ঙসি

রেবিজ ভেক্সিন পুথোকখিবগী পুক্নিং নুংশিখ্রবা ৱারী অমা।

লুই পাস্তর (photo credit : https://en.wikipedia.org/wiki/Nadar)


রেবিজ ভেক্সিন পুথোকখিবগী 

পুক্নিং নুংশিখ্রবা ৱারী অমা।


খৃঃকুমজা ১৮৮৫ পেরিস সহরদনি। চহী ৯ রোম শুরবা যোসেফ য়ুমগী থোঙ্গানদা শান্নদুনা লৈরম্মী ... অশেংবা মীং যোসেফ মেস্তার কৌই। যোসেফকী মমা মেদাম মেস্তার ইমুংদা য়ুমগী থবক ইঙ্খাং শুদুনা লৈরম্মী। খঙহৌদনা মচানা হৌনা কপ্পগী মখোল অমা তারম্মী। খুদক্তা চেন্থোরক্লগা থোঙ্গাল্লোমদা য়েংথোকখি ... মীৎমাঙদা উরিবা শক্তমদু উবদা মশাপুম্বা নিকখি।

হুই অমা ... মমিৎ ইরং লং ... মতীল অরর তারদুনা ... চোঙশিন চোঙশিন্দুনা যোসেফকী মখোঙদা হন্জিন হঞ্জিন শরাক তমলি। যোসেফ খাঙবা ৱারদুনা কোয়লাউ লাউরি। তৌফম খঙদ্রদুনা মমানা অফংবা চৈতুপ অমা পায়রগা হুইদু তম্না লংশিনখি ... হুইদু খজিক্তংদি হন্দোকখিবগুম তৌই। ঈ তৈরবা মচীন ময়াদু মরৈনা লেক-লেকতুনা তপ্না তপ্না হুইদু যোসেফপু থাদোক্লম্লগা চৎখি।


হুইদু মশক খঙলে। মখোয়গী থংনবা লৈকায়দা লৈবা অঙাওবা হুইদুনি ... খরনি মমাংদা মী অনি খকসু হুইসিনা চীক্তুনা হোসপিতালদা শিবা চঙবা ফিভমদা লৈরিবনি। মচানিপা যোসেফতা চিক্লিবসু হুই অদুমক্নননি!

মেদাম মেস্তার তৌফম খঙখিদ্রে। মচানিপাবু খুদক্তা মনাক নকপদা লৈবা লায়েংশঙ অমদা পুরে। "ইচাবু কনবিউ দাক্তর বাবু" যোসেফকী মমানা কপ্ল কপ্লদুনা দাক্তরগী মফমদা হায়জখি। দাক্তরনা যোসেফকী হুইনা চীকপা মফমদু দ্রেসিং তৌরগা হায়রকই, "মসিগী হিদাক লৈতে ... কনবা ঙমলোই ... চয়োল অনিদি হিংদুনা লৈগনি ... করিগুম্বা কন্না অরুম হৌরগদি থা অমরোম লৈখিবা য়াই  ...উপায় লৈতে"।

প্না কপ্না দাক্তরগী মখোঙ পায়রদুনা মেদাম মেস্তারনা মচাবু কনবিনবা হন্না হন্না হায়জখি। দাক্তরনা ঙাইহাক ৱাখল তৌরগা হায়রকই, "অসিদগী পংলাপ লাপ্তনা লুই পাস্তর কৌবা কেমেস্ত্রীগী প্রোফেসার অমা লৈবনি। মহাক হুই অঙাওবনা চীকপগী টীকা পুথোক্নবা কন্না হোৎনরি হায়বা তাই। মহাক উনদুনা অমুক্তং য়েংবিয়ু" ।


মানা যোসেফপু পোরদুনা দাক্তরগী মনাক্তগী লুই পাস্তরগী য়ুম তম্না লাকখি। পাস্তরগা উন্নরে। উপায় অমা তৌদুনা মচাবু কনবিনবা পাস্তরগী মফমদা হায়জখি।

পাস্তরনা মেদাম মেস্তারদা ... " চুম্মী ঐহাক হুই অঙাওবনা চীকপগী টীকা অমা পুথোক্নবা কন্না হোৎনরি। হোৎনবগী মঙাল খরসু ফংবা হৌরে। টীকা অসি হুই অঙাওবদা চাংয়েং তৌরে কান্নবসু ফংলে। অদুবু মসি মীওইবদদি চাংয়েং তৌগদবা ৱাৎলি। বিঞ্জানগী লোনদা হায়রগা হিউমেন ত্রাইয়েল তৌদ্রি হায়বা তায়। হিউমেন ত্রাইয়েল তৌদ্রিঙৈগী মমাংদা টীকা অসি মীওইবদা কাপ্পা য়াদ্রি"।

ৱারী শানা শানা মেদাম মেস্তারনা মচাবু তুমথহন্নবা হোৎনরি অদুগা হায়রকই, " ইচাদা চাংয়েং তৌবিবদি করি কায়বা। মাদি অঙাওবা হুইনা চীক্লবনি, ঙসি শিনি হয়েং শিনি হায়বা ঙমদদুনা লৈরবনি। করিগুম্বা অদোমগী টীকা অসিনা ইচাসি হিংবা থোক্লবদি"।


পাস্তর ঙাইহাক খল্লি ... মতৌ করম্না চহী ৯ গী অঙাংসিদা হিউমেন ত্রাইয়েল তৌগদবনো! টীকা অসি মাগী মশাদা খাঙবা ঙমগদ্রা খঞ্জানৈ ...টিকা অসিনা মরম ওইরগা অমুক করিগুম্বা শিখিবা থোক্লবদি কমদৌবা!

