ঙসি

অনৌবা আইন কয়াগা লোয়ননা ট্রাফিক্কী অনৌবা নিওম শিলচরদসু থুংলখ্রে।


শিলচরদসু ট্রাফিক্কী অনৌবা আইন লাকলে। লাইসেন্স য়াওদবগী লুপা ৫০০০, হেলমেট য়াওদবগী লুপা ১০০০, মোবাইলদা ৱা ঙাংন-ঙাংনা গারী থৌবদা লুপা ৫০০০, সিট বেল্ট ফাদবগী লুপা ৫০০০ ফাইন পীবা তারগনি। বাইক থৌরিবা মীওইতা নত্তনা তোংলিবা মীওই অদুসু হেলমেট উপতবা য়াদ্রে। চাকা অনি পানবা গারী থৌরিবা শিংনা হেলমেট, লাইসেন্স, পোলিউসন হায়বদি বাইককী ফিটনেস সার্টিফিকেট, রেজিস্ট্রেসন সার্টিফিকেট অমসুং ইন্সুরেন্স মতম পুম্বদা লোয়নদুনা গারী থৌবা তারে।  অসিতা নত্তনা চাকা অনি পানবা গারীদা থৌরিবা অমসুং মমাংদা তোংলিবা মীওই অদুসু সিট বেল্ট ফাদবা য়াদ্রে। মসি খুদিংমক অসি থৌওইদবা মীওইশিংদগী শেনফম চাউনা ট্রাফিক্কী মীওইশিংনা চালান কক্কদৌরি। চাকা অনি পানবদা মীওই অনিদগী হেন্না তোংবদা লুপা ১০০০, স্কুল কোলেজ হোসপিতাল অমসুং কোর্টগী অকোয়বগী মফমশিংদা হোর্ন খোংবগী লুপা ১০০০, এম্বুলেন্স অমসুং ফায়ার ব্রিগেদকী গারীগী লম্বীদা চৎফম পীদবা গারীদা লুপা ১০০০০ অসিনচিংবা অনৌবা আইন কয়াগা লোয়ননা ট্রাফিক্কী অনৌবা নিওম শিলচরদসু থুংলখ্রে। আইন শিং অসি আসাম রাজ্যদা হৌখিবা লৈবাকপোকপা নুমিৎ সেপতেম্বরগী ২৪দগী চৎনবা হৌখ্রে। অসোমদা বাস, সুমো, ক্রইজার অমসুং অটো নচিংবা গারীশিংগীসু লাইসেন্স, ইন্সুরেন্স, ফিটনেস সার্টিফিকেটকা লোয়ননা রোদ পার্মিটসু লোয়নদুনা চৎপা মথৌ তারে। অতোপ্পা মীগী গারী থৌদুনা লাকপা মীওইশিংদসু আইনগী মতুং ইন্না ফাইন পীবগী আইন লৈরে। (www.lakhipuronline.in)