ঙসি

খোমজিনবা পাউ ১৭-০৭-২০২০

বরাক তম্পাক্কী  খোমজিনবা পাউ ১৭-০৭-২০২০


শিলচর মেদিকেলদা লায়কন্নরম্বা জানিগঞ্জকী নরায়ন মিত্র ঙরাং লৈখিদ্রে। মশাগী চহী ৭০ শুরবা লল্লোন ইতিক তৌবা মীওই অসি কাছার জিলাগী ওইনা কোরোনা লায়চৎনা শিবা ২শুবা মীওইনি হায়রি। মহাক্কী ইমুং মনুংগী পাউ মতুং মতুং ইন্না মহাক শ্বর নুঙাইতবগী লৈনানা নাদুনা লৈরম্বনি অদুবু মশা নুঙাইরক্তবদগী শিলচর মেদিকেল কোলেজ হোসপিতালদা পুখৎখি। ঙরাং শগোলশেন নুমিৎকী অয়ুকতা মহাক লৈখিদবনি। চাংয়েংদা মহাক কোরোনা লায়চৎনা নারম্বনি হায়বা ৱাফম হোসপিতালগী মাইগৈদগী ফোঙদোরকখি। লৈখিদ্রবা নরায়ান মিত্র সিপিআইএমগী নেতা অমসুং সিনিয়র এদভোকেত দুলাল মিত্রগী ময়াম্বনি। পনবা য়াই, জিলা অসিদা হৌখিবা চয়োলদা নরসিংপুরদগী মশাগী চহী ৮৫ শুরবী শান্তিবালা নাথ কৌবা মীওই অমসু কোভিদ ১৯ লায়চৎ অসিনা লৈখিদবনি। বরাক তম্পাকতা ঙরাং কোভিদ ১৯ পোজিতিব ওইবা মীওই ৩৬ থেংনখি। মসিগী মনুংদা ঙরাং কাছার জিলাদগী ১৭, করিমগঞ্জ জিলাদা ২ অমসুং হাইলাকান্দি জিলাদা মীওই ১৭ পোজিতিব ওইবা থেংনখি। নেসনেল হেল্থ মিসনগী মেদিয়া এক্সপার্ত সুমন চৌধুরীনা ঙরাং শিলচরদা লৈখিদবা মীওই অদু রাজ্যগী কোভিদ ১৯ দেথ ওদিত বোর্দতগী পীরকপা পাউগী লিখুন মতুং ইন্না মহাক লায়চৎ অসিনা নারম্লবসু লৈখিদবা মরমদি অতোপ্পা মরমননি হায়খি।

মনিপুরী য়ুথ ফ্রোন্ত অফ আসাম মায়ফানা মনিপুরী লোনবু আসাম সরকারগী এসোসিয়েত অফিসিয়েল লেঙ্গুয়েজ ওইহনগদবনি হায়না লেপ্তনা চংশিল্লিবা খোঙজংগী মখা তারকপা ওইনা পোস্তর অমদি লিফলেত কেম্পেইন ঙরাংসু কাছার জিলাগী মনুং চন্না লৈবা তোঙান তোঙানবা খুলশিংদা পাঙথোকখি। বেঙ্গলোর দিল্লি অমসুং কোলকাতাদা লৈরিবা মনিপুরী লুপ কয়ানসু কেম্পেইন অসিদা শরুক য়াখিবগী দমক মায়ফাগী প্রেসিদেন্ত সেরাম হেরাজিৎনা থাগৎপা ফোঙদোকখি।

ইচাউনা মরম ওইরদুনা আসামদা খুঙ্গং ২৮ রোম ঈশিংনা লুপশিনখ্রে। ঙরাও ফাওবদা রাজ্য অসিদা ইচাউনা মরম ওইরদুনা মীওই ৬৮ গী পুন্সি মাংহনখ্রে। কাজিরঙ্গা নেসনেল পার্ককী অয়াম্বা শরুক ঈশিংনা থুমজিনখ্রে। কাছার জিলাগী লখিপুরদসু বরাক তুরেলগী ঈশিং ইমায় খংৱাং ৱাঙখৎলে। লখিপুরদা বরাক তুরেল ঙরাং নুমিদাংৱাইরম খুদোংথীবা লৈইদগী সেন্তিমিতর ৩৮ মথক্তা চেনখি।

মনিপুর লৈঙাককী চীফ সেক্রেতরী দাক্তর সুরেস বাবু না থোকখিবা চেরোল অমগী মতুং ইন্না জিরিবাম দিস্ত্রিকতা লায়চৎ অসিদগী ঙাকথোক্নবগী চেকশিন থৌরাং পায়খৎপা ওইনা দিস্ত্রিক অসিদা মখা তানা নুমিৎ ৭ নি মপুঙ ফাবা লোকদাউন অমদি কার্ফিউ থমজিনখ্রে। জুলাইগী তাং ৪ দা থোকখিবা চেরোলদা ঙরাং ফাওবা লোকদাউন অসি থমখিবনি। জিরিবামগী ফিভম অসি খরা ফরকলবসু মখা তানা খরা কুপ্না য়েংশিন্নবা ঙরাংদগী হৌদুনা লাকলিবা জুলাইগী তাং ২২ ফাওবা মখা তানা মপুঙ ফাবা লোকদাউন অমদি কার্ফিউ থমখ্রে। মসিদা জিরিবাম দিসিগী অয়াবা য়াওবা তঙায়ফদনা চঙদবা য়াদবা এসেন্সিয়েল সার্বিসেস্ পার্সোনেলশিং চৎপা য়াগনি অদুগা ইন্তর স্তেট পোৎচৈ পুবা গারীশিং চঙলকপা য়াগনি। মপান্দগী জিরিবামদা চঙলকপা পেসেঞ্জরশিংদি জিরিবামগী হাংলিবা ইন্সতিতিউসনেল ক্বারেন্তাইন সেন্তর শিংদা থমগনি হায়রি।

