Lakhipuronline | Complete platform for North-east India

First regional News blog of North East India, breaking news in English and Manipuri.

  || BREAKING NEWS ||   >>> >>>

December 28, 2019

ইমোইনু ইমা লাৎচবগী পোৎলম অমসুং ইমাগী মীংখৈ

ইমা অহোঙ অচাওবীনা য়াইফরে ।

ইমোইনু ইমা লাৎচবগী পোৎলমঃ

  • লাইনিংথৌ লাইরেম্বীগী লাংওন শক্তম, 
  • শেনগী খূৎনেৎ খুদা অনী, 
  • চফূ ফূহিং মখুম, 
  • লাইগী ইন্নফি ১, 
  • তুংগা ফনেক ১, 
  • ফম্বাল ফি ১, 
  • কেগাম ১, 
  • অথেনপোৎ ২, 
  • লফোয় চঙ থোকপা ২, 
  • হৈনীং ২, 
  • হৈগ্রু ২, 
  • হৈজ্রাং ২, 
  • চূঙৌ তাঙ্কক ২, 
  • লৈশং ২, 
  • খোইজু লৈখাম, 
  • মেক্রুক মৈরা ৩, 
  • অকৎশেন ২, 
  • লৈ খরা, 
  • নাহৈ চফূ ১, 
  • তাইরেন, 
  • পুংফাই, 
  • হৈরম ৭, 
  • লৈরম ৭, 
  • পানাও, 
  • শিংনাও, 
  • ফৌ খরা, 
  • শরেঙ, 
  • ঙারম ৭, 
  • চেঙপোৎ ৭ শেমজগনি। 
শুদ্রগসু ঙমজবা খরা থম্মোয় শেংনা কৎচবা পুম্নমকপু পীনহৈবা ইমানি। পোৎলমসি লাইনিংথৌদসু মৈ চঙদবা অথেনপোৎ কাজগনি। 
পোৎলমশিং অসি শেম শাবা লোয়রগা অনম অথৌ কোক্কনি। তাইরেন পূংফাইনা খীক্তোক চামথোক্কনি, খূউ লৈতানা ফম্লগা খূবাক অহুম্লক খুদুনা লাইনিংথৌবু হৌদোকচগনি। মরমদি মতম পূম্নমক্তা লাইনিংথৌদি মপাল্লোমদা মায় ওন্দুনা লৈ।


মিংখৈঃ

হৈ লাইনিংথৌ শন্থোং অপানবা ইবুংঙো নহাক্কী মোংবা নশাইগোন্দা লৈজরিবা নচা ননাইশিংনা চীংঙু নঙবু কৌজরিয়ে, থৌজান বিয়ো। হয়ি চক, হয়া চক, লাংবা চক, খুনুং কোন্না চক, চক ৪ গী লাংওন ওইবা হেক লাইয়েংথৌ, মৈ তরং, ঈশিং তরং, নুংশিৎ তরং, ইবুঙোগী নতীক নয়াইনা তরং হীলেন হোল্লিবা, য়াইবী কোনগী মপুথৌ অতিংকোক মরু শিদবা খোয়চুম লাইলুপ লুচিংবা, য়াইবী য়েলহৌঙৈগী অমম লৈশানরকপা হে লাইয়িংথৌ খেরে নূংগুম তকূপহৌ পোইদিংঙু নোংথাঙ তরংলেন তরং লাইজ ইপোকপা, লিন্দাও তাওবী ইরোইননা লাইরেন তাওরোইনাই নুংদু শিদবা, নুঙ্গাং মহারাবা, য়াইবী নুংঙৌ পীমাবা, নোংখোঙ কোয়বা ইবুঙো খুহিং সননা লাইজলেন, সনা ফম্বাল মহিলেন কেকু হায়বসু নহাক্নি ফোঙ-ফোঙ হায়বসু নহাক্নি সনা তিলিলেন কোনজাওবা লাইয়িংথৌ হনবা লৈরুমলে, নোংলুমলে, শৈথাবগী লোইবা নাইদ্রবা লাইয়িংথৌগী নতীক নয়াইনি। ঙাং কুপ ফেৎ চুমথাঙ হাইফেং, তিং-তিং হায়না কৌই। নদাইরেমশিংনা পুনেমজরি। 
(মী পুম্নমক খুৎ লোন্নদুনা খূউ লৈতানা খুরুমজদুনা নীনিংবা নিজহৌরগনি।) তীন ফত্তবা ঙাকপিয়ো, তীন্দাই লৈতাইনবিরো, হা হুং, হা য়ে ৱাহৈসি হায়রগা খুরুমজগনি। কৎলিবা পোৎলমশিং ইমুং মনুংখক্তনা চাগদবনি। ইমোইনু ইমাদসু পোৎলমসি কৎচগনি। 


