সাফ গেমসতা থৌদাম কবিতা দেবীনা সনাগী তকমান লৌরকতুনা ভারতকী মায় ঙাকখ্রে।

থৌদাম কবিতা দেবী
সাউথ এশিয়ান গেমস (সাফ) কী নুপীগী ফেন্সিং ইপি ইভেন্টতা থৌদাম কবিতা দেবী না সনাগী তকমান লৌরকতুনা ভারতকী মায় ঙাকখ্রে। নেপাল গী কাথমান্দুদা শান্নরিবা ১৩শূবা সাফ গেমসকী তরেৎনি চনবা নুমিৎ ফাওবদা ভারতনা সনাগী ১১০, লুপাগী ৬৯ অমসুং সেঞ্জেংগী তকমান ৩৫গা লোয়ননা পুন্না তকমান ২১৪ লৌখিবগা লোইননা মেদেল তেলিদা খ্বাইগী মকোকতা লৈরি। নেপালনা ২ শুবদা অদুগা শ্রীলঙ্কানা ৩শুবদা লৈরি।
ফেন্সিং মশান্নখক্তদা ভারতনা ফংলকখিবা তকমান ১১গী মনুংদা সনাগী ৬, লুপাগী ৪ অমসুং সেঞ্জেংগী তকমান ১ য়াওরি। ইভেন্ট অসিদা ভারতকী সিতল জালাল না লুপাগী তকমান অদুগা নেপালগী জানুকা স্যাংটন অমসুং ইন্দিরা পাউদেল না সেঞ্জেংগী তকমান লৌখি। থৌদাম কবিতাগী ওইনদি ফেন্সিং মশান্ন অসিদা হন্দক্কী অসিনা মহাক্কী খ্বাইদগী চাওনা মাইপাকপগী মীৎকুপ হায়বদু ওইখি।
থৌদাম কবিতা দেবী কাছার জিলাগী লখিপুর সাবদিবিজনগী মনুং চনবদা লৈবা তলেনখুনদগীনি। মমাং থাবদা সাউথ কোরিয়ানা য়ুম্বু ওইদুনা ইঞ্চিওনদা পাঙথোকখিবা ১৭শুবা এসিয়ান গেমসতা মহাকসু ভারতকী ফেন্সিং তীমদা শরুক য়াবগী খুদোং চাবা ফংখিবনি অদুবু সরকারগী মাইগৈদগী অয়াবা ফংদবদগী য়াওবা ফংখিদে। ইন্দোনেসিয়ানা য়ুম্বু ওইদুনা চৎথখিবা জকার্তা-পালেম্বাং ১৮শুবা এসিয়ান গেমস্ কী ফেন্সিংগী ভারতকী নুপীগী ঈপী তীমদা থৌদাম কবিতা দেবী শরুক য়াখি। পনবা য়াই, ইজরাইল ফেন্সিং এসোসিয়েসননা শিল্লাংদুনা ইজরাইলগী মালোট তার্সিলাদা পাঙথোকখিবা পীস কাপ সেতেলাইট ফেন্সিং তোর্নামেন্টতা থৌদাম কবিতা লুপাগী তকমান লৌরকখি। হৌজিক নেপালদা চৎথরিবা সাফ গেমসকী ফেন্সিংগী তিম ইভেন্টসু মখাতানা কবিতা শরুক য়াবগী ৱা লৈরি।
Watch this on YouTube CLICK HERE

Get latest News Updates Please Download our Android app CLICK HERE

To Subscribe our YouTube Channel CLICK HERE