কোভিদ ১৯ না মরম ওইরদুনা মহৈশঙশিং থোঙ লোনশিনখিবদগী লাইরিক তম্বা ফংদবগী অৱাব অসি খরতা ওইরবসু কান্নবা পীরগদবা মহৈরোইশিংগী দমক লাইরিক হায়না মীংথোনবা জিওগী তিভি চেনেল অমা ঙরাং মনিপুরগী মহৈমশিংগী মন্ত্রী রাধেশ্যামনা হৌদোকখ্রে। জিও তিভিনা মহৈরোইশিংগী দমক ভারত সরকারগা খুৎশম্নদুনা চেনেল ৬৪ হেন্না শন্দোকলি। লাইরিক হায়রিবা চেনেল অসি মোবাইলগী খুৎথাংদা জিও টিভি মোবাইল এপকী মতেংনা লাইভ শন্দোকলি।

আসামদা কোভিদ ১৯ গী লায়চৎ অসিনা ঙরাংখক্তদা য়ামখ্রবা মীওই ৮৯২ গী মশাদা পোজিতিব ওইবা থেংনখ্রে। মসিগী মনুংদা ৫৯৮ গৌহাতি সহরদগী ওইখি। মসিগা লোয়ননা আসামগী অপুনবা কেস ২০,৬৪৬ ওইখ্রে। অমরোমদা আসামদা রাজ্য অসিগী তোঙান তোঙানবা লায়েংশঙশিংদা লায়েংদুনা লৈরম্বা মীওই ৬৬৬ ফদুনা হোসপিতালদগী ময়ুমদা হনখ্রে। ঙরাং ফাওবদা রাজ্য অসিদা ফদুনা য়ুমদা হনখিবা মীগী মশিং পুন্না ১৩,৫৫৪ শুরে। অদুগা লাইয়েং চৎথদুনা লৈরিবা একতিব কেসকী মশিংনা ৭০৩৯ নি। শিখিবা মীগী মশিং ৫০ শুখ্রে। ৱাফমশিং অসি রাজ্যগী হকশেল মন্ত্রী হিমন্ত বিশ্ব শর্মানা মহাক্কী টুইটরগী পাউজেলশিংদা ফোঙদোকখিবনি।

মনিপুরগী হকশেল লোয়শঙদগী ঙরাং নুমিদাংৱাইরম পুং ৭ ফাওবদা থোকখিবা চেরোলগী মতুং ইন্না হৌখিবা পুং ২৪ দা মীওই ৬৪ নৌনা পোজিতিব ওইবা থেংনখি। নৌনা পোজিতিব ওইরিবশিং অসিগী মনুংদা চুরাচান্দপুরদগী ৫, ইম্ফাল ৱেস্ততগী ৩৩, ককচীংদগী ১, কামজোংদগী ১, তমেংলোংদগী ৩, থৌবালদগী ১, সেনাপতিদগী ১১ অদুগা উখ্রুলদগী ৯ য়াওরি। মসিগা লোয়ননা মনিপুরগী অপুনবা কোভিদ ১৯ গী কেস ১৭৬৪ ওইখ্রে। অমরোমদা লায়েংদুনা লৈরম্বা মীওই ৪৯ ফদুনা হোসপিতালদগী ময়ুমদা হনখ্রে। ফদুনা য়ুমদা হনখিবা মীগী মশিং পুন্না ১১২৯ শুরে। অদুগা লাইয়েং চৎথদুনা লৈরিবা একতিব কেসকী মশিংনা ৬৩৫ নি। মনিপুরগী ওইনা ঙরাং লায়চৎ অসিদগী ফরকপগী চাং চাদা ৬৪ ওইখি।

ভারতকী
হকশেল অমসুং য়াইফ-য়ুম্বাল লোয়শঙগী পাউ মতুং ইন্না ঙরাং ফাওবদা ভারতনা লায়চৎ অসিদগী ফরকপগী চাং চাদা ৬৩.২৫% ওইরে। লায়চৎ অসিনা লায়কন্নরম্বদগী ফরকতুনা ময়ুমদা হনখিবা মীগী মশিং লাখ ৬ লিশিং ১২ হেনখ্রে। হৌখিবা পুং ২৪ অসিদা লায়চৎ অসিনা লৈবাক অসিদা শিখিবা মীগী মশিং ৬০৬ ওইখি। মসিগা লোয়ননা লৈবাক অসিদা ঙরাং ফাওবদা লায়চৎ অসিনা লৈখিদবা মীগী মশিং লিশিং ২৪ গা ৯১৫ নি। অদুগা লৈবাক অসিগী তোঙান তোঙানবা লায়েংশঙশিংদা লায়েংদুনা লৈরিবা এক্তিব কেসকী মশিংনা ৩,৩১,১৪৬ নি।