আসামগী ২০২০-২১ বজেত্ কী শম্লপ্পা পাউদম

আসামগী ২০২০-২১ বজেত্ কী শম্লপ্পা পাউদম

তেক্সকী অনৌবা পোৎলুম অমত্তা য়াওদনা মার্চ ৬, ২০২০ ইরাই নুমিত্তা আসাম বিধান সভাদা শেলথুম মন্ত্রি ড. হিমন্ত বিশ্ব শর্মনা ২০২০-২১ শেলথুম চহীগী লুপা কোতি ২,৮০,৩৬০.২৯ গী বজেত্ পুথোকখ্রে। 
হন্দক্কী বজেত্ অসিদা মরুওইনা নুপীওইবীশিং অমসুং শোইনাইরবশিংগী দমক অনৌবা থৌরাং কয়ামরুম পায়খৎকদৌরি। বজেত্ তা নুমলিগর থাউ শুংফমগী ওইনা আসাম সরকারনা চাদা ২৬ হেনগৎহনবগী ৱারেপ লৌরে। অরুন্ধতী সনাগী থৌরাংগী মতাংদা লুহোংগদবী নুপীশিংগী দমক লুহোংবগী মাংওইননা সনা লৈনবগী লুপা ৩০,০০০/- পীবগী ৱাফম লৈরম্বা অদু হন্দক্কী বাজেত্ তা লুপা ৪০,০০০/- দা হেনগৎহনখ্রে। 
মপুরোইবা লৈখিদ্রবীশিংগী মখোয়গী ইমুং মনুংগী তেংবাংগী দমক পীবা পেনসন অমসুং ইন্দিরা মেরি সমাজিক পেনসনগী দমক লুপা কোতি ৯১ কায়থোকলে। হন্দক্কী বজেত্ তা সরকারগী থবক তৌবশিংগী লুহোংদ্রিবী মচানুপী মশাগী চহী ৪০ গী মথক্তা লৈবীশিংদা লুপা ২৫০/- তৌদুনা থাগী পেনসন পীবগী ৱা য়াওরি। হায়রিবা থৌরাং অসিগী দমক লুপা কোতি ৫০৫ কায়থোক্কনি। 
কনকলাতা মহিলা সবলীকরন থৌরাংগী মখাদা জীবিকা সখি হায়না মিংথোনবা খুঙ্গংগী থবকশুবীশিংগী দমক স্কুতি পীবা য়াওনা থাগী বেতন লুপা ৫০০/- তৌদুনা পীবগী ৱাফম হন্দক্কী বজেত্ তা য়াওরি। অসিতা নত্তনা প্রজ্ঞান ভারতী থৌরাংগী মখাদা গ্রেজুয়েসন ফাওবগী মহৈরোই লাখ অমদা হন্দক্কী মার্চ ৩১ ফাওবগী মনুংদা লুপা ১০০০/- তৌদুনা পীরগনি। ক্লাস ১২ কী ফাইনেল পরিক্ষাদা মেরিটকী মতুং ইন্না অহানবা লিশিং কুনগী মনুংদা লৈবা মহৈরোইশিং ২০২০-২১ শেনবা চহীদা স্কুতি অমমম পীরগনি। 
হন্দক্কী বজেত্ তা ইউনিত ৩০ গী মখাদা ইলেক্ট্রিসিটি শিজিন্নবা ইমুংদা লেম্না মৈ পীবগী ৱাফম য়াওরি। অসিদা নত্তনা মৈগী বিলদা শেনফম খরা হন্থহন্নবগী পান্দমদা রাজ্য সরকারনা আসাম পৱার দিস্ট্রিবিউসন কম্পনি লিমিতেদতা লুপা কোতি ২৫০ গী সবসিদি পীরগনি। মওং অসি হন্দক দিল্লি সরকারনদি থাদা ইমুং অমদা ইউনিত ২০০ ফাওবা লেম্না মৈ পীবগী ৱাফম লৈখিবনি। স্বামি বিবেকানন্দ যুব ক্ষমতায়ন থৌরাংগী মখাদা মশানা মশাবু থবক পীজবা ঙম্নবগী পান্দমদা রাজ্যগী নহা লাখ অনিদা লুপা ৫০,০০০/- তৌদুনা পীরগনি । মসিগী দমক লুপা কোতি ১০০০ কায়থোকলে।
চা-বাগানগী থৌমীশিংগী দমক চা-বাগান ধন পুরস্কার মেলাগী থৌরাং মখাদা চা-থৌমীশিংগী দমক বেঙ্ক একাউন্ট লিশিং কুনমাথোইগী মথক্তা লুপা ৩০০০/- তৌদুনা মখোয়গী একাউন্টতা হাপচীল্লগনি। চা-বাগানগী সর্দান ৪০০০ দা স্মার্ত ফোন পীরগনি। চা-বাগানগী লমদমদা অনৌবা হাইস্কুল ১০২ লিংখৎলগনি।   চা-বাগান থৌমী অমসুং আধিবাসি কল্য়ান থৌরাংগী মখাদা মীরোনবী নুপীশিংদা মখোয়গী খুৎশুমলগী ক্ষতিপূরন পীনবা শেনফম লুপা ১৮০০০/- দা হেনগৎহনখ্রে।
রাজ্যগী হান্ন লৈরম্বা ঊগী থোং ১০০০ আরসিসিগী থোং ওইনা শাদোক্লগনি। চৎলিবা চহীগী আগষ্ট ফাওবদা ওজা ২০,২২৮ গী প্রোভিন্সিয়েলাইজ তৌনবগী ৱাফম খন্নরি।
কেন্সর লায়না লায়েং থৌরাং মখাদা হন্দক্কী বজেত্ তা লুপা কোতি ৪৭৫ কায়থোকলে। নুপী অমসুং সিনিয়র সিতিজেনশিংগী চৎথোক-চৎশিনদা খুদোং চানবগী দমক ভ্রমণ শারথী হায়না মীংথোনবা থৌরাং অমা হৌদোক্লগনি। থৌরাং অসিনা গৌহাতি মহানগরদা মখোয়না শেল তীংদনা চৎথোক-চৎশিনগী খুদোং চাবা ফংহল্লগনি। অসিতা নত্তনা ইন্টরভিউ নত্রগা পরিক্ষাগী দমক চৎথোক চৎশিন তৌরিবা থবক ফংদ্রিবা নহারোলশিংগীদমক আসাম স্টেত ট্রান্সপোর্ত কোর্পরেসননা লেম্না মখোয়বু পুথোক পুশিন তৌবগী ৱাফম য়াওরি।
----------------------------------------------------
Get latest News Updates Please Download Lakhipuronline Android app CLICK HERE

To Subscribe Lakhipuronline YouTube Channel CLICK HERE