ঙসি

আসাম পাব্লিক সার্বিস কমিসন (এ.পি.এস.সি.) গী ক্বালিফাইং পেপরদা মণিপুরী য়াওহন্নবা দাবী তৌখ্রে।


আসাম পাব্লিক সার্বিস কমিসন (এ.পি.এস.সি.) না লৌবা কম্বাইন কম্পিতেতিব একজামিনেসন (সি.সি.ই.) গী ক্বালিফাইং পেপর (পেপর - এ) দা আসামিস, বেঙ্গলি অমসুং বোড়ো লোনগা লোয়ননা মণিপুরী সু হাপচীন্নবা দাবী তৌরদুনা নভেম্বরগী তাং ২৪ দা লখিপুর খুমন বাস স্টেন্দদা মীয়ামগী ওইবা মীফম অমা পাঙথোকখ্রে। অরাম্বম গৌরগোপাল সিংহনা মীফম মপু ওইদুনা পাঙথোকখিবা মীফম অদুদা জোইন্ট এক্সন কমিটি ফোর প্রোতেক্সন অফ ইন্দিজিনাস মণিপুরী পিপলস্ কী চেয়ারমেন অরাম্বম নন্দবাবু সিংহ, মণিপুরী মুসলিম য়ুথ ফ্রোন্টকী প্রেসিদেন্ট আহমেদ চৌধুরী নচিংবা মরুওইবা মীওই কয়ানা শরুক য়াখি। মীফম অদুনা আসামগী মুখ্যমন্ত্রীগী মফমদা পীশিনগদবা রাজ্য অসিগী তোঙান তোঙানবা মফমদগী সিগনেচর লিশিং তরা য়াওগদবা মেমোরেন্দম অমা পীশিন্নবা ৱারেপ্নখি।

মীফমদা লখিপুর মিউনিসিপাল বোর্দকী ৱার্দ কমিসনার লৈশুংবম রবীন্দ্র সিংহ, খুনৌ হায়স্কুলগী হেদমাস্টর সাপম রবীন্দ্র সিংহ, অল আসাম মণিপুরী স্টুদেন্টস্ ইউনিয়ন (আমসু) লখিপুর দিস্ট্রিক্ট কমিতিগী প্রেসিদেন্ট কে বিক্রমজিৎ সিংহ, অল আসাম মণিপুরী মুসলিম স্টুদেন্টস্ ইউনিয়নগী প্রেসিদেন্ট আব্দুল মান্নান, সিঙ্গেরবন্দ হায়স্কুলগী হেদমাস্টার কে চম্পালাল সিংহ নচিংবা মীওই কয়ানা থৌরমগা মরীলৈননা ৱা ঙাংখি। পনবা য়াই, ২০১৯গী আগস্ট ৫দা থোকখিবা রাজ্য সরকারগী চেরোল অমগী মতুং ইন্না এ.পি.এস.সি. গী ক্বালিফাইং পেপরদা আসামিস, বেঙ্গলি নত্রগা বোড়োনা লৌবগী ৱাফম লাউথোরকখি। অদুগা ডিমা হাসাও অমসুং কার্বিআংলোংগী ওইনদি হায়রিবা পথাপ অসিগী ৱাংমদা লৈহনখি। আসাম সরকারগী অসিগুম্বা থৌওং অসিনা আসামদা লৈরিবা মণিপুরীশিংদা থোইদোক্না অৱাবা পোৎলুম অমা ওইহল্লকপা অসিনা মরম ওইরদুনা রাজ্য সরকারগী মফমদা মণিপুরী কেন্দিদেট শিংবু অনৌবা পথাপ অসিগী ৱাংমদা লৈহনবিবা নত্রগা এ.পি.এস.সি. গী ক্বালিফাইং পেপরদা মণিপুরীসু য়াওহন্নবা দাবী তৌখি।
------------------------------------------------------------
Get latest News Updates Please Download our Android app > CLICK HERE
To Subscribe our YouTube Channel > CLICK HERE 
------------------------------------------------------------