ইমাগী মিংখৈঃ

য়া-হে ইমা ইমোইনু অহোঙ অচাওবী ঙসি য়াইফরবা কোরৌ নুমিৎসিদা নশু-নচাশিংনা ঙমজবা হৈরাং-লৈরাং, শংলৌ মনা মশীং, তরা চেঙ, শরেঙ মৈশাংবনচিংবা শংনা চাবা মরম ১০৮, মুল্লগা চাবা মরম ১০৮ লাঙজদুনা কৎচরিবসি পোৎলম শুরে খনবিদুনা লৎনদনা লৌবিয়ু হে ইমা য়াইফবী। হুং পোকপা, হুং পোকপীতু, তকুপ-তকুপ হাওকুপ হাওকুপ লৈহিং, পুন তরেৎ, চিং, হিং, কৌবী থুপ-থুপ কৌবী লয়োল্লাং তনৌবী হে ইমা লেঙশিনবিয়ো নদাইরেমশিংনা কৎচরিবসে লৌশিনবিয়ো লেঙদনবু লৈবিয়ো ইমা।

থৌনিবগী মিংখৈঃ

হে ইমা লৈশিরেল লৈপুংবী, লৈমরেল ময়োন ওইরিবী অচিবী খোং কংদবী, ইমোইনু অহোং অচাওবী, তরাং চক্নিং খাক্না চাকশৌবী, ৱাংলৈ য়েন্নীং খাক্না য়েনশৌবী, ৱায়েন ৱাঙম থৌয়াংবী, হুয়েন লানচেন শাফবী, ঈনগী খূৎচিংলী ওইরিবী পেগী চহুম ওইরিবী, হীপোকপী য়াইপোকপী হীরৈমা য়াইরৈমা হীকুবী য়াইকুবী য়াইস্না কৌনা মীংগৌবী লৈমা ৭ শায়োনবী নাকথা লৈমা পাউতোইবী, ফুরেপ লৈমা লূচাওবী, ফুরোল ৱারোলনুংদা য়াতাবী অয়ুক চারা নোংদম্বী, নুমিদাং চরা নোংখায়বী, তাইবঙ নাউয়োক নাউকোনবী হে ইমা হাওশম তোংদম্নবী ইমোইনু অহোঙ অচাওবী, অরৈনু লৈশীনবিরক্লো, অহুমনু হুমজিনবিরক্লো, কংলা চিরা ৪ মক্তাগী মালেম মায়কৈ ৮ মক্তগী ঈন খুৎ চীংলীগুম চিংশিনবুয়ু, পেগী চহুমগুম শূপচীনবিয়ু, অচি তৎপিগনু, অখোঙ কংবিগনু, হে ইমা ঙাংলৌ থম্বাললৈগুম খোইমোম সনা নখোঙখাদা নমু তাইবঙ নোংমা পানগী নদাইরেম নৱা ঈৱাকপনা মানবী মুকমু লৈতোন কোন্না কাওবী চিরা লূক মালেম থৌরৈ লৈকা পাইনা চাংজৌ লৈপক্ননা খুৎতম্না খোয়মোম নখোঙখাদা চেপ্না লোংনা পূনেমজরিয়ে। হুং পোকপী ইমা ইবেম্ম-ও। ৱাত্ত পাদবা পীবিরো, তুরৈ ঈরৈ চেন্দবা, থক-খা নাইবা, লমচৎ-থৌগল্লোন কায়দববু পীনবিরো, চাক্কৈ লনগৈ থনবা পীনবিরো, ইমাগী তেকফদ্রবা থৌরম থৌদাবু পাঙজরগে, পারী পুরী খঙহনবিরো, থৌরৈ থৌদা শিন্তাকপিরো, থৌরম থৌদা পাঙজবদা য়েক্ন-তুরৈ লাক্কদবা ঙাকথোকপিরো। মীকুপ খুদিং কাউজরোই, মীথোই মীহেন নোংদম্বিরো হে ইমা অহোঙ অচাওবী। লেঙদনা ঙান্থোইবিরো থাবগী লোইবা নাইদ্রবা ইমাগী মিংখৈনি শোনজরবসিনা পেনবিরো, হে ইমা অহোঙ অচাওবী।

