দিসেম্বরগী তাং ২৬ থোক্কদৌরিবা সুর্য্যগ্রহন (সোলার ইক্লিপস্)

মপুঙ ফাবা নুমিৎকী গ্রহন উগদবা লম্বী পরিং

দিসেম্বরগী তাং ২৬ থোক্কদৌরিবা সুর্য্যগ্রহন (সোলার ইক্লিপস্) অসি কেরলা, কর্ণাতকা অমসুং তামিলনাদুগী মফম খরদগী নুমিৎ অসি খুদোপকী মওংদা (এন্নুলাস) উবা ফংগনি। নুমিৎতা গ্রহন তৌবা হায়বসিমক্তবু থানা নুমিৎ অমসুং পৃথিবীগী মরক্তা পরিং অমত্তদা লৈবা মতমদা থোকপনি। অদুনা থাগী অকোয়বদা নুমিৎকী অরংবা খুদোপ মান্না ইকোয় কোয়বা শক্তম উবা ফংগনি। গ্রহন অসি ভারত্তদা নত্তনা সাউদি আরবিয়া, কাতার, ইউনাইতেদ আরব ইমিরেতস্, ওমান, শ্রীলঙ্কা, মলয়েসিয়া, ইন্দোনেসিয়া, সিঙ্গাপুর, অৱাং মেরিয়ানা ইথৎ অমসুং গুৱামদগীসু উবা ফংগনি।

ভারতকী মতমদা দিসেম্বরগী ২৬ সগোলসেন নুমিৎকী অয়ুক্কী পুং ৮ মি ৪ দগী মপুঙ ফাদবা মওংগী পার্সিয়েল ইক্লিপস্ হৌগনি। অয়ুক্কী পুং ৯ মি ২৪ দগী মপুং ফাবা সুর্য্যগ্রহন ওইগনি। থানা নুমিৎকী পরিংদা খ্বাইদগী নক্না লৈবা মতম অয়ুক্কী পুং ৯ মি ২৬ তা উমশিনবগী চাং খ্বাইদগী হেন্না উবা ফংগনি। অয়ুক পুং ৯ মি ২৭ তা মপুং ফাবা সুর্য্যগ্রহন লোয়গনি। পুং ১১ মি ৫ দা পার্সিয়েল ইক্লিপস্ লোয়শিনখিগনি। মপুঙ ফাবা গ্রহনগী মতম সুপ্নতগী মি ৩ সে ১২ ওইগনি।

ভারতকী তোঙান তোঙানবা মফমদগী উগদবা নুমিৎকী গ্রহনগী মতাংদা কোলকাতাগী বিরলা প্লানেতারিয়ামদগী পুথোরকপা তেবল অমা মখাদা পিরি।

সুর্য্যগ্রহন ওইরিঙৈদা ঐখোয়না চুমদ্রিং নুমিত্তা য়েংদনবা অখঙ অহৈশিংনা পাউতাক পিরি। অদুম ওইনমক নুমিত্তা গ্রহন তৌরিঙৈ তানজাদা চাবা থকপা অমসুং নোংমগী থৌদাং তৌবদা করিসু অকায়বা লৈতে হায়রি।

থৌদোক অসি চহি ১৪০ গী মতুংদা হন্দক থোকলিব অসিনি। থাদগী শরুক চামরি হেন্না চাউখ্রবা নুমিৎসিবু করম্না পিকখ্রবা থা অসিনা খুমজিনবা ঙমলিবনো। মীৎনা য়েংবদনা থাগা নুমিৎকা চাউবা মান্ননা উই। মসিগী মরমদি ঐখোয়গী পৃথিবী অসিদগী থানা নুমিত্তগী শরুক চামরি হেন্না নকনা লৈবননি। পাউগী মতুং ইন্না শিলচরদগী মপুঙ ফাদবা গ্রহন পার্সিয়েল সোলার ইক্লিপস্ ওইনা উবা ফংগনি। শিলচরগী ওইনা দিসেম্বরগী তাং ২৬ শগোলসেন নুমিৎকী অয়ুক্কী পুং ৮ মি ৪০ দগী পুং ১১ মি ৪১ ফাওবা গ্রহন ওইগনি।
------------------------------------------------------------
Get latest News Updates Please Download our Android app  CLICK HERE
To Subscribe our YouTube Channel CLICK HERE 
------------------------------------------------------------