মহৈলোয়শঙশিং মার্চকী তাং ২৯ ফাওবা থিংজিন্নবা লাউথোকখ্রে।
কোরোনাভাইরাসকী লাইচৎনা মরম ওইরদুনা আসাম সরকারনা রাজ্য অসিগী মহৈ লোয়শঙ, সিনেমা হোল, সুইমিং পুল অমসুং জিম খুদিংমক লাক্লিবা মার্চকী তাং ২৯ ফাওবা থিংজিন্নবা লাউথোকখ্রে। মার্চকী তাং ১৫ গৌহাতিদা পাঙথোকখিবা পাউগী মীফম অমদা রাজ্যগী চীফ সেক্রেটরী কুমার সঞ্জয় কৃষ্ণনা ৱাফম অসি লাউথোকখিবনি।সিবিএসই, সেবা অমসুং অতৈ ইউনিভার্সিতিগী পরিক্ষা নত্তনা অতৈ পরিক্ষা খুদিংমক য়ৈথোকখ্রে। রাজ্য সরকারনা আইএএস অনুরাগ গোয়েলবু নোদাল অফিসার হাপতুনা কোভিদ-১৯ য়েংশিন্ননবা কমিতি অমা শেমখ্রে। রাজ্য অসিদা হৌজিক ফাওবদদি লায়না অসি পোজিতিব ওইবা লৈত্রি। অদুম ওইনমক শিলচর এনআইতি গী ক্লাস লাক্লিবা মার্চ ৩১ ফাওবা য়ৈথোকখিবগা লোয়ননা হোস্টেল থাদোক্নবা খঙহনখ্রে।
