বরাক তম্পাক্কী খোমজিনবা পাউ ২২-১২-২০১৯

বরাক তম্পাক্কী
খোমজিনবা পাউ
২২-১২-২০১৯

বরাক তম্পাক, বিটিএদি অমসুং চীং জিলা থাদোক্লগা আসামগী স্টেট লেঙ্গুয়েজ আসামিজ ওইরগনি।
⧭⧪➤  আসাম কেবিনেতনা দিসেম্বরগী তাং ২১ দা ফমখিবা মীফমদা মতম চুপ্পগী ওইনা আসামিজ লোনবু রাজ্যগী স্টেট লেঙ্গুয়েজ ওইনা থম্নবা সংবিধানগী আর্তিকল ৩৪৫ শেমদোকপগী ৱাফম কেন্দ্রদা লানখৎনবা ৱারেপ লৌখ্রে। অদুম ওইনমক মসিনা বরাক তম্পাক, বিটিএদি অমসুং রাজ্য অসিগী চীং জিলাশিংদদি কোনশিনল্লোইদৌরি। মীফমনা লমদমসিগী য়েলহৌমীশিংনা রাজ্য অসিগী য়েলহৌমীখক্তদা লম লৈবা য়োনবগী অয়াবা পীবগী মতাংদসু ৱারেপ লৌখি। হিন্দি, ইংলিস, বোড়ো, বেঙ্গলি নচিংবা মেদিয়ামগী স্কুলশিংদা ক্লাস টেন ফাওবা আসামিজ সাবজেক্ট অমা লৌদবা য়াদবগী ৱারেপ লৌখি। অদুবু ৱারেপ অসি বিটিএদি, রাজ্যগী চীং জিলাশিং অমসুং বরাক তম্পাক্কী জিলা অহুম কাছার, করিমগঞ্জ অমসুং হাইলাকান্দিদা কোনশিল্লোই। মীফমনা রাজ্যগী ওতোনোমাস কাউন্সিল তরুক ( টিৱা, মিসিং, রাভা, সোনোৱাল কাছাড়ী, থেঙ্গাল কাছাড়ী অমসুং দেওরী) দা কন্সটিটিউসনগী স্টেটস্ পীনবা ৱারেপ্নখি। বাজালি সাব দিবিজনবু জিলা ওইনা ওন্থোকপগা লোয়ননা কোচ রাজবংশি, মোরান অমসুং মোটোককী তোঙানবা ওতোনোমাস কাউন্সিল শেম্বগী ৱারেপ লৌখি। 
চুতিয়া শাগৈগী অরোইবা মহারাণী সতী সাধিনি (চুতিয়া নিংথৌ ধর্মধ্বজপাল গী মচানুপী) গী মপোক নুমিৎ বৈশাখকী ৭ তা স্টেত হোলিদে লাউথোক্নবা ৱারেপ তাখি। অমসুং মহারাণী অসিগী মীংদা  সতী সাধিনি স্টেত য়ুনিভার্সিতি অমা গোলাঘাটতা লিংখৎপগী ৱারেপসু লৌখি। লোয়ননা বিশ্বনাথ অমসুং শিবসাগর জিলাদা মেদিকেল কোলেজ অমমমসু লিংখৎলগনি। 


লালা সহরদা বিবেকানন্দ মেলা হৌখ্রে।
⧭⧪ হাইলাকান্দি জিলাগী লালা সহরদা দিসেম্বরগী তাং ২০ দগী বিবেকানন্দ মেলা হৌখ্রে। করিমগঞ্জকী এমপী কৃপানাথ মালানা মেলা অসি হৌদোকখি। লালা হায়ার সেকেন্দরী স্কুলগী শান্নবুঙদা চৎথরিবা মেলা অসি জনুৱারীগী তাং ৫ ফাওবা চৎথগনি।

য়ানিংদবা ফোঙদোক্লিবশিংগা হকথেংননা উন্নগদৌরি।
⧭⧪ আসাম সরকারনা রাজ্য অসিদা সিতিজেনসিপ এমেন্দমেন্ট এক্ট (সিএএ) গী মতাংদা য়ানিংদবা ফোঙদোকলিবা লুপশিংগী লুচিংবশিংগা ৱারী শান্নগদৌরি। গৌহাতিদা ৱাফমসিগী মতাংদা জনুৱারীগী তাং ২০ মুখ্যমন্ত্রী সর্বানন্দ সোনোৱালনা ফোঙদোক্লদুনা ৱারী শান্নবতনা করিগুম্বা সমস্যা অমগী ৱারোইশিন পুরকপা ঙমগনি হায়খি। সিএএ অসিনা মরম ওইরদুনা আসামদা মীওই কোতি অমা হেন্না চঙশিল্লক্কনি হায়বা তোকঙা অসিদা থাজবা থম্দনবা ফোঙদোকপগা লোয়ননা রাজ্য অসিগী মীওই কাঙলুপশিংগী দমক ঙাকশেনবা হায়বসি মহাক্কী থৌদাংনি হায়খি। 


