ঙসি

ভারত্তা কোরোনাভাইরাস পোজিতিব ওইরবা মীগী মশিং ৩৪ শুখ্রে।

নোভেল কোরোনাভাইরাসকী মতাংদদি সরকারগী ই-পাউ তাবনা খ্বাইদগী ফরবনি।

মালেমগী তোঙান তোঙানবা মফমদা লায়না লাইচৎ অমা ওইনা শন্দোরক্লিবা নোভেল কোরোনাভাইরাসনা মরম ওইরদুনা ভারত্তা নাবগী মশিং হেনগৎলকলি। মার্চকী তাং ৭ কী অথেংবদা ফংবা পাউগী মতুং ইন্না অনৌবা কেস অহুমগা লোয়ননা ভারত্তা কোরোনাভাইরাস পোজিতিব ওইরবা মীগী মশিং ৩৪ শুখ্রে। কোবিদ-১৯ হায়নসু মীংথোনবা ভাইরাস অসিনা চাইনা খক্তদা শিহনখিবা মীগী মশিং মার্চকী তাং ৭ ফাওবদা ৩০৭০ শুখ্রে। অদুবু ভারতকী ওইনদি হৌজিক ফাওবদা কোরোনাভাইরাসনা শিবগী পাউ লৈত্রি। চাইনাগী মপান্দা অতোপ্পা লৈবাকতা ভাইরাস অসিনা শিহনখিবগী মশিং ৩৩৫ ওইরে। মালেমগী ওইনা মার্চকী তাং ৭ ফাওবদা কোরোনাভাইরাস পোজিতিব ওইরবা মীগী মশিং ৯৮,১৯২ শুরে। 
নিপুরদা য়াওশঙ থাবল চোংবদা গ্লোব উপ্লগা চোংবগী ৱাফম পুখৎলক্লিবা অসিসু লায়না অসিদগী ঙাকথোক্নবগী অফবা খোঙথাং অমনি। রিলায়েন্স জিওনা কোরোনাভাইরাসকী মতাংদা মীয়ামদা ভাব তাহন্নবগী পান্দমদা মার্চকী ৭ তগী হৌরগা মখোয়গী হান্নগী কোলার টিউন অদু ওন্থোকতুনা লোক খুবগী খোনজেলনা হৌরগা ভাইরাস অসিবু ঙাকথোক্নবগী ৱারোল য়াওবা কোলার টিউন ওইনা মীয়ামদা তাহনবা হৌখ্রে। 


হায়নিংলিবা ৱাফমদি কোরোনাভাইরাস ঙাকথোক্নবনি হায়দুনা সোসিয়েল মেদিয়াদা তোঙান তোঙানবা মখলগী হিদাক কয়ামরুম উৎলিবসি থাজবিরোইদবনি। মরমদি হৌজিক ফাওবদা ভাইরাস অসি ঙাকথোক্নবা হিদাক পুথোকপা ঙমদ্রি। অদুগা ভাইরাস অসিবু চামদা চামা ঙাকথোকপা ঙম্মী হায়দুনা ওনলাইনদা পুথোক্নরিবা মাস্কশিং অসিসু থাজবা তৌবিরোইদবনি। 
কোরোনাভাইরাসকী মতাংদা দোক্তরশিংগা তানবিগদবনি লোইননা অকুপ্পা মরোল খঙনবগী দমক ৱার্লদ হেল্ঠ ওর্গেনাইজেসন (দব্লিউ.ঐইচ.ও.) অমসুং ভারত সরকারগী হকশেল লোইশঙগী ই-পাউ খক্তম থাজবা থমগদবনি। নোভেল কোরোনাভাইরাসকী মতাংদা অকুপ্পা মরোলগী দমক ভারত সরকারগী মিনিস্ট্রি অফ হেল্ঠ এন্দ ফেমিলি ৱেলফেয়ারগী হেল্প লাইন নম্বর ৯১-১১-২৩৯৭৮০৪৬ তা নত্রগা ইমেলগী খুৎথাংদা ncov2019@gmail.com দা পাউ ফাওনবনা খ্বাইদগী ফরবনি।
----------------------------------------------------
Get latest News Updates Please Download RadioPaojel Android app CLICK HERE
To Subscribe Lakhipuronline YouTube Channel CLICK HERE