওনলাইন ২৩ জুলাই :- জিরিবামদা ফোঙবা পাউচে খরদা মনিপুরগী অহানবা ওইনা জিরিবামদা এআর অমা কোভিদ না মরম ওইরগা শিরে হায়না ফোঙখিবা পাউ অদু য়াম্না লাইবক থীবনি, জিরিবাম দা কোভিদ নাদুনা শিখিবা হৌজিক ফাওবগী ওইনা লৈতে হায়না জিরি দিভলপমেন্ত ওর্গেনাইজেসন জেদিও গী প্রেসিদেন্ত এন সদানন্দ মীতৈ না ঙরাং জেদিওগী অফিসদা পাঙথোকখিবা পাউগী মীফম অমদা ফোঙদোকখ্রে। জেদিও না হীরম অসিগী মতাংদা থীজিল্লুবদা জিরিবামগী কদমতলা দা লৈবা ৩৭শুবা এআর গী কাছার জিলাগী পোইলাপুলদা পোস্তিং তাবা এআর পার্সোনেল অমা শিলচর মেদিকেল দা কোভিদ পোজিতিব ওইদুনা শিখিবনি হায়না ফোঙদোকখি। মেদিয়া হাউসনা নত্রগা পাউ পিবিরিবশিংনা কুপনা য়েংশিনবিরগা পাউ ফোঙবিয়ু হায়না ফোঙদোকখি। জিরিবামদা লৈরিবা এদমিনিস্ত্রেসন, পুলিস অমদি সিএসও কয়ানা কোভিদ লায়চৎ অসিদগী কন্ননবা হায়দুনা ঙসি ফাওবা ফ্রোন্তলাইন ৱারিওর অমা ওইনা মীয়ামগী সেবা তৌদুনা লাক্লিবনি হায়খি। অসিগুম্বা য়াম্না পান্দামিক ওইবা লায়না লাইওং অসিগী মরকসিদা মেদিয়া হাওসশিংনা মীয়ামদা মীপায়বা পোকহন্দনবা, পাউ মরীক চুম্না লৌবিরগা ফোঙবিনবা হায়খি। (JNN)

পাউ অসি YouTube তা য়েংবিউ।