সিঙ্গেরবন্দ হায়স্কুলগী দাইমোন্দ জুবিলিগী লোইশিন থৌরম জনুৱারীদা পাঙথোক্লগনি।
⧭⧪ সিঙ্গেরবন্দ হায়স্কুলগী দাইমোন্দ জুবিলিগী লোইশিন থৌরম লাক্লিবা জনুৱারী তাং ১০, ১১ অমসুং ১২ স্কুল অসিগী শান্নবুঙদা পাঙথোক্নবা শেমশাখ্রে। থৌরম অসিদা রাজ্যগী উমং লোয়শঙ মন্ত্রী পরিমল শুক্লবৈদ্য, লখিপুরগী এমএলএ শ্রী রাজদীপ গোৱালা, শিলচরগী এমপি ডাঃ রাজদীপ রায় অমসুং আসাম বিধান সভাগী দেপুতি স্পীকর আমিনুল হোক লস্কর শরুক য়াবগী ৱা লৈরি। পনবা য়াই, সিঙ্গেরবন্দ হায়স্কুলগী দাইমোন্দ জুবিলিগী থৌরম হৌখিবা নভেম্বরগী তাং ১১ দগী চৎথরকখিবনি।

লখিপুরদা জাতি থাক্কী ৱারীমচা পাবগী থৌরম পাঙথোক্লগনি।
⧭⧪ মনিপুরী সোর্ত স্তোরি সোসাইতি ইন্দিয়ানা শিল্লাংদুনা অৱাং নোংপোক্কী ওইবা জাতি থাক্কী মণিপুরী ৱারীমচা পাথোকপগী থৌরম অমা লাকলিবা দিসেম্বরগী তাং ২৫ অমসুং ২৬ লখিপুরদা পাঙথোক্লগনি। থৌরম অসিদা আসাম, মণিপুর অমসুং ত্রিপুরা য়াওনা অৱাং নোংপোক্কী তোঙান তোঙানবা মফমদগী অইবা অইবী ৬০ রোমনা শরুক য়ারগনি।

খেলো ইন্দিয়া শান্ন-কুমহৈ জনুৱারী ১০ দগী হৌরগনি।
⧭⧪ খেলো ইন্দিয়া শান্ন কুমহৈ লাকলিবা জনুৱারী ১০ দগী গুৱাহাতিদা হৌরগনি। শান্ন কুমহৈ অসিগী হৌদোকপগী থৌরমদা প্রধান মন্ত্রী নরেন্দ্র মোদি শরুক য়াবগী ৱা লৈরি। অহানবা ওইনা গুৱাহাতিদা পাঙথোক্লিবা খেলো ইন্দিয়া শান্ন-কুমহৈ অসিদা তোঙান তোঙানবা মশান্ন ২০ দা শান্নরোই লিশিং ১০ রোমনা শরুক য়াগনি।


ৱেতলিফতর সাইখোম মীরাবাই চনু টোকিও ওলিম্পিকতা উবা ফংলগনি।
⧭⧪ হান্নগী ৱার্লদ চেম্পীয়ন অরুম্বা থাঙ্গৎপী সাইখোম মীরাবাই চনু দিসেম্বরগী ২০, ২০১৯ ইরাই নুমিৎ দোহাদা শান্নখিবা ৬শুবা কাটার ইন্টরনেসনেল কাপতা ভারতকী মহুৎশিন্না শান্নবদা সনাগী তকমান লৌরকখ্রে। মসিগা লোয়ননা চহী কুনমঙা শুরবী সাইখোম মীরাবাই চনু ২০২০ গী টোকিও ওলিম্পিকতা শরুক য়াবগী খুদোংচাবা ফংলে। হন্দক সাইখোম মীরাবাই চনু কেজি ৪৯গী কাংলুপতা পুন্না কেজি ১৯৪ থাঙ্গৎখি অদুবু মহাক্কী খ্বাইদগী ফজনা শান্নখিবদি থাইলেন্দা শান্নখিবা মেচ্ অমদা পুন্না কেজি ২০১ থাঙ্গৎখিবা অদুনা ওইখি। ৬শুবা কাটার ইন্টরনেসনেল কাপতা ভারতকী সাইখোম মীরাবাই চনু (কেজি ১৯৪) না সনাগী, ফ্রান্স নিঙোল অনি অনাইস্ মীচেল (কেজি ১৭২) না লুপাগী অদুগী মানোন লোরেন্টজ্ (কেজি ১৬৫) না সেঞ্জেংগী তকমান লৌখি। 
------------------------------------------------------------
Get latest News Updates Please Download our Android app  CLICK HERE
To Subscribe our YouTube Channel CLICK HERE 
------------------------------------------------------------