পোৎলম কাইথোক্তুনা লূক হৌনবা মিংখৈঃ

খুবাক অহুম্লক খুগনি, 
হৈয়াহে ইমা ইমোইনু অহোঙ অচাওবী খোইমোম লাইরেম্বী, পলেম শিদবী ইমা, কৎচরিবা মনা-মশীং তরা চেঙনচিংবা কাইথোকচরগা তরা লূক হৌজরগে হায়না পাউতাকচরিয়ে হে ইমা হোয়াবিরসি
(পোৎলমশিং লাইনিংথৌদগীসু খুবাক অহুম্লক খুরগা কাইথোক্লগা তরা লূক হৌরগনি মৈ চঙলবা চাক-ইনশাংদি লাইনিংথৌগীদা অমুক হন্না কৎপা য়াদ্রে। লূক হৌবা লোইরগা চবান য়েংবসু লাই লূক কৎপা মতমদা ফি অঙৌবনা ফীজং খনগনি খোইরু থাউমৈ অমা থানগনি মৈদু মুৎলবা মতমদা লূক কাইগনি। লূক কৎপদা চাক-ইনশাং য়াওনা কশাগী নাকথদা হান্না খরা কৎকনি। লূক অদু কাইথোক্লগা মী খুদিংমক্তা খরা খরা থুংনা য়েন্দুনা চামিন্নগনি। )


লূক কাইবগী ৱাহৈঃ

খোইমোক লাইরেম্বী ইমোইনু অহোঙ অচাওবী শিদবী ইমাদা কৎচরিবা লূকলেন অসি নদাইরেম নচা নশুশিংনা ফংজরগে। ইমাগী লেকলেনসিবু ফংজরগা তীনকোক লাইকোক, ৱাত্ত-পাদবা, তীনচেন-লাইচেন্দবা শাম্বা পাঙ্গন কনবা থৌনা-লিংজেল ৱাৎত-পাদবা পুন্সি নুংশাংববু ওইজরগে হোয়াবিরো হে ইমা ইমোইনু অহোঙ অচাওবী। ইমা অহোঙ অচাওবীনা য়াইফরে ।
(য়াইফরোনসি শোনবিগদবনি। নুমিৎসিমদি খৎন চৈনবা ইমুং মনুং শুমাং থেলোং মোৎপা য়াদে, লাইবক্তা মালেম লৈশা নম্বিদুনা কোকখূমফি শীজিন্নবিয়ু, লৈমা (মৌ) না ফিদোন চিংখৎকনি খ্বাঙচেৎ মচি লাংগনি, নুমিদাংদা মৈরা মফম খুদিং থানবিগদবনি। লূক কৎপদা চীনখূম ফি কাউফরোইয়ে।)
ইমোইনু ইমাবু থৱায় চঙখোন্না, পুক্নীং চেপ্তনা থৌনিজরবদা পীনহৈবী ইমানা পীবিদবা লৈতে।

রেদিও লিলা ইমোইনু তাবিউ >>> CLICK HERE

-----------------------------------------------
Please Subscribe our YouTube Channel CLICK HERE
Download Lakhipuronline Android app CLICK HERE
-----------------------------------------------