পাস্তরনা মাগী থবক তৌমিন্নরিবা মীওইশিং অমসুং যোসেফকী মপাগসু ৱাতান্নখি। ... কায়নথংদা যোসেফকী মশাদা টীকা অসি থীনবদা লেপ্নখি।

পাস্তরনা মহাক্কী লোয়নবশিংগা থৌরাং তৌদুনা যোসেফকী মশাদা টীকা অদু থীনখি। নোংমা ... নিনি ... হুমনি ... থা অমা লানখ্রে ... যোসেফকী মশাদা হুই অঙাওবনা চীকপগী লাইওং অমত্তা উৎলকখিদ্রে ... হিউমেন ত্রাইয়েল মায়পাকলে ... হুই অঙাওবনা চীকপগী টীকা অহানবা ওইনা পুথোকলে!

Person who saves one life saves the entire mankind! লুই পাস্তরগী টীকানা চহী কয়া চুপ্না মীওই লিশিং লিশিংগী পুন্সি কনবা ঙমখি। চহী খরগী মমাং ফাওবদা ভারত সরকারগী লায়েংশঙ শিংদা টীকা অসি সাপ্লাই তৌদুনা লাকখি। বিজ্ঞানগী থীজিনবদি লেপ্পা লৈতে। হিউমেন দিপ্লোইদ সেল কারচার ভেক্সিন কৈথেলদা লাকখ্রবা মতুংদা পাস্তরনা পুথোকখিবা ভেক্সিন শিজিন্নবা থিংজিনখি। অদুম ওইনমক "ফাদার অফ্ মাইক্রোবাইওলোজি" লুই পাস্তরগী মীং মালেম লৈমায় অসিদা সনাগী কালিনা ইদুনা লৈহৌরগনি।



যোসেফকী মশাদা অহানবা ওইনা হিউমেন ত্রাইয়েল তৌখিবা য়ুম অদু ঙসিদি মালেমদা মমিং চৎলবা "পাস্তর ইন্সতিতিউত" শেমগৎতুনা লৈবাক কয়াদগী লাকপা বৈজ্ঞানিকশিংনা থিজিন হুমজিনবগী থবক লেপ্তনা চৎথরি।

দুবু, চহী ৯ গী নিপামচা যোসেফতি কমদৌখ্রবগে? মহাক মশাগী চহী ৬৫ ফাওবা পুন্সিরম্মী। অহানবা পৃথিবীগী লানজাওগী মতমদা মহাক ফ্রান্সকী মতেঙ পাঙদুনা লান য়াওখি। লান মতুংদা লুই পাস্তরনা যোসেফপু পাস্তর ইন্সতিতিউতদা কেয়ারতেকর ওইনা থবক পুহনখি। খৃঃকুমজা ১৯৪০ দা অনিশুবা পৃথিবীগী লানজাওদা জারমননা পেরিস খুদুম চনখি। পাস্তর ইন্সতিতিউতকী বিজ্ঞানিকশিং মাগী মাগী হিংনবা চেন্নখি। যোসেফতি চেনখিদে, পাস্তর ইন্সতিতিউত কনদবা য়াদে খন্দুনা মতোমতা ইন্সতিতিউত অদু ঙাকশেন্দুনা লৈখি।

শাগী চহী ৬৪ শুরবা জোসেফ মেস্তরনা খুৎকন পাঙ্গল্লবা জরমান লান্মীশিংগী মমাংদা পাস্তরগী গেত মনাকতা লেপতুনা লৈখি। নাজীশিংনা মহাকপু তমথিনা ফু-চৈখি। মাগী ইমুং মনুং পুম্‌বা মখোয়না খুদুম চনখি। "পাস্তরগী ইন্সতিতিউত অসিতদি কনবিউ, মসিনা মালেমসিগী মীওই কয়াগী মপুন্সি কনবিখিবনি" হায়না মহাক্না হায়জখি। নুমিত্তু ১৯৪০ গী অক্তোবরগী তাং ২৪ নি, জোসেফ মশাগী সারভিস রিভোলবরনা মশাদা কাপশিনজদুনা শিজখি। হাক্না হায়জখিবা মতুং ইন্না নাজীশিংনা পাস্তর ইন্সতিতিউত মাঙহন তাকহল্লমখিদে।

সি মালেম পুম্বদা কোরোনাভারাসনা লায়চৎ ওইদুনা মীওই কয়াগী পুন্সি মাংহল্লি। মসিগী চপ চাবা ভেক্সিন পুথোকপা ঙমদ্রি। লুই পাস্তরনা মহাক্কী হোৎনবা কনবতনা রেবিস ভাইরাসকী ভেক্সিন পুথোকতুনা মীওই কয়াগী পুন্সি কনজবা ঙমখি। পাস্তর ইন্সতিতিউত ঙসিসু লেঙদনা লৈরি। মালেমগী তোঙান তোঙানবা মফমদগী লাক্তুনা ইন্সতিতিউত অসিদা চাংয়েং কয়ামরুম লেপ্তনা চৎথরি। কোরোনাভাইরাসকী ভেক্সিন ঙসি নত্রগা হয়েংদি শোয়দনা পুথোরক্লগনি হায়বসি অইবগী লেঙদ্রবা আশানি।  

@লোংজম দোরেন্দ্র, longjamdorendra(at)gmail(dot)com