Lakhipuronline | Complete platform for North-east India

First regional News blog of North East India, breaking news in English and Manipuri.

  || BREAKING NEWS ||   >>> >>>

December 09, 2019

এ.পি.এস.সি.গী চাংয়েংদা মণিপুরী য়াওহন্নবা দাবী তৌরদুনা খুৎয়েক ১০০০০ য়াওবা মেমোরেন্দম পীশিনখ্রে।

আসাম পাব্লিক সার্ভিস কমিসন (এ.পি.এস.সি.) না লৌবা কম্বাইন কম্পিতেতিব একজামিনেসন (সি.সি.ই.)গী চাংয়েংদা মণিপুরী হাপচীন্নবা দাবী তৌরদুনা লূপ কুনগী ওইবা জোইন্ট এক্সন কমিতি অমনা আসামগী মুখ্যমন্ত্রী, গভর্ণর, বিধানসভাগী ওপোজিসনগী নেতাশিং লোইননা তোঙান তোঙানবা মন্ত্রীশিংগা উন্নদুনা খুৎয়েক লিশিং তরা য়াওবা মেমোরেন্দম অমা মুখ্যমন্ত্রী সর্বানন্দ সোনোৱালগী মফমদা পীশিনখ্রে। দিসেম্বরগী তাং ৫দা জোইন্ট এক্সন কমিতিগী চেয়ারমেন অরাম্বম নন্দবাবু সিংহ, কনভেনর অসাংবম স্বপন, মেম্বর আহমদ হোসেন নচিংবা কমিতিগী মীওইশিংনা দিসপুরদা মুখ্যমন্ত্রীগা হকথেংননা উন্নদুনা মেমোরেন্দম অদু পীশিনখিবনি। মীহুৎ কাঙবু অদুদা মনিপুরীশিংগী দাবীশিং অদু থবক ওইনা পাঙথোক্কনি হায়বগী থাজবা পীরকখি। মীহুৎ কাঙবু অদুদা লখিপুরগী এম.এল.এ. রাজদীপ গোৱালা, সিলচরগী এম.এল.এ. দীলিপ পাল, ৱাটর রিসোর্সেস মন্ত্রী কেশব মহন্ত নচিংবা মরুওইবা মীওই কয়াসু য়াওখি। আসামগী রাজ্যপাল জগদীস মুখী, আসাম বিধান সভাগী স্পীকর হীতেন্দ্রনাথ গোস্বামী, হাইলাকান্দিগী এম.এল.এ. আমিনুল হোক লস্কর, মন্ত্রী পরিমল শুক্লবৈদ্য, অসম বিধানসভাগী ওপোজিসন লিদর দেবব্রত সাইকিয়াগী মফমদসু মেমোরেন্দম অদু খুৎশিন্নখি।
হৌখিবা দিসেম্বরগী তাং ৮ নোংমাইজিং নুমিত্তা লখিপুরগী বাসস্তেন্দা পাঙথোকখিবা পাউমীশিংগী মীফম অমদা লূপ কুননা শেম্বা জোইন্ত এক্সন কমিতিগী খোঙজং অদুগী মতাংদা মীয়ামদা পাউদমখি। নুমিত্তুগী মীফমদা কমিতিগী চেয়ারমেন অরাম্বম নন্দবাবু সিংহ, কনভেনর অসাংবম স্বপন, অরাম্বম গৌরগোপাল সিংহ, লৈশুংবম রবীন্দ্র সিংহ, কেঐইচ দিলীপ সিংহ, কে স্বপন সিংহ, এনজি সনাহল সিংহ, পিঐইচ মণিবাবু সিংহ, কে রবীন্দ্র সিংহ নচিংবা মীওইশিং য়াওখি।
জোইন্ত এক্সন কমিতিদা য়াওরিবা লুপশিং অদুদি - আসাম মণিপুরী সাহিত্য পরিষদ, অল আসাম মণিপুরী স্টুদেন্টস্ ইউনিওন, অল আসাম মণিপুরী মৈরা পায়বী কোর্দিনেসন কমিতি, কমিতি ওন কলচার ফোর পীস এন্দ ইন্টিগ্রিতি (কোকপীন), মণিপুরী বেনোভলেন্ট সোসাইতি, আসাম মণিপুরী কলা একাদেমী, মণিপুরী য়ুথ ফ্রন্ট অফ আসাম, থৌগল মরূপ হাইলাকান্দি, আসাম মণিপুরী প্রোগ্রেসিব ফ্রোন্ট, অল আসাম মণিপুরী মৈরা পায়বী অপুনবা লূপ, মণিপুরী নেসনেল কাউন্সিল, আসাম মণিপুরী সিতিজেন্স ফোরাম, মণিপুরী সেদ্যুল ট্রাইব দিমান্দ কমিতি, অথৌবা নীংশিংলূপ, আসাম মণিপুরী মুস্লিম য়ুথ ফ্রন্ট, ইউনাইতেদ ক্লাব ওর্গেনাইজেসন, নহারোল খোরিরোল সিল্লুপ লখিপুর, মণিপুরী মুস্লিম দেভলপমেন্ট ওর্গেনাইজেসন আসাম, সাউথ বরাক লখিপুর রুরেল দেভলপমেন্ট ওর্গেনাইজেসন অসিনচিংবনি।
------------------------------------------------------------
Get latest News Updates Please Download our Android app CLICK HERE
To Subscribe our YouTube Channel LICK HERE 
------------------------------